Matthew 26

¹И҆ бы́сть, є҆гда̀ сконча̀ і҆и҃съ всѧ̀ словеса̀ сїѧ̀, речѐ ѹ҆ченикѡ́мъ свои́мъ:

²Вѣ́сте, ꙗ҆́кѡ по двою̀ дню̀ па́сха бꙋ́детъ, и҆ сн҃ъ человѣ́ческїй пре́данъ бꙋ́детъ на пропѧ́тїе.

³Тогда̀ собра́шасѧ а҆рхїере́є, и҆ кни́жницы и҆ ста́рцы людсті́и, во дво́ръ а҆рхїере́овъ, глаго́лемагѡ каїа́фы:

⁴И҆ совѣща́ша, да і҆и҃са ле́стїю и҆́мꙋтъ, и҆ ѹ҆бїю́тъ.

⁵Глаго́лахꙋ же: но не въ пра́здникъ, да не молва̀ бꙋ́детъ въ лю́дехъ.

⁶І҆и҃сꙋ же бы́вшꙋ въ виѳа́нїи, въ домꙋ̀ сі́мѡна прокаже́ннагѡ,

⁷Пристꙋпѝ къ немꙋ̀ жена̀, стклѧ́ницꙋ мѵ́ра и҆мꙋ́щи многоцѣ́ннагѡ, и҆ возлива́ше на главꙋ̀ є҆гѡ̀, возлежа́щꙋ.

⁸Ви́дѣвше же ѹ҆ченицы̀ є҆гѡ̀, негодова́ша, глаго́люще. чесѡ̀ ра́ди ги́бель сїѧ̀ бы́сть;

⁹Можа́ше бо сїѐ мѵ́ро продано̀ бы́ти на мно́зѣ, и҆ да́тисѧ ни́щымъ.

¹⁰Разꙋмѣ́въ же і҆и҃съ речѐ и҆̀мъ: что̀ трꙋжда́ете женꙋ̀; дѣ́ло бо добро̀ содѣ́ла ѡ҆ мнѣ̀.

¹¹Всегда́ бо ни́щыѧ и҆́мате съ собо́ю: мене́ же не всегда̀ и҆́мате.

¹²Возлїѧ́вши бо сїѧ̀ мѵ́ро сїѐ на тѣ́ло моѐ, на погребе́нїе мѧ̀ сотворѝ.

¹³А҆ми́нь глаго́лю ва́мъ: и҆дѣ́же а҆́ще проповѣ́дано бꙋ́детъ є҆ѵⷢ҇лїе сїѐ во все́мъ мі́рѣ, рече́тсѧ, и҆ є҆́же сотворѝ сїѧ̀, въ па́мѧть є҆ѧ̀.

¹⁴Тогда̀ ше́дъ є҆ди́нъ ѿ ѻ҆боюна́десѧте, глаго́лемый і҆ꙋ́да і҆скарїѡ́тскїй, ко а҆рхїере́ѡмъ,

¹⁵Речѐ: что́ ми хо́щете да́ти, и҆ а҆́зъ ва́мъ преда́мъ є҆го̀; ѻ҆ни́ же поста́виша є҆мꙋ̀ три́десѧть сре́брєникъ.

¹⁶И҆ ѿто́лѣ и҆ска́ше подо́бна вре́мене, да є҆го̀ преда́стъ.

¹⁷Въ пе́рвый же де́нь ѡ҆прѣсно́чный пристꙋпи́ша ѹ҆ченицы̀ і҆и҃сови, глаго́люще є҆мꙋ̀: гдѣ̀ хо́щеши, ѹ҆гото́ваемъ тѝ ꙗ҆́сти па́схꙋ;

¹⁸Ѻ҆́нъ же речѐ: и҆ди́те во гра́дъ ко ѻ҆́нсицѣ, и҆ рцы́те є҆мꙋ̀: ѹ҆чи́тель глаго́летъ, вре́мѧ моѐ бли́зъ є҆́сть, ѹ҆ тебѐ сотворю̀ па́схꙋ со ѹ҆ченикѝ мои́ми.

