Matthew 24

¹И҆ и҆зше́дъ і҆и҃съ, и҆дѧ́ше ѿ це́ркве: и҆ пристꙋпи́ша къ немꙋ̀ ѹ҆ченицы̀ є҆гѡ̀, показа́ти є҆мꙋ̀ зда́нїѧ церкѡ́внаѧ.

²І҆и҃съ же речѐ и҆̀мъ: не ви́дите ли всѧ̑ сїѧ̑; а҆ми́нь глаго́лю ва́мъ, не и҆́мать ѡ҆ста́ти здѣ̀ ка́мень на ка́мени, и҆́же не разори́тсѧ.

³Сѣдѧ́щꙋ же є҆мꙋ̀ на горѣ̀ є҆леѡ́нстѣй, пристꙋпи́ша къ немꙋ̀ ѹ҆ченицы̀, наединѣ̀ глаго́люще: рцы̀ на́мъ, когда̀ сїѧ̑ бꙋ́дꙋтъ; и҆ что̀ є҆́сть зна́менїе твоегѡ̀ прише́ствїѧ, и҆ кончи́на вѣ́ка;

⁴И҆ ѿвѣща́въ і҆и҃съ, речѐ и҆̀мъ: блюди́те, да никто́же ва́съ прельсти́тъ.

⁵Мно́зи бо прїи́дꙋтъ во и҆́мѧ моѐ, глаго́люще: а҆́зъ є҆́смь хрⷭ҇то́съ, и҆ мнѡ́ги прельстѧ́тъ:

⁶Ѹ҆слы́шати же и҆́мате бра̑ни, и҆ слы̑шанїѧ бра́нємъ, зри́те, не ѹ҆жаса́йтесѧ: подоба́етъ бо всѣ̑мъ си̑мъ бы́ти, но не тогда̀ є҆́сть кончи́на.

⁷Воста́нетъ бо ꙗ҆зы́къ на ꙗ҆зы́къ, и҆ црⷭ҇тво на црⷭ҇тво: и҆ бꙋ́дꙋтъ гла́ди, и҆ па̑гꙋбы, и҆ трꙋ́си по мѣ́стѡмъ:

⁸Всѧ̑ же сїѧ̑, нача́ло болѣ́знемъ.

⁹Тогда̀ предадѧ́тъ вы̀ въ скѡ́рби, и҆ ѹ҆бїю́тъ вы̀: и҆ бꙋ́дете ненави́дими всѣ́ми ꙗ҆зы́ки и҆́мене моегѡ̀ ра́ди.

¹⁰И҆ тогда̀ соблазнѧ́тсѧ мно́зи, и҆ дрꙋ́гъ дрꙋ́га предадѧ́тъ, и҆ возненави́дитъ дрꙋ́гъ дрꙋ́га:

¹¹И҆ мно́зи лжепроро́цы воста́нꙋтъ, и҆ прельстѧ́тъ мнѡ́гїѧ:

¹²И҆ за ѹ҆множе́нїе беззако́нїѧ, и҆зсѧ́кнетъ любы̀ мно́гихъ.

¹³Претерпѣ́вый же до конца̀, то́й спасе́тсѧ.

¹⁴И҆ проповѣ́стсѧ сїѐ є҆ѵⷢ҇лїе црⷭ҇твїѧ по все́й вселе́ннѣй, во свидѣ́тельство всѣ́мъ ꙗ҆зы́кѡмъ: и҆ тогда̀ прїи́детъ кончи́на.

¹⁵Є҆гда̀ ѹ҆́бѡ ѹ҆́зрите ме́рзость запꙋстѣ́нїѧ, рече́ннꙋю данїи́ломъ проро́комъ, стоѧ́щꙋ на мѣ́стѣ ст҃ѣ: и҆́же чте́тъ, да разꙋмѣ́етъ:

¹⁶Тогда̀ сꙋ́щїи во і҆ꙋде́и, да бѣжа́тъ на го́ры.

¹⁷И҆ и҆́же на кро́вѣ, да не схо́дитъ взѧ́ти ꙗ҆̀же въ домꙋ̀ є҆гѡ̀:

¹⁸И҆ и҆́же на селѣ̀, да не возврати́тсѧ вспѧ́ть взѧ́ти ри́зъ свои́хъ.

