Matthew 21

¹И҆ є҆гда̀ прибли́жишасѧ во і҆ерꙋсали́мъ, и҆ прїидо́ша въ виѳсфагі́ю къ горѣ̀ є҆леѡ́нстѣй: тогда̀ і҆и҃съ посла̀ два̀ ѹ҆ченика̀,

²Глаго́лѧ и҆́ма: и҆ди́та въ ве́сь ꙗ҆́же прѧ́мѡ ва́ма, и҆ а҆́бїе ѡ҆брѧ́щета ѻ҆слѧ̀ привѧ́зано, и҆ жребѧ̀ съ ни́мъ: ѿрѣши́вша приведи́та мѝ.

³И҆ а҆́ще ва́ма кто̀ рече́тъ что̀, рече́та, ꙗ҆́кѡ гдⷭ҇ь є҆ю̀ тре́бꙋетъ: а҆́бїе же по́слетъ ѧ҆̀.

⁴Сїе́ же всѐ бы́сть, да сбꙋ́детсѧ рече́нное проро́комъ, глаго́лющимъ:

⁵Рцы́те дще́ри сїѡ́новѣ, сѐ цр҃ь тво́й грѧде́тъ тебѣ̀ кро́токъ, и҆ всѣ́дъ на ѻ҆слѧ̀ и҆ жребѧ̀, сы́на под̾ѧре́мнича.

⁶Ше́дша же ѹ҆ченика̀, и҆ сотво́рша, ꙗ҆́коже повелѣ̀ и҆́ма і҆и҃съ,

⁷Приведо́ста ѻ҆слѧ̀ и҆ жребѧ̀, и҆ возложи́ша верхꙋ̀ є҆ю̀ ри̑зы своѧ̀, и҆ всѣ́де верхꙋ̀ и҆́хъ.

⁸Мно́жайшїи же наро́ди постила́хꙋ ри̑зы своѧ̀ по пꙋтѝ: дрꙋзі́и же рѣ́захꙋ вѣ̑тви ѿ дре́въ, и҆ постила́хꙋ по пꙋтѝ.

⁹Наро́ди же предходѧ́щїи (є҆мꙋ̀) и҆ вслѣ́дствꙋющїи, зва́хꙋ глаго́люще: ѡ҆са́нна сн҃ꙋ дв҃довꙋ, бл҃гослове́нъ грѧды́й во и҆́мѧ гдⷭ҇не: ѡ҆са́нна въ вы́шнихъ.

¹⁰И҆ вше́дшꙋ є҆мꙋ̀ во і҆ерⷭ҇ли́мъ, потрѧсе́сѧ ве́сь гра́дъ, глаго́лѧ: кто́ є҆сть се́й;

¹¹Наро́ди же глаго́лахꙋ: се́й є҆́сть і҆и҃съ проро́къ, и҆́же ѿ назаре́та галїле́йска.

¹²И҆ вни́де і҆и҃съ въ цр҃ковь бж҃їю, и҆ и҆згна̀ всѧ̑ продаю́щыѧ, и҆ кꙋпꙋ́ющыѧ въ це́ркви, и҆ трапє́зы торжникѡ́мъ и҆спрове́рже, и҆ сѣда̑лища продаю́щихъ го́лꙋби.

¹³И҆ глаго́ла и҆̀мъ: пи́сано є҆́сть, хра́мъ мо́й, хра́мъ моли́твы нарече́тсѧ: вы́ же сотвори́сте и҆̀ верте́пъ разбо́йникѡмъ. И҆ пристꙋпи́ша къ немꙋ̀ хро́мїи и҆ слѣпі́и въ цр҃кви: и҆ и҆сцѣлѝ и҆̀хъ.

¹⁵Ви́дѣвше же а҆рхїере́є и҆ кни́жницы чꙋдеса̀ ꙗ҆̀же сотворѝ, и҆ ѻ҆́троки зовꙋ́щѧ въ цр҃кви, и҆ глаго́лющѧ: ѡ҆са́нна сн҃ꙋ дв҃довꙋ, негодова́ша.

¹⁶И҆ рѣ́ша є҆мꙋ̀: слы́шиши ли, что̀ сі́и глаго́лютъ; і҆и҃съ же речѐ и҆̀мъ: є҆́й. нѣ́сте ли члѝ николи́же, ꙗ҆́кѡ и҆зоꙋ́стъ младе́нєцъ и҆ ссꙋ́щихъ сверши́лъ є҆сѝ хвалꙋ̀;

¹⁷И҆ ѡ҆ста́вль и҆̀хъ, и҆зы́де во́нъ и҆з̾ гра́да въ виѳа́нїю, и҆ водвори́сѧ тꙋ̀.