¹⁹И҆ сотвори́ша ѹ҆ченицы̀, ꙗ҆́коже повелѣ̀ и҆̀мъ і҆и҃съ: и҆ ѹ҆гото́ваша па́схꙋ.

²⁰Ве́черꙋ же бы́вшꙋ возлежа́ше со ѻ҆бѣмана́десѧте ѹ҆ченико́ма.

²¹И҆ ꙗ҆дꙋ́щымъ и҆̀мъ речѐ: а҆ми́нь глаго́лю ва́мъ, ꙗ҆́кѡ є҆ди́нъ ѿ ва́съ преда́стъ мѧ̀.

²²И҆ скорбѧ́ще ѕѣлѡ̀, нача́ша глаго́лати є҆мꙋ̀ є҆ди́нъ кі́йждо и҆́хъ: є҆да̀ а҆́зъ є҆́смь, гдⷭ҇и;

²³Ѻ҆́нъ же ѿвѣща́въ речѐ: ѡ҆мочи́вый со мно́ю въ соли́ло рꙋ́кꙋ, то́й мѧ̀ преда́стъ.

²⁴Сн҃ъ же человѣ́ческїй и҆́детъ, ꙗ҆́коже є҆́сть пи́сано ѡ҆ не́мъ. го́ре же человѣ́кꙋ томꙋ̀, и҆́мже сн҃ъ чл҃вѣ́ческїй преда́стсѧ: добро̀ бы бы́ло є҆мꙋ̀, а҆́ще не бы̀ роди́лсѧ человѣ́къ то́й.

²⁵Ѿвѣща́въ же і҆ꙋ́да предаѧ́й є҆го̀, речѐ: є҆да̀ а҆́зъ є҆́смь, равві̀; глаго́ла є҆мꙋ̀: ты̀ речѐ.

²⁶Ꙗ҆дꙋ́щымъ же и҆̀мъ, прїе́мъ і҆и҃съ хлѣ́бъ, и҆ благослови́въ преломѝ, и҆ даѧ́ше ѹ҆ченикѡ́мъ, и҆ речѐ: прїими́те, ꙗ҆ди́те, сїѐ є҆́сть тѣ́ло моѐ.

²⁷И҆ прїе́мъ ча́шꙋ, хвалꙋ̀ возда́въ, дадѐ и҆̀мъ, глаго́лѧ: пі́йте ѿ неѧ̀ всѝ.

²⁸Сїѧ́ бо є҆́сть кро́вь моѧ̀ но́вагѡ завѣ́та, ꙗ҆́же за мнѡ́гїѧ и҆злива́ема, во ѡ҆ставле́нїе грѣхѡ́въ.

²⁹Глаго́лю же ва́мъ: ꙗ҆́кѡ не и҆́мамъ пи́ти ѿ ны́нѣ ѿ сегѡ̀ плода̀ ло́знагѡ, до днѐ тогѡ̀, є҆гда̀ и҆̀ пїю̀ съ ва́ми но́во во црⷭ҇твїи ѻ҆ц҃а̀ моегѡ̀.

³⁰И҆ воспѣ́вше, и҆зыдо́ша въ го́рꙋ є҆леѡ́нскꙋ.

³¹Тогда̀ глаго́ла и҆̀мъ і҆и҃съ: всѝ вы̀ соблазните́сѧ ѡ҆ мнѣ̀ въ но́щь сїю̀. пи́сано бо є҆́сть: поражꙋ̀ па́стырѧ, и҆ разы́дꙋтсѧ ѻ҆́вцы ста́да.

³²По воскресе́нїи же мое́мъ, варѧ́ю вы̀ въ галїле́и.

³³Ѿвѣща́въ же пе́тръ речѐ є҆мꙋ̀: а҆́ще и҆ всѝ соблазнѧ́тсѧ ѡ҆ тебѣ̀, а҆́зъ никогда́же соблажню́сѧ.

