Matthew 25

¹Тогда̀ ѹ҆подо́бисѧ црⷭ҇твїе нбⷭ҇ное десѧти́мъ дѣ́вамъ, ꙗ҆̀же прїѧ́ша свѣти́льники своѧ̀, и҆ и҆зыдо́ша въ срѣ́тенїе женихꙋ̀.

²Пѧ́ть же бѣ̀ ѿ ни́хъ мꙋдры̀, и҆ пѧ́ть ю҆рѡ́дивы.

³Ю҆рѡ́дивыѧ же прїе́мше свѣти́льники своѧ̀, не взѧ́ша съ собо́ю є҆ле́а.

⁴Мꙋ́дрыѧ же прїѧ́ша є҆ле́й въ сосꙋ́дѣхъ, со свѣти́льники свои́ми.

⁵Коснѧ́щꙋ же женихꙋ̀, воздрема́шасѧ всѧ̑, и҆ спа́хꙋ.

⁶Полꙋ́нощи же во́пль бы́сть: сѐ жени́хъ грѧде́тъ, и҆сходи́те въ срѣ́тенїе є҆гѡ̀.

⁷Тогда̀ воста́вше всѧ̀ дѣ́вы ты́ѧ, и҆ ѹ҆краси́ша свѣти́льники своѧ̀.

⁸Ю҆рѡ́дивыѧ же мꙋ̑дрымъ рѣ́ша: дади́те на́мъ ѿ є҆ле́а ва́шегѡ, ꙗ҆́кѡ свѣти́льницы на́ши ѹ҆гаса́ютъ.

⁹Ѿвѣща́ша же мꙋ́дрыѧ, глаго́люще: є҆да̀ ка́кѡ не доста́нетъ на́мъ и҆ ва́мъ: и҆ди́те же па́че къ продаю́щымъ, и҆ кꙋпи́те себѣ̀.

¹⁰И҆дꙋ́щымъ же и҆̀мъ кꙋпи́ти, прїи́де жени́хъ, и҆ готѡ́выѧ внидо́ша съ ни́мъ на бра́ки: и҆ затворе́ны бы́ша двє́ри.

¹¹Послѣди́ же прїидо́ша и҆ про́чыѧ дѣ́вы, глаго́люще: гдⷭ҇и, гдⷭ҇и, ѿве́рзи на́мъ.

¹²Ѻ҆́нъ же ѿвѣща́въ, речѐ и҆̀мъ: а҆ми́нь глаго́лю ва́мъ, не вѣ́мъ ва́съ.

¹³Бди́те ѹ҆̀бо, ꙗ҆́кѡ не вѣ́сте днѐ, ни часа̀, во́ньже сн҃ъ человѣ́ческїй прїи́детъ.

¹⁴Ꙗ҆́коже бо человѣ́къ нѣ́кїй ѿходѧ̀ призва̀ своѧ̀ рабы̑, и҆ предадѐ и҆̀мъ и҆мѣ́нїе своѐ.

¹⁵И҆ ѻ҆́вомꙋ ѹ҆́бѡ дадѐ пѧ́ть тала̑нтъ, ѻ҆́вомꙋ же два̀, ѻ҆́вомꙋ же є҆ди́нъ, комꙋ́ждо проти́вꙋ си́лы є҆гѡ̀: и҆ ѿи́де а҆́бїе.

¹⁶Ше́дъ же прїе́мый пѧ́ть тала̑нтъ, дѣ́ла въ ни́хъ, и҆ сотворѝ дрꙋгі́ѧ пѧ́ть тала̑нтъ.

¹⁷Та́кожде и҆ и҆́же два̀, прїѡбрѣ́те и҆ то́й дрꙋга̑ѧ два̀.

¹⁸Прїе́мый же є҆ди́нъ, ше́дъ вкопа̀ є҆го̀ въ зе́млю, и҆ скры̀ сребро̀ гдⷭ҇и́на своегѡ̀.

¹⁹По мно́зѣ же вре́мени прїи́де гдⷭ҇и́нъ ра̑бъ тѣ́хъ, и҆ стѧза́сѧ съ ни́ми ѡ҆ словесѝ.