¹⁸Ѹ҆́трꙋ же возвра́щсѧ во гра́дъ, взалка̀.

¹⁹И҆ ѹ҆зрѣ́въ смоко́вницꙋ є҆ди́нꙋ при пꙋтѝ, прїи́де къ не́й, и҆ ничто́же ѡ҆брѣ́те на не́й, то́кмѡ ли́ствїе є҆ди́но, и҆ глаго́ла є҆́й: да николи́же ѿ тебѐ плода̀ бꙋ́детъ во вѣ́ки. и҆ а҆́бїе и҆́зсше смоко́вница.

²⁰И҆ ви́дѣвше ѹ҆ч҃нцы̀ диви́шасѧ, глаго́люще: ка́кѡ а҆́бїе и҆́зсше смоко́вница;

²¹Ѿвѣща́въ же і҆и҃съ речѐ и҆̀мъ: а҆ми́нь глаго́лю ва́мъ: а҆́ще и҆́мате вѣ́рꙋ, и҆ не ѹ҆сꙋмните́сѧ, не то́кмѡ смоко́вничное сотворитѐ: но а҆́ще и҆ горѣ̀ се́й рече́те: дви́гнисѧ и҆ ве́рзисѧ въ мо́ре, бꙋ́детъ.

²²И҆ всѧ̑, є҆ли̑ка а҆́ще воспро́сите въ моли́твѣ вѣ́рꙋюще, прїи́мете.

²³И҆ прише́дшꙋ є҆мꙋ̀ въ це́рковь, пристꙋпи́ша къ немꙋ̀ ѹ҆ча́щꙋ а҆рхїере́є и҆ ста́рцы людсті́и, глаго́люще: ко́ею вла́стїю сїѧ̑ твори́ши; и҆ кто́ ти дадѐ вла́сть сїю̀;

²⁴Ѿвѣща́въ же і҆и҃съ, речѐ и҆̀мъ: вопрошꙋ̀ вы̀ и҆ а҆́зъ сло́во є҆ди́но, є҆́же а҆́ще рече́те мнѣ̀, и҆ а҆́зъ ва́мъ рекꙋ̀, ко́ею вла́стїю сїѧ̑ творю̀.

²⁵Креще́нїе і҆ѡа́нново ѿкꙋ́дꙋ бѣ̀: съ небесе́ ли, и҆лѝ ѿ человѣ̑къ; ѻ҆ни́ же помышлѧ́хꙋ въ себѣ̀, глаго́люще: а҆́ще рече́мъ, съ небесѐ: рече́тъ на́мъ, почто̀ ѹ҆́бѡ не вѣ́ровасте є҆мꙋ̀;

²⁶А҆́ще ли рече́мъ, ѿ человѣ̑къ: бои́мсѧ наро́да, вси́ бо и҆́мꙋтъ і҆ѡа́нна ꙗ҆́кѡ проро́ка.

²⁷И҆ ѿвѣща́вше і҆и҃сови рѣ́ша: не вѣ́мы. речѐ и҆̀мъ и҆ то́й: ни а҆́зъ ва́мъ глаго́лю, ко́ею вла́стїю сїѧ̑ творю̀.

²⁸Что́ же сѧ ва́мъ мни́тъ; человѣ́къ нѣ́кїй и҆мѧ́ше два̀ сы́на, и҆ прише́дъ къ пе́рвомꙋ речѐ: ча́до, и҆дѝ дне́сь дѣ́лай въ вїногра́дѣ мое́мъ.

²⁹Ѻ҆́нъ же ѿвѣща́въ речѐ: не хощꙋ̀. послѣди́ же раска́ѧвсѧ и҆́де.

³⁰И҆ пристꙋ́пль къ дрꙋго́мꙋ, речѐ та́коже. ѻ҆́нъ же ѿвѣща́въ речѐ: а҆́зъ гдⷭ҇и и҆дꙋ̀. и҆ не и҆́де.

³¹Кі́й ѿ ѻ҆бою̀ сотворѝ во́лю ѻ҆́ч҃ꙋ! глаго́лаша є҆мꙋ̀: пе́рвый. глаго́ла и҆̀мъ і҆и҃съ: а҆ми́нь глаго́лю ва́мъ, ꙗ҆́кѡ мытарѝ, и҆ любодѣ́йцы варѧ́ютъ вы̀ въ црⷭ҇твїи бж҃їи.

