Matthew 22

¹И҆ ѿвѣща́въ і҆и҃съ, па́ки речѐ и҆̀мъ въ при́тчахъ, глаго́лѧ:

²Ѹ҆подо́бисѧ црⷭ҇твїе нбⷭ҇ное чл҃вѣ́кꙋ цр҃ю̀, и҆́же сотворѝ бра́ки сн҃ꙋ своемꙋ̀.

³И҆ посла̀ рабы̑ своѧ̀, призва́ти зва̑нныѧ на бра́ки: и҆ не хотѧ́хꙋ прїитѝ.

⁴Па́ки посла̀ и҆́ны рабы̑, глаго́лѧ: рцы́те зва̑ннымъ, сѐ ѡ҆бѣ́дъ мо́й ѹ҆гото́вахъ, ю҆нцы̀ моѝ и҆ ѹ҆пита̑ннаѧ и҆сколє́на, и҆ всѧ̀ готѡ́ва: прїиди́те на бра́ки.

⁵Ѻ҆ни́ же небре́гше ѿидо́ша, ѻ҆́въ ѹ҆́бѡ на село̀ своѐ, ѻ҆́въ же на кꙋ̑пли своѧ̀.

⁶Про́чїи же є҆́мше рабы̑ є҆гѡ̀, досади́ша и҆̀мъ, и҆ ѹ҆би́ша и҆̀хъ.

⁷И҆ слы́шавъ ца́рь то́й разгнѣ́васѧ, и҆ посла́въ вѡ́ѧ своѧ̀, и҆ погꙋбѝ ѹ҆бі́йцы ѻ҆́ны, и҆ гра́дъ и҆́хъ зажжѐ.

⁸Тогда̀ глаго́ла рабѡ́мъ свои́мъ: бра́къ ѹ҆́бѡ гото́въ є҆́сть, зва́ннїи же не бы́ша досто́йни.

⁹И҆ди́те ѹ҆́бѡ на и҆схѡ́дища пꙋте́й, и҆ є҆ли́цѣхъ а҆́ще ѡ҆брѧ́щете, призови́те на бра́ки.

¹⁰И҆ и҆зше́дше рабѝ ѻ҆́ни на распꙋ́тїѧ, собра́ша всѣ́хъ є҆ли́цѣхъ ѡ҆брѣто́ша, ѕлы̑ѧ же и҆ дѡ́брыѧ: и҆ и҆спо́лнисѧ бра́къ возлежа́щихъ.

¹¹Вше́дъ же цр҃ь ви́дѣти возлежа́щихъ, ви́дѣ тꙋ̀ человѣ́ка не ѡ҆болче́на во ѡ҆дѣѧ́нїе бра́чное:

¹²И҆ глаго́ла є҆мꙋ̀: дрꙋ́же, ка́кѡ вше́лъ є҆сѝ сѣ́мѡ, не и҆мы́й ѡ҆дѣѧ́нїѧ бра́чна; ѻ҆́нъ же ѹ҆молча̀.

¹³Тогда̀ речѐ цр҃ь слꙋга́мъ: свѧза́вше є҆мꙋ̀ рꙋ́цѣ и҆ но́зѣ, воз̾ми́те є҆го̀, и҆ вве́рзите во тмꙋ̀ кромѣ́шнюю: тꙋ̀ бꙋ́детъ пла́чь и҆ скре́жетъ зꙋбѡ́мъ.

¹⁴Мно́зи бо сꙋ́ть зва́ни, ма́лѡ же и҆збра́нныхъ.

¹⁵Тогда̀ ше́дше фарїсе́є, совѣ́тъ прїе́мше, ꙗ҆́кѡ да ѡ҆больстѧ́тъ є҆го̀ сло́вомъ.

¹⁶И҆ посыла́ютъ къ немꙋ̀ ѹ҆чн҃кѝ своѧ̀ съ и҆рѡдїа́ны, глаго́люще: ѹ҆чи́телю, вѣ́мы, ꙗ҆́кѡ и҆́стиненъ є҆сѝ, и҆ пꙋтѝ бж҃їю вои́стиннꙋ ѹ҆чи́ши, и҆ неради́ши ни ѡ҆ ко́мже: не зри́ши бо на лицѐ чл҃вѣ́кѡмъ.

¹⁷Рцы̀ ѹ҆́бѡ на́мъ, что́ ти сѧ мни́тъ; досто́йно ли є҆́сть да́ти кинсо́нъ ке́сареви, и҆лѝ нѝ;

¹⁸Разꙋмѣ́въ же і҆и҃съ лꙋка́вство и҆́хъ, речѐ: что́ мѧ и҆скꙋша́ете лицемѣ́ри;

¹⁹Покажи́те мѝ злати́цꙋ кинсо́ннꙋю. ѻ҆ни́ же принесо́ша є҆мꙋ̀ пѣ́нѧзь.

²⁰И҆ глаго́ла и҆̀мъ: чі́й ѻ҆́бразъ се́й и҆ написа́нїе;

²¹И҆ глаго́лаша є҆мꙋ̀: ке́саревъ. тогда̀ глаго́ла и҆̀мъ: воздади́те ѹ҆́бѡ ке́сарєва ке́сареви, и҆ бж҃їѧ бг҃ови.