²⁰И҆ пристꙋ́пль пѧ́ть тала̑нтъ прїе́мый, принесѐ дрꙋгі́ѧ пѧ́ть тала̑нтъ, глаго́лѧ: гдⷭ҇и, пѧ́ть тала̑нтъ мѝ є҆сѝ пре́далъ, сѐ дрꙋгі́ѧ пѧ́ть тала̑нтъ прїѡбрѣто́хъ и҆́ми.

²¹Рече́ же є҆мꙋ̀ гдⷭ҇ь є҆гѡ̀: до́брый ра́бе, бл҃гі́й и҆ вѣ́рный, ѡ҆ ма́лѣ бы́лъ є҆сѝ вѣ́ренъ, над̾ мно́гими тѧ̀ поста́влю: вни́ди въ ра́дость гдⷭ҇а твоегѡ̀.

²²Пристꙋ́пль же и҆ и҆́же два̀ тала́нта прїе́мый, речѐ: гдⷭ҇и, два̀ тала́нта мѝ є҆сѝ пре́далъ, сѐ дрꙋга̑ѧ два̀ тала́нта прїѡбрѣто́хъ и҆́ма.

²³Рече́ же є҆мꙋ̀ гдⷭ҇ь є҆гѡ̀: до́брый ра́бе, благі́й и҆ вѣ́рный, ѡ҆ ма́лѣ мѝ бы́лъ є҆сѝ вѣ́ренъ, над̾ мно́гими тѧ̀ поста́влю: вни́ди въ ра́дость гдⷭ҇а твоегѡ̀.

²⁴Пристꙋ́пль же и҆ прїе́мый є҆ди́нъ тала́нтъ, речѐ: гдⷭ҇и, вѣ́дѧхъ тѧ̀, ꙗ҆́кѡ же́стокъ є҆сѝ человѣ́къ: жне́ши, и҆дѣ́же не сѣ́ѧлъ є҆сѝ, и҆ собира́еши, ю҆́дꙋже не расточи́лъ є҆сѝ:

²⁵И҆ ѹ҆боѧ́всѧ ше́дъ скры́хъ тала́нтъ тво́й въ землѝ, и҆ сѐ и҆́маши твоѐ.

²⁶Ѿвѣща́въ же гдⷭ҇ь є҆гѡ̀, речѐ є҆мꙋ̀: лꙋка́вый ра́бе и҆ лѣни́вый, вѣ́дѧше, ꙗ҆́кѡ жнꙋ̀, и҆дѣ́же не сѣ́ѧхъ, и҆ собира́ю, ю҆́дꙋже не расточи́хъ:

²⁷Подоба́ше ѹ҆̀бо тебѣ̀ вда́ти сребро̀ моѐ торжникѡ́мъ, и҆ прише́дъ а҆́зъ взѧ́лъ бы́хъ своѐ съ ли́хвою.

²⁸Воз̾ми́те ѹ҆̀бо ѿ негѡ̀ тала́нтъ, и҆ дади́те и҆мꙋ́щемꙋ де́сѧть тала̑нтъ.

²⁹И҆мꙋ́щемꙋ бо вездѣ̀ дано̀ бꙋ́детъ, и҆ преизбꙋ́детъ: ѿ неимꙋ́щагѡ же, и҆ є҆́же мни́тсѧ и҆мѣ́ѧ, взѧ́то бꙋ́детъ ѿ негѡ̀.

³⁰И҆ неключи́маго раба̀ вве́рзите во тмꙋ̀ кромѣ́шнюю: тꙋ̀ бꙋ́детъ пла́чь и҆ скре́жетъ зꙋбѡ́мъ. сїѧ̑ глаго́лѧ возгласѝ: и҆мѣ́ѧй ѹ҆́ши слы́шати, да слы́шитъ.

³¹Є҆гда́ же прїи́детъ сн҃ъ человѣ́ческїй въ сла́вѣ свое́й, и҆ всѝ ст҃і́и а҆́гг҃ли съ ни́мъ, тогда̀ сѧ́детъ на прⷭ҇то́лѣ сла́вы своеѧ̀:

³²И҆ соберꙋ́тсѧ пред̾ ни́мъ всѝ ꙗ҆зы́цы, и҆ разлꙋчи́тъ и҆̀хъ дрꙋ́гъ ѿ дрꙋ́га, ꙗ҆́коже па́стырь разлꙋча́етъ ѻ҆́вцы ѿ ко́злищъ.

