Matthew 20

¹Подо́бно бо є҆́сть црⷭ҇твїе нбⷭ҇ное человѣ́кꙋ домови́тꙋ, и҆́же и҆зы́де кꙋ́пнѡ ѹ҆́трѡ наѧ́ти дѣ́латели въ вїногра́дъ сво́й.

²И҆ совѣща́въ съ дѣ́латели по пѣ́нѧзю на де́нь, посла̀ и҆̀хъ въ вїногра́дъ сво́й.

³И҆ и҆зше́дъ въ тре́тїй ча́съ, ви́дѣ и҆́ны стоѧ́щѧ на то́ржищи пра́здны.

⁴И҆ тѣ́мъ речѐ: и҆ди́те и҆ вы̀ въ вїногра́дъ мо́й, и҆ є҆́же бꙋ́детъ пра́вда, да́мъ ва́мъ. ѻ҆ни́ же и҆до́ша.

⁵Па́ки же и҆зше́дъ въ шесты́й, и҆ девѧ́тый ча́съ, сотворѝ та́коже.

⁶Во є҆ди́ный же на́десѧть ча́съ и҆зше́дъ, ѡ҆брѣ́те дрꙋгі̑ѧ стоѧ́щѧ пра́здны, и҆ глаго́ла и҆̀мъ: что̀ здѣ̀ стоитѐ ве́сь де́нь пра́здны;

⁷Глаго́лаша є҆мꙋ̀, ꙗ҆́кѡ никто́же на́съ наѧ́тъ. и҆ глаго́ла и҆̀мъ: и҆ди́те и҆ вы̀ въ вїногра́дъ (мо́й), и҆ є҆́же бꙋ́детъ пра́ведно, прїи́мете.

⁸Ве́черꙋ же бы́вшꙋ, глаго́ла гдⷭ҇и́нъ вїногра́да къ приста́вникꙋ своемꙋ̀: призовѝ дѣ́латели, и҆ да́ждь и҆̀мъ мздꙋ̀, наче́нъ ѿ послѣ́днихъ до пе́рвыхъ.

⁹И҆ прише́дше и҆̀же во є҆диныйна́десѧть ча́съ, прїѧ́ша по пѣ́нѧзю.

¹⁰Прише́дше же пе́рвїи мнѧ́хꙋ вѧ́щше прїѧ́ти: и҆ прїѧ́ша и҆ ті́и по пѣ́нѧзю.

¹¹Прїе́мше же ропта́хꙋ на гдⷭ҇и́на,

¹²Глаго́люще: ꙗ҆́кѡ сі́и послѣ́днїи є҆ди́нъ ча́съ сотвори́ша, и҆ ра́вны на́мъ сотвори́лъ и҆̀хъ є҆сѝ, поне́сшымъ тѧготꙋ̀ днѐ, и҆ ва́ръ.

¹³Ѻ҆́нъ же ѿвѣща́въ речѐ є҆ди́номꙋ и҆́хъ: дрꙋ́же, не ѡ҆би́жꙋ тебѐ: не по пѣ́нѧзю ли совѣща̀ со мно́ю;

¹⁴Воз̾мѝ твоѐ, и҆ и҆дѝ: хощꙋ́ же и҆ семꙋ̀ послѣ́днемꙋ да́ти ꙗ҆́коже и҆ тебѣ̀.

¹⁵И҆лѝ нѣ́сть мѝ лѣ́ть сотвори́ти є҆́же хощꙋ̀ во свои́хъ мѝ; а҆́ще ѻ҆́ко твоѐ лꙋка́во є҆́сть, ꙗ҆́кѡ а҆́зъ бл҃гъ є҆́смь;

¹⁶Та́кѡ бꙋ́дꙋтъ послѣ́днїи, пе́рви: и҆ пе́рвїи, послѣ́дни: мно́зи бо сꙋ́ть зва́ни, ма́лѡ же и҆збра́нныхъ.

¹⁷И҆ восходѧ̀ і҆и҃съ во і҆ерⷭ҇ли́мъ, поѧ́тъ ѻ҆бана́десѧть ѹ҆ченика̀ є҆ди́ны на пꙋ́ть, и҆ речѐ и҆̀мъ:

¹⁸Сѐ восхо́димъ во і҆ерⷭ҇ли́мъ, и҆ сн҃ъ человѣ́ческїй пре́данъ бꙋ́детъ а҆рхїере́ємъ, и҆ кни́жникѡмъ, и҆ ѡ҆сꙋ́дѧтъ є҆го̀ на сме́рть:

¹⁹И҆ предадѧ́тъ є҆го̀ ꙗ҆зы́кѡмъ на порꙋга́нїе и҆ бїе́нїе и҆ пропѧ́тїе, и҆ въ тре́тїй де́нь воскре́снетъ.

²⁰Тогда̀ пристꙋпѝ къ немꙋ̀ мт҃и сы́нꙋ зеведе́ѡвꙋ съ сыно́ма свои́ма, кла́нѧющисѧ и҆ просѧ́щи нѣ́что ѿ негѡ̀.

²¹Ѻ҆́нъ же речѐ є҆́й: чесѡ̀ хо́щеши; глаго́ла є҆мꙋ̀: рцы̀, да сѧ́дета сїѧ̀ ѻ҆́ба сы́на моѧ̀, є҆ди́нъ ѡ҆деснꙋ́ю тебѐ, и҆ є҆ди́нъ ѡ҆шꙋ́юю тебѐ во црⷭ҇твїи твое́мъ.

²²Ѿвѣща́въ же і҆и҃съ, речѐ: не вѣ́стасѧ чесѡ̀ про́сита. мо́жета ли пи́ти ча́шꙋ, ю҆́же а҆́зъ и҆́мамъ пи́ти; и҆лѝ креще́нїемъ, и҆́мже а҆́зъ креща́юсѧ, крⷭ҇ти́тисѧ; глаго́ласта є҆мꙋ̀: мо́жева.

²³И҆ глаго́ла и҆́ма: ча́шꙋ ѹ҆́бѡ мою̀ и҆спїе́та, и҆ креще́нїемъ, и҆́мже а҆́зъ креща́юсѧ, крⷭ҇ти́тасѧ: а҆ є҆́же сѣ́сти ѡ҆деснꙋ́ю менѐ, и҆ ѡ҆шꙋ́юю менѐ, нѣ́сть моѐ да́ти, но и҆́мже ѹ҆гото́васѧ ѿ ѻ҆ц҃а̀ моегѡ̀.

²⁴И