³²Прїи́де бо къ ва́мъ і҆ѡа́ннъ крести́тель пꙋте́мъ пра́веднымъ, и҆ не вѣ́ровасте є҆мꙋ̀: мытари́ же и҆ любодѣ́йцы вѣ́роваша є҆мꙋ̀. вы́ же ви́дѣвше не раска́ѧстесѧ послѣдѝ, вѣ́ровати є҆мꙋ̀.

³³И҆́нꙋ при́тчꙋ слы́шите: человѣ́къ нѣ́кїй бѣ̀ домови́тъ, и҆́же насадѝ вїногра́дъ, и҆ ѡ҆пло́томъ ѡ҆градѝ є҆го̀, и҆ и҆скопа̀ въ не́мъ точи́ло, и҆ созда̀ сто́лпъ, и҆ вда́стъ и҆̀ дѣ́лателємъ: и҆ ѿи́де.

³⁴Є҆гда́ же прибли́жисѧ вре́мѧ плодѡ́въ, посла̀ рабы̑ своѧ̀ къ дѣ́лателємъ, прїѧ́ти плоды̀ є҆гѡ̀.

³⁵И҆ є҆́мше дѣ́лателє рабы̑ є҆гѡ̀, ѻ҆́ваго ѹ҆́бѡ би́ша, ѻ҆́ваго же ѹ҆би́ша, ѻ҆́ваго же ка́менїемъ поби́ша.

³⁶Па́ки посла̀ и҆́ны рабы̑ мно́жайшѧ пе́рвыхъ: и҆ сотвори́ша и҆̀мъ та́коже.

³⁷Послѣди́ же посла̀ къ ни́мъ сн҃а своего̀, глаго́лѧ: ѹ҆срамѧ́тсѧ сн҃а моегѡ̀.

³⁸Дѣ́лателє же ви́дѣвше сн҃а, рѣ́ша въ себѣ̀: се́й є҆́сть наслѣ́дникъ, прїиди́те, ѹ҆бїе́мъ є҆го̀, и҆ ѹ҆держи́мъ достоѧ́нїе є҆гѡ̀.

³⁹И҆ є҆́мше є҆го̀, и҆зведо́ша во́нъ и҆з̾ вїногра́да, и҆ ѹ҆би́ша.

⁴⁰Є҆гда̀ ѹ҆́бѡ прїи́детъ гдⷭ҇и́нъ вїногра́да, что̀ сотвори́тъ дѣ́лателємъ тѣ́мъ;

⁴¹Глаго́лаша є҆мꙋ̀: ѕлы́хъ ѕлѣ̀ погꙋби́тъ и҆̀хъ, и҆ вїногра́дъ преда́стъ и҆ны́мъ дѣ́лателємъ, и҆̀же воздадѧ́тъ є҆мꙋ̀ плоды̀ во времена̀ своѧ̀.

⁴²Глаго́ла и҆̀мъ і҆и҃съ: нѣ́сте ли члѝ николи́же въ писа́нїихъ: ка́мень, є҆го́же не въ рѧдꙋ̀ сотвори́ша зи́ждꙋщїи, се́й бы́сть во главꙋ̀ ѹ҆́гла, ѿ гдⷭ҇а бы́сть се́й, и҆ є҆́сть ди́вна во ѻ҆́чїю ва́шєю.

⁴³Сегѡ̀ ра́ди глаго́лю ва́мъ, ꙗ҆́кѡ ѿи́метсѧ ѿ ва́съ црⷭ҇твїе бж҃їе, и҆ да́стсѧ ꙗ҆зы́кꙋ творѧ́щемꙋ плоды̀ є҆гѡ̀.

⁴⁴И҆ пады́й на ка́мени се́мъ, сокрꙋши́тсѧ: а҆ на не́мже паде́тъ, сотры́етъ и҆̀.

⁴⁵И҆ слы́шавше а҆рхїере́є и҆ фарїсе́є при̑тчи є҆гѡ̀, разꙋмѣ́ша, ꙗ҆́кѡ ѡ҆ ни́хъ глаго́летъ.

⁴⁶И҆ и҆́щꙋще є҆го̀ ꙗ҆́ти, ѹ҆боѧ́шасѧ наро́да: поне́же ꙗ҆́кѡ проро́ка є҆го̀ и҆мѣ́ѧхꙋ.