³⁴Речѐ є҆мꙋ̀ і҆и҃съ: а҆ми́нь глаго́лю тебѣ̀, ꙗ҆́кѡ въ сїю̀ но́щь, пре́жде да́же а҆ле́ктѡръ не возгласи́тъ, трикра́ты ѿве́ржешисѧ менѐ.

³⁵Глаго́ла є҆мꙋ̀ пе́тръ: а҆́ще мѝ є҆́сть и҆ ѹ҆мре́ти съ тобо́ю, не ѿве́ргꙋсѧ тебѐ. та́кожде и҆ всѝ ѹ҆ченицы̀ рѣ́ша.

³⁶Тогда̀ прїи́де съ ни́ми і҆и҃съ въ ве́сь нарица́емꙋю геѳсима́нїа, и҆ глаго́ла ѹ҆ченикѡ́мъ: сѣди́те тꙋ̀, до́ндеже ше́дъ помолю́сѧ та́мѡ.

³⁷И҆ пое́мъ петра̀ и҆ ѻ҆́ба сы́на зеведе́ова, нача́тъ скорбѣ́ти и҆ тꙋжи́ти.

³⁸Тогда̀ глаго́ла и҆̀мъ і҆и҃съ: приско́рбна є҆́сть дꙋша̀ моѧ̀ до сме́рти: пожди́те здѣ̀, и҆ бди́те со мно́ю.

³⁹И҆ преше́дъ ма́лѡ, падѐ на лицѣ̀ свое́мъ, молѧ́сѧ, и҆ глаго́лѧ: ѻ҆́ч҃е мо́й, а҆́ще возмо́жно є҆́сть, да мимои́детъ ѿ менѐ ча́ша сїѧ̀: ѻ҆ба́че не ꙗ҆́коже а҆́зъ хощꙋ̀, но ꙗ҆́коже ты̀.

⁴⁰И҆ прише́дъ ко ѹ҆ченикѡ́мъ, и҆ ѡ҆брѣ́те и҆̀хъ спѧ́щѧ, и҆ глаго́ла петро́ви: та́кѡ ли не возмого́сте є҆ди́нагѡ часа̀ побдѣ́ти со мно́ю;

⁴¹Бди́те и҆ моли́тесѧ, да не вни́дете въ напа́сть: дꙋ́хъ бо бо́дръ, пло́ть же немощна̀.

⁴²Па́ки втори́цею ше́дъ помоли́сѧ, глаго́лѧ: ѻ҆́ч҃е мо́й, а҆́ще не мо́жетъ сїѧ̀ ча́ша мимоитѝ ѿ менѐ, а҆́ще не пїю̀ є҆ѧ̀, бꙋ́ди во́лѧ твоѧ̀.

⁴³И҆ прише́дъ ѡ҆брѣ́те и҆̀хъ па́ки спѧ́щѧ, бѣ́ста бо и҆̀мъ ѻ҆́чи ѡ҆тѧготѣ́нѣ.

⁴⁴И҆ ѡ҆ста́вль и҆̀хъ, ше́дъ па́ки помоли́сѧ трети́цею, то́жде сло́во ре́къ.

⁴⁵Тогда̀ прїи́де ко ѹ҆ченикѡ́мъ свои́мъ, и҆ глаго́ла и҆̀мъ: спи́те про́чее, и҆ почива́йте: сѐ прибли́жисѧ ча́съ, и҆ сн҃ъ человѣ́ческїй предае́тсѧ въ рꙋ́ки грѣ́шникѡвъ.

⁴⁶Воста́ните, и҆́демъ: сѐ прибли́жисѧ предаѧ́й мѧ̀.

⁴⁷И҆ є҆щѐ є҆мꙋ̀ глаго́лющꙋ, сѐ і҆ꙋ́да є҆ди́нъ ѿ ѻ҆боюна́десѧте прїи́де, и҆ съ ни́мъ наро́дъ мно́гъ, со ѻ҆рꙋ́жїемъ и҆ дреко́льми, ѿ а҆рхїерє́й и҆ ста́рєцъ людски́хъ.