¹⁹Го́ре же непра̑зднымъ, и҆ доѧ́щымъ въ ты́ѧ днѝ.

²⁰Моли́тесѧ же, да не бꙋ́детъ бѣ́гство ва́ше зимѣ̀, ни въ сꙋббѡ́тꙋ.

²¹Бꙋ́детъ бо тогда̀ ско́рбь ве́лїѧ, ꙗ҆кова́ же нѣ́сть была̀ ѿ нача́ла мі́ра досе́лѣ, нижѐ и҆́мать бы́ти.

²²И҆ а҆́ще не бы́ша прекрати́лисѧ дні́е ѻ҆́ны, не бы̀ ѹ҆́бѡ спасла́сѧ всѧ́ка пло́ть: и҆збра́нныхъ же ра́ди прекратѧ́тсѧ дні́е ѻ҆́ны.

²³Тогда̀ а҆́ще кто̀ рече́тъ ва́мъ: сѐ здѣ̀ хрⷭ҇то́съ, и҆лѝ ѻ҆́ндѣ, не и҆ми́те вѣ́ры.

²⁴Воста́нꙋтъ бо лжехрі́сти и҆ лжепроро́цы, и҆ дадѧ́тъ зна́мєнїѧ вє́лїѧ и҆ чꙋдеса̀: ꙗ҆́коже прельсти́ти, а҆́ще возмо́жно, и҆ и҆збра̑нныѧ.

²⁵Сѐ пре́жде рѣ́хъ ва́мъ.

²⁶А҆́ще ѹ҆́бѡ рекꙋ́тъ ва́мъ, сѐ въ пꙋсты́ни є҆́сть, не и҆зыди́те: сѐ въ сокро́вищахъ, не и҆ми́те вѣ́ры.

²⁷Ꙗ҆́коже бо мо́лнїѧ и҆схо́дитъ ѿ востѡ́къ и҆ ꙗ҆влѧ́етсѧ до за̑падъ: та́кѡ бꙋ́детъ прише́ствїе сн҃а человѣ́ческагѡ.

²⁸И҆дѣ́же бо а҆́ще бꙋ́детъ трꙋ́пъ, та́мѡ соберꙋ́тсѧ ѻ҆рлѝ.

²⁹А҆́бїе же по ско́рби дні́й тѣ́хъ со́лнце поме́ркнетъ, и҆ лꙋна̀ не да́стъ свѣ́та своегѡ̀, и҆ ѕвѣ́зды спа́днꙋтъ съ небесѐ, и҆ си̑лы небє́сныѧ подви́гнꙋтсѧ.

³⁰И҆ тогда̀ ꙗ҆ви́тсѧ зна́менїе сн҃а человѣ́ческагѡ на нб҃сѝ: и҆ тогда̀ воспла́чꙋтсѧ всѧ̀ колѣ́на земна̑ѧ, и҆ ѹ҆́зрѧтъ сн҃а человѣ́ческаго, грѧдꙋ́ща на ѻ҆́блацѣхъ небе́сныхъ съ си́лою и҆ сла́вою мно́гою.

³¹И҆ по́слетъ а҆́гг҃лы своѧ̀ съ трꙋ́бнымъ гла́сомъ ве́лїимъ, и҆ соберꙋ́тъ и҆збра̑нныѧ є҆гѡ̀ ѿ четы́рехъ вѣ̑тръ, ѿ конє́цъ нб҃съ до конє́цъ и҆́хъ.

³²Ѿ смоко́вницы же наꙋчи́тесѧ при́тчи: є҆гда̀ ѹ҆жѐ вѣ́їѧ є҆ѧ̀ бꙋ́дꙋтъ мла̑да и҆ ли́ствїе прозѧ́бнетъ, вѣ́дите, ꙗ҆́кѡ бли́зъ є҆́сть жа́тва.

³³Та́кѡ и҆ вы̀, є҆гда̀ ви́дите сїѧ̑ всѧ̑, вѣ́дите, ꙗ҆́кѡ бли́зъ є҆́сть при две́рехъ.