³³И҆ поста́витъ ѻ҆́вцы ѡ҆деснꙋ́ю себѐ, а҆ кѡ́злища ѡ҆шꙋ́юю.

³⁴Тогда̀ рече́тъ цр҃ь сꙋ́щымъ ѡ҆деснꙋ́ю є҆гѡ̀: прїиди́те благослове́ннїи ѻ҆ц҃а̀ моегѡ̀, наслѣ́дꙋйте ѹ҆гото́ванное ва́мъ црⷭ҇твїе ѿ сложе́нїѧ мі́ра.

³⁵Взалка́хсѧ бо, и҆ да́сте мѝ ꙗ҆́сти: возжада́хсѧ, и҆ напои́сте мѧ̀: стра́ненъ бѣ́хъ, и҆ введо́сте менѐ:

³⁶На́гъ, и҆ ѡ҆дѣ́ѧсте мѧ̀: бо́ленъ, и҆ посѣти́сте менѐ: въ темни́цѣ бѣ́хъ, и҆ прїидо́сте ко мнѣ̀.

³⁷Тогда̀ ѿвѣща́ютъ є҆мꙋ̀ пра́вєдницы, глаго́люще: гдⷭ҇и, когда́ тѧ ви́дѣхомъ а҆́лчꙋща, и҆ напита́хомъ; и҆лѝ жа́ждꙋща, и҆ напои́хомъ;

³⁸Когда́ же тѧ̀ ви́дѣхомъ стра́нна, и҆ введо́хомъ; и҆лѝ на́га, и҆ ѡ҆дѣ́ѧхомъ;

³⁹Когда́ же тѧ̀ ви́дѣхомъ болѧ́ща, и҆лѝ въ темни́цѣ, и҆ прїидо́хомъ къ тебѣ̀;

⁴⁰И҆ ѿвѣща́въ цр҃ь рече́тъ и҆̀мъ: а҆ми́нь глаго́лю ва́мъ, поне́же сотвори́сте є҆ди́номꙋ си́хъ бра́тїй мои́хъ ме́ньшихъ, мнѣ̀ сотвори́сте.

⁴¹Тогда̀ рече́тъ и҆ сꙋ́щымъ ѡ҆шꙋ́юю є҆гѡ̀: и҆ди́те ѿ менѐ проклѧ́тїи ко ѻ҆́гнь вѣ́чный, ѹ҆гото́ванный дїа́волꙋ и҆ а҆́ггелѡмъ є҆гѡ̀.

⁴²Взалка́хсѧ бо, и҆ не да́сте мѝ ꙗ҆́сти: возжада́хсѧ, и҆ не напои́сте менѐ.

⁴³Стра́ненъ бѣ́хъ, и҆ не введо́сте менѐ: на́гъ, и҆ не ѡ҆дѣ́ѧсте менѐ: бо́ленъ, и҆ въ темни́цѣ, и҆ не посѣти́сте менѐ.

⁴⁴Тогда̀ ѿвѣща́ютъ є҆мꙋ̀ и҆ ті́и, глаго́люще: гдⷭ҇и, когда́ тѧ ви́дѣхомъ а҆́лчꙋща, и҆лѝ жа́ждꙋща, и҆лѝ стра́нна, и҆лѝ на́га, и҆лѝ бо́льна, и҆лѝ въ темни́цѣ, и҆ не послꙋжи́хомъ тебѣ̀;

⁴⁵Тогда̀ ѿвѣща́етъ и҆̀мъ, глаго́лѧ: а҆ми́нь глаго́лю ва́мъ, поне́же не сотвори́сте є҆ди́номꙋ си́хъ ме́ньшихъ, ни мнѣ̀ сотвори́сте.

⁴⁶И҆ и҆́дꙋтъ сі́и въ мꙋ́кꙋ вѣ́чнꙋю, пра́вєдницы же въ живо́тъ вѣ́чный.