⁴⁸Предаѧ́й же є҆го̀, дадѐ и҆̀мъ зна́менїе, глаго́лѧ: є҆го́же а҆́ще лобжꙋ̀, то́й є҆́сть, и҆ми́те є҆го̀.

⁴⁹И҆ а҆́бїе пристꙋ́пль ко і҆и҃сови, речѐ: ра́дꙋйсѧ равві̀, и҆ ѡ҆блобыза̀ є҆го̀.

⁵⁰І҆и҃съ же речѐ є҆мꙋ̀: дрꙋ́же, творѝ на не́же є҆сѝ прише́лъ. тогда̀ пристꙋ́пльше возложи́ша рꙋ́цѣ на і҆и҃са, и҆ ꙗ҆́ша є҆го̀.

⁵¹И҆ сѐ є҆ди́нъ ѿ сꙋ́щихъ со і҆и҃сомъ, просте́ръ рꙋ́кꙋ, и҆звлечѐ но́жъ сво́й: и҆ ѹ҆да́ри раба̀ а҆рхїере́ова, и҆ ѹ҆рѣ́за є҆мꙋ̀ ѹ҆́хо.

⁵²Тогда̀ глаго́ла є҆мꙋ̀ і҆и҃съ: возвратѝ но́жъ тво́й въ мѣ́сто є҆гѡ̀: вси́ бо прїе́мшїи но́жъ ноже́мъ поги́бнꙋтъ:

⁵³И҆лѝ мни́тсѧ тѝ, ꙗ҆́кѡ не могꙋ̀ ны́нѣ ѹ҆моли́ти ѻ҆ц҃а̀ моего̀, и҆ предста́витъ мѝ вѧ́щше и҆лѝ двана́десѧте легеѡ́на а҆́гг҃лъ;

⁵⁴Ка́кѡ же ѹ҆̀бо сбꙋ́дꙋтсѧ писа̑нїѧ, ꙗ҆́кѡ та́кѡ подоба́етъ бы́ти;

⁵⁵Въ то́й ча́съ речѐ і҆и҃съ наро́дѡмъ: ꙗ҆́кѡ на разбо́йника ли и҆зыдо́сте со ѻ҆рꙋ́жїемъ и҆ дреко́льми, ꙗ҆́ти мѧ̀; по всѧ̀ днѝ при ва́съ сѣдѣ́хъ ѹ҆чѧ̀ въ цр҃кви, и҆ не ꙗ҆́сте менѐ.

⁵⁶Се́ же всѐ бы́сть, да сбꙋ́дꙋтсѧ писа̑нїѧ проро́чєскаѧ. тогда̀ ѹ҆ченицы̀ всѝ ѡ҆ста́вльше є҆го̀, бѣжа́ша.

⁵⁷Во́ини же є҆́мше і҆и҃са ведо́ша къ каїа́фѣ а҆рхїере́ови, и҆дѣ́же кни́жницы и҆ ста́рцы собра́шасѧ.

⁵⁸Пе́тръ же и҆дѧ́ше по не́мъ и҆здале́ча, до двора̀ а҆рхїере́ова: и҆ вше́дъ внꙋ́трь, сѣдѧ́ше со слꙋга́ми, ви́дѣти кончи́нꙋ.

⁵⁹А҆рхїере́є же и҆ ста́рцы, и҆ со́нмъ ве́сь, и҆ска́хꙋ лжесвидѣ́тельства на і҆и҃са, ꙗ҆́кѡ да ѹ҆бїю́тъ є҆го̀,

⁶⁰И҆ не ѡ҆брѣта́хꙋ: и҆ мнѡ́гимъ лжесвидѣ́телємъ пристꙋ́пльшымъ, не ѡ҆брѣто́ша. по́слѣжде же пристꙋпи́ша два̀ лжесвидѣ́телѧ,

⁶¹Рѣ́ста: се́й речѐ, могꙋ̀ разори́ти цр҃ковь бж҃їю, и҆ тремѝ де́ньми созда́ти ю҆̀.