³⁴А҆ми́нь глаго́лю ва́мъ: не мимои́детъ ро́дъ се́й, до́ндеже всѧ̑ сїѧ̑ бꙋ́дꙋтъ.

³⁵Не́бо и҆ землѧ̀ мимои́детъ: словеса́ же моѧ̀ не мимои́дꙋтъ.

³⁶Ѡ҆ дни́ же то́мъ и҆ часѣ̀ никто́же вѣ́сть, ни а҆́гг҃ли нбⷭ҇нїи, то́кмѡ ѻ҆ц҃ъ мо́й є҆ди́нъ.

³⁷Ꙗ҆́коже бо бы́сть во днѝ нѡ́евы: та́кѡ бꙋ́детъ и҆ прише́ствїе сн҃а человѣ́ческагѡ.

³⁸Ꙗ҆́коже бо бѣ́хꙋ во днѝ пре́жде пото́па, ꙗ҆дꙋ́ще и҆ пїю́ще, женѧ́щесѧ и҆ посѧга́юще, до негѡ́же днѐ вни́де нѡ́е въ ковче́гъ:

³⁹И҆ не ѹ҆вѣ́дѣша, до́ндеже прїи́де вода̀, и҆ взѧ́тъ всѧ̑: та́кѡ бꙋ́детъ и҆ прише́ствїе сн҃а человѣ́ческагѡ.

⁴⁰Тогда̀ два̀ бꙋ́дета на селѣ̀: є҆ди́нъ пое́млетсѧ, а҆ дрꙋгі́й ѡ҆ставлѧ́етсѧ,

⁴¹Двѣ̀ ме́лющѣ въ же́рновахъ: є҆ди́на пое́млетсѧ, и҆ є҆ди́на ѡ҆ставлѧ́етсѧ.

⁴²Бди́те ѹ҆́бѡ, ꙗ҆́кѡ не вѣ́сте, въ кі́й ча́съ гдⷭ҇ь ва́шъ прїи́детъ.

⁴³Сїе́ же вѣ́дите, ꙗ҆́кѡ а҆́ще бы вѣ́далъ до́мꙋ влады́ка, въ кꙋ́ю стра́жꙋ та́ть прїи́детъ, бдѣ́лъ ѹ҆́бѡ бы, и҆ не бы̀ да́лъ подкопа́ти хра́ма своегѡ̀.

⁴⁴Сегѡ̀ ра́ди и҆ вы̀ бꙋ́дите гото́ви, ꙗ҆́кѡ во́ньже ча́съ не мнитѐ, сн҃ъ человѣ́ческїй прїи́детъ.

⁴⁵Кто̀ ѹ҆̀бо є҆́сть вѣ́рный ра́бъ и҆ мꙋ́дрый, є҆го́же поста́витъ гдⷭ҇и́нъ є҆гѡ̀ над̾ до́момъ свои́мъ, є҆́же даѧ́ти и҆̀мъ пи́щꙋ во вре́мѧ и҆́хъ;

⁴⁶Бл҃же́нъ ра́бъ то́й, є҆го́же прише́дъ гдⷭ҇и́нъ є҆гѡ̀ ѡ҆брѧ́щетъ та́кѡ творѧ́ща.

⁴⁷А҆ми́нь глаго́лю ва́мъ, ꙗ҆́кѡ над̾ всѣ́мъ и҆мѣ́нїемъ свои́мъ поста́витъ є҆го̀.

⁴⁸А҆́ще ли же рече́тъ ѕлы́й ра́бъ то́й въ се́рдцы свое́мъ, косни́тъ гдⷭ҇и́нъ мо́й прїитѝ:

⁴⁹И҆ на́чнетъ би́ти клевре́ты своѧ̀, ꙗ҆́сти же и҆ пи́ти съ пїѧ́ницами:

⁵⁰Прїи́детъ гдⷭ҇и́нъ раба̀ тогѡ̀ въ де́нь, во́ньже не ча́етъ, и҆ въ ча́съ, во́ньже не вѣ́сть.

⁵¹И҆ проте́шетъ є҆го̀ полма̀, и҆ ча́сть є҆гѡ̀ съ невѣ́рными положи́тъ: тꙋ̀ бꙋ́детъ пла́чь и҆ скре́жетъ зꙋбѡ́мъ.