Matthew 23

¹Тогда̀ і҆и҃съ глаго́ла къ наро́дѡмъ и҆ ѹ҆ченикѡ́мъ свои́мъ,

²Глаго́лѧ: на мѡѷсе́овѣ сѣда́лищи сѣдо́ша кни́жницы и҆ фарїсе́є.

³Всѧ̑ ѹ҆́бѡ, є҆ли̑ка а҆́ще рекꙋ́тъ ва́мъ блюстѝ, соблюда́йте и҆ твори́те: по дѣлѡ́мъ же и҆́хъ не твори́те, глаго́лютъ бо, и҆ не творѧ́тъ.

⁴Свѧзꙋ́ютъ бо бремена̀ тѧ́жка и҆ бѣ́днѣ носи̑ма, и҆ возлага́ютъ на плеща̀ чл҃вѣ́ческа, пе́рстомъ же свои́мъ не хотѧ́тъ дви́гнꙋти и҆̀хъ.

⁵Всѧ́ же дѣла̀ своѧ̀ творѧ́тъ, да ви́дими бꙋ́дꙋтъ человѣ́ки: разширѧ́ютъ же храни́лища своѧ̀, и҆ велича́ютъ воскри̑лїѧ ри́зъ свои́хъ.

⁶Лю́бѧтъ же преждевозлега̑нїѧ на ве́черѧхъ, и҆ преждесѣда̑нїѧ на со́нмищахъ,

⁷И҆ цѣлова̑нїѧ на то́ржищахъ, и҆ зва́тисѧ ѿ человѣ̑къ: ѹ҆чи́телю, ѹ҆чи́телю.

⁸Вы́ же не нарица́йтесѧ ѹ҆чи́тели: є҆ди́нъ бо є҆́сть ва́шъ ѹ҆чи́тель, хрⷭ҇то́съ, вси́ же вы̀ бра́тїѧ є҆стѐ.

⁹И҆ ѻ҆тца̀ не зови́те себѣ̀ на землѝ: є҆ди́нъ бо є҆́сть ѻ҆ц҃ъ ва́шъ, и҆́же на нб҃сѣ́хъ.

¹⁰Нижѐ нарица́йтесѧ наста̑вницы: є҆ди́нъ бо є҆́сть наста́вникъ ва́шъ хрⷭ҇то́съ.

¹¹Бо́лїй же въ ва́съ, да бꙋ́детъ ва́мъ слꙋга̀.

¹²И҆́же бо вознесе́тсѧ, смири́тсѧ: и҆ смирѧ́ѧйсѧ, вознесе́тсѧ.

¹³Го́ре же ва́мъ кни́жницы и҆ фарїсе́є лицемѣ́ри, ꙗ҆́кѡ снѣда́ете до́мы вдови́цъ, и҆ вино́ю дале́че моли̑твы творѧ́ще: сегѡ̀ ра́ди ли́шшее прїи́мете ѡ҆сꙋжде́нїе.

¹⁴Го́ре ва́мъ кни́жницы и҆ фарїсе́є лицемѣ́ри, ꙗ҆́кѡ затворѧ́ете црⷭ҇твїе нбⷭ҇ное пред̾ человѣ́ки: вы́ бо не вхо́дите, ни входѧ́щихъ ѡ҆ставлѧ́ете вни́ти.

¹⁵Го́ре ва́мъ кни́жницы и҆ фарїсе́є лицемѣ́ри, ꙗ҆́кѡ прехо́дите мо́ре и҆ сꙋ́шꙋ, сотвори́ти є҆ди́наго прише́льца: и҆ є҆гда̀ бꙋ́детъ, творитѐ є҆го̀ сы́на гее́нны сꙋгꙋ́бѣйша ва́съ.

¹⁶Го́ре ва́мъ вождѝ слѣпі́и, глаго́люще: и҆́же а҆́ще клене́тсѧ це́рковїю, ничесо́же є҆́сть: а҆ и҆́же клене́тсѧ зла́томъ церко́внымъ, до́лженъ є҆́сть.

¹⁷Бꙋ́и и҆ слѣпі́и, ко́е бо бо́ле є҆́сть; зла́то ли, и҆лѝ це́рковь свѧтѧ́щаѧ зла́то;

¹⁸И҆ и҆́же а҆́ще клене́тсѧ ѻ҆лтаре́мъ, ничесо́же є҆́сть: а҆ и҆́же клене́тсѧ да́ромъ, и҆́же верхꙋ̀ є҆гѡ̀, до́лженъ є҆́сть.

¹⁹Бꙋ́и и҆ слѣпі́и, что́ бо бо́ле; да́ръ ли, и҆лѝ ѻ҆лта́рь ст҃ѧ́й да́ръ;

²⁰И҆́же ѹ҆́бѡ клене́тсѧ ѻ҆лтаре́мъ, клене́тсѧ и҆́мъ, и҆ сꙋ́щимъ верхꙋ̀ є҆гѡ̀.

²¹И҆ и҆́же клене́тсѧ цр҃ковїю, клене́тсѧ є҆́ю, и҆ живꙋ́щимъ въ не́й.

²²И҆ клены́йсѧ небесе́мъ, клене́тсѧ прⷭ҇то́ломъ бж҃їимъ, и҆ сѣдѧ́щимъ на не́мъ.