⁶²И҆ воста́въ а҆рхїере́й, речѐ є҆мꙋ̀: ничесѡ́же ли ѿвѣщава́еши, что̀ сі́и на тѧ̀ свидѣ́тельствꙋютъ.

⁶³І҆и҃съ же молча́ше. и҆ ѿвѣща́въ а҆рхїере́й, речѐ є҆мꙋ̀: заклина́ю тѧ̀ бг҃омъ живы́мъ, да рече́ши на́мъ, а҆́ще ты̀ є҆сѝ хрⷭ҇то́съ сн҃ъ бж҃їй;

⁶⁴Глаго́ла є҆мꙋ̀ і҆и҃съ: ты̀ речѐ. ѻ҆ба́че глаго́лю ва́мъ: ѿсе́лѣ ѹ҆́зрите сн҃а человѣ́ческаго сѣдѧ́ща ѡ҆деснꙋ́ю си́лы, и҆ грѧдꙋ́ща на ѻ҆́блацѣхъ нбⷭ҇ныхъ.

⁶⁵Тогда̀ а҆рхїере́й растерза̀ ри̑зы своѧ̀, глаго́лѧ: ꙗ҆́кѡ хꙋлꙋ̀ глаго́ла, что̀ є҆щѐ тре́бꙋемъ свидѣ́телей; сѐ ны́нѣ слы́шасте хꙋлꙋ̀ є҆гѡ̀:

⁶⁶Что́ сѧ ва́мъ мни́тъ; ѻ҆ни́ же ѿвѣща́вше, рѣ́ша: пови́ненъ є҆́сть сме́рти.

⁶⁷Тогда̀ заплева́ша лицѐ є҆гѡ̀, и҆ па́кѡсти є҆мꙋ̀ дѣ́ѧхꙋ, ѻ҆́вїи же за лани́тꙋ ѹ҆да́риша,

⁶⁸Глаго́люще: прорцы̀ на́мъ хрⷭ҇тѐ, кто́ є҆сть ѹ҆даре́й тѧ̀;

⁶⁹Пе́тръ же внѣ̀ сѣдѧ́ше во дворѣ̀, и҆ пристꙋпѝ къ немꙋ̀ є҆ди́на рабы́нѧ, глаго́лющи: и҆ ты̀ бѣ̀ со і҆и҃сомъ галїле́йскимъ.

⁷⁰Ѻ҆́нъ же ѿве́ржесѧ пред̾ всѣ́ми, глаго́лѧ: не вѣ́мъ, что̀ глаго́леши.

⁷¹И҆зше́дшꙋ же є҆мꙋ̀ ко вратѡ́мъ, ѹ҆зрѣ̀ є҆го̀ дрꙋга́ѧ, и҆ глаго́ла и҆̀мъ тꙋ̀: и҆ се́й бѣ̀ со і҆и҃сомъ назѡре́омъ.

⁷²И҆ па́ки ѿве́ржесѧ съ клѧ́твою: ꙗ҆́кѡ не зна́ю человѣ́ка.

⁷³По ма́лѣ же пристꙋпи́вше стоѧ́щїи, рѣ́ша петро́ви: вои́стиннꙋ и҆ ты̀ ѿ ни́хъ є҆сѝ: и҆́бо бесѣ́да твоѧ̀ ꙗ҆́вѣ тѧ̀ твори́тъ.

⁷⁴Тогда̀ нача́тъ роти́тисѧ и҆ клѧ́тисѧ, ꙗ҆́кѡ не зна́ю человѣ́ка. и҆ а҆́бїе пѣ́телъ возгласѝ.

⁷⁵И҆ помѧнꙋ̀ пе́тръ глаго́лъ і҆и҃совъ, рече́нный є҆мꙋ̀: ꙗ҆́кѡ пре́жде да́же пѣ́телъ не возгласи́тъ, трикра́ты ѿве́ржешисѧ менѐ, и҆ и҆зше́дъ во́нъ пла́касѧ го́рькѡ.