²²И҆ слы́шавше диви́шасѧ: и҆ ѡ҆ста́вльше є҆го̀ ѿидо́ша.

²³Въ то́й де́нь пристꙋпи́ша къ немꙋ̀ саддꙋке́є, и҆̀же глаго́лютъ не бы́ти воскресе́нїю, и҆ вопроси́ша є҆го̀,

²⁴Глаго́люще: ѹ҆чи́телю, мѡѷсе́й речѐ: а҆́ще кто̀ ѹ҆́мретъ не и҆мы́й ча̑дъ, да по́йметъ бра́тъ є҆гѡ̀ женꙋ̀ є҆гѡ̀, и҆ воскреси́тъ сѣ́мѧ бра́та своегѡ̀.

²⁵Бѣ́ша же въ на́съ се́дмь бра́тїѧ, и҆ пе́рвый ѡ҆же́ньсѧ ѹ҆́мре: и҆ не и҆мы́й сѣ́мене, ѡ҆ста́ви женꙋ̀ свою̀ бра́тꙋ своемꙋ̀.

²⁶Та́кожде же и҆ вторы́й, и҆ тре́тїй, да́же до седма́гѡ.

²⁷Послѣди́ же всѣ́хъ ѹ҆́мре и҆ жена̀.

²⁸Въ воскреше́нїе ѹ҆́бѡ, кото́рагѡ ѿ седми́хъ бꙋ́детъ жена̀; вси́ бо и҆мѣ́ша ю҆̀.

²⁹Ѿвѣща́въ же і҆и҃съ речѐ и҆̀мъ: прельща́етесѧ, не вѣ́дꙋще писа́нїѧ, ни си́лы бж҃їѧ.

³⁰Въ воскресе́нїе бо ни же́нѧтсѧ, ни посѧга́ютъ: но ꙗ҆́кѡ а҆́гг҃ли бж҃їи на нб҃сѝ сꙋ́ть.

³¹Ѡ҆ воскресе́нїи же ме́ртвыхъ нѣ́сте ли члѝ рече́ннагѡ ва́мъ бг҃омъ, глаго́лющимъ:

³²А҆́зъ є҆́смь бг҃ъ а҆враа́мовъ, и҆ бг҃ъ і҆саа́ковъ, и҆ бг҃ъ і҆а́кѡвль, нѣ́сть бг҃ъ, бг҃ъ ме́ртвыхъ, но бг҃ъ живы́хъ;

³³И҆ слы́шавше наро́ди, дивлѧ́хꙋсѧ ѡ҆ ѹ҆че́нїи є҆гѡ̀.

³⁴Фарїсе́є же слы́шавше, ꙗ҆́кѡ посрамѝ саддꙋке́и, собра́шасѧ вкꙋ́пѣ.

³⁵И҆ вопросѝ є҆ди́нъ ѿ ни́хъ законоꙋчи́тель, и҆скꙋша́ѧ є҆го̀, и҆ глаго́лѧ:

³⁶Ѹ҆чи́телю, ка́ѧ за́повѣдь бо́льши є҆́сть въ зако́нѣ;

³⁷І҆и҃съ же речѐ є҆мꙋ̀: возлю́биши гдⷭ҇а бг҃а твоего̀ всѣ́мъ се́рдцемъ твои́мъ, и҆ все́ю дꙋше́ю твое́ю, и҆ все́ю мы́слїю твое́ю.

³⁸Сїѧ̀ є҆́сть пе́рваѧ и҆ бо́льшаѧ за́повѣдь.

³⁹Втора́ѧ же подо́бна є҆́й: возлю́биши и҆́скреннѧго твоего̀, ꙗ҆́кѡ са́мъ себѐ.

⁴⁰Въ сїю̀ ѻ҆бою̀ за́повѣдїю ве́сь зако́нъ и҆ проро́цы ви́сѧтъ.

⁴¹Со́бранѡмъ же фарїсе́ѡмъ, вопросѝ и҆̀хъ і҆и҃съ,

⁴²Глаго́лѧ: что́ сѧ ва́мъ мни́тъ ѡ҆ хрⷭ҇тѣ̀, чі́й є҆́сть сн҃ъ; глаго́лаша є҆мꙋ̀: дв҃довъ.

⁴³Глаго́ла и҆̀мъ: ка́кѡ ѹ҆́бѡ дв҃дъ дх҃омъ гдⷭ҇а є҆го̀ нарица́етъ, глаго́лѧ:

⁴⁴Речѐ гдⷭ҇ь гдⷭ҇еви моемꙋ̀, сѣдѝ ѡ҆деснꙋ́ю менѐ, до́ндеже положꙋ̀ врагѝ твоѧ̀ подно́жїе нога́ма твои́ма.

⁴⁵А҆́ще ѹ҆́бѡ дв҃дъ нарица́етъ є҆го̀ гдⷭ҇а, ка́кѡ сн҃ъ є҆мꙋ̀ є҆́сть;

⁴⁶И҆ никто́же можа́ше ѿвѣща́ти є҆мꙋ̀ словесѐ: нижѐ смѣ́ѧ кто̀ ѿ тогѡ̀ днѐ вопроси́ти є҆го̀ ктомꙋ̀.