²³Го́ре ва́мъ кни́жницы и҆ фарїсе́є лицемѣ́ри, ꙗ҆́кѡ ѡ҆десѧ́тствꙋете мѧ́твꙋ, и҆ ко́пръ, и҆ кѵ́мїнъ: и҆ ѡ҆ста́висте вѧ̑щшаѧ зако́нꙋ, сꙋ́дъ, и҆ ми́лость, и҆ вѣ́рꙋ. сїѧ̑ же подоба́ше твори́ти, и҆ ѻ҆́нѣхъ не ѡ҆ставлѧ́ти.

²⁴Вождѝ слѣпі́и, ѡ҆цѣжда́ющїи комары̀, вельблꙋ́ды же пожира́юще.

²⁵Го́ре ва́мъ кни́жницы и҆ фарїсе́є лицемѣ́ри, ꙗ҆́кѡ ѡ҆чища́ете внѣ́шнее стклѧ́ницы и҆ блю́да: внꙋтрью́дꙋ же сꙋ́ть по́лни хище́нїѧ и҆ непра́вды.

²⁶Фарїсе́е слѣпы́й, ѡ҆чи́сти пре́жде внꙋ́треннее стклѧ́ницы и҆ блю́да, да бꙋ́детъ и҆ внѣ́шнее и҆́ма чи́сто.

²⁷Го́ре ва́мъ кни́жницы и҆ фарїсе́є лицемѣ́ри, ꙗ҆́кѡ подо́битесѧ гробѡ́мъ пова́плєнымъ, и҆̀же внѣю́дꙋ ѹ҆́бѡ ꙗ҆влѧ́ютсѧ красны̀, внꙋтрью́дꙋ же по́лни сꙋ́ть косте́й ме́ртвыхъ, и҆ всѧ́кїѧ нечистоты̀.

²⁸Та́кѡ и҆ вы̀, внѣю́дꙋ ѹ҆́бѡ ꙗ҆влѧ́етесѧ чл҃вѣ́кѡмъ пра́ведни: внꙋтрью́дꙋ же є҆стѐ по́лни лицемѣ́рїѧ и҆ беззако́нїѧ.

²⁹Го́ре ва́мъ кни́жницы и҆ фарїсе́є лицемѣ́ри, ꙗ҆́кѡ зи́ждете гро́бы проро́чєскїѧ, и҆ кра́сите ра̑ки пра́ведныхъ,

³⁰И҆ глаго́лете: а҆́ще бы́хомъ бы́ли во днѝ ѻ҆тє́цъ на́шихъ, не бы́хомъ ѹ҆́бѡ ѻ҆́бщницы и҆̀мъ бы́ли въ кро́ви прорѡ́къ.

³¹Тѣ́мже са́ми свидѣ́тельствꙋете себѣ̀, ꙗ҆́кѡ сы́нове є҆стѐ и҆зби́вшихъ проро́ки.

³²И҆ вы̀ и҆спо́лните мѣ́рꙋ ѻ҆тє́цъ ва́шихъ.

³³Ѕмїѧ̑, порождє́нїѧ є҆хі́днова, ка́кѡ ѹ҆бѣжитѐ ѿ сꙋда̀ ѻ҆гнѧ̀ гее́нскагѡ;

³⁴Сегѡ̀ ра́ди сѐ а҆́зъ послю̀ къ ва́мъ проро́ки, и҆ премꙋ́дры, и҆ кни́жники: и҆ ѿ ни́хъ ѹ҆бїе́те и҆ ра́спнете, и҆ ѿ ни́хъ бїе́те на со́нмищахъ ва́шихъ, и҆ и҆зжене́те ѿ гра́да во гра́дъ.

³⁵Ꙗ҆́кѡ да прїи́детъ на вы̀ всѧ́ка кро́вь пра́ведна, пролива́емаѧ на землѝ, ѿ кро́ве а҆́велѧ пра́веднагѡ, до кро́ве заха́рїи сы́на варахі́ина, є҆го́же ѹ҆би́сте междꙋ̀ це́рковїю и҆ ѻ҆лтаре́мъ.

³⁶А҆ми́нь глаго́лю ва́мъ: ꙗ҆́кѡ прїи́дꙋтъ всѧ̑ сїѧ̑ на ро́дъ се́й.

³⁷І҆ерꙋсали́ме, і҆ерꙋсали́ме и҆зби́вый проро́ки, и҆ ка́менїемъ побива́ѧй пѡ́сланныѧ къ немꙋ̀, колькра́ты восхотѣ́хъ собра́ти ча̑да твоѧ̀, ꙗ҆́коже собира́етъ ко́кошъ птенцы̀ своѧ̀ под̾ крилѣ̀, и҆ не восхотѣ́сте!

³⁸Сѐ ѡ҆ставлѧ́етсѧ ва́мъ до́мъ ва́шъ пꙋ́стъ.

³⁹Глаго́лю бо ва́мъ, ꙗ҆́кѡ не и҆́мате менѐ ви́дѣти ѿсе́лѣ, до́ндеже рече́те: бл҃гослове́нъ грѧды́й во и҆́мѧ гдⷭ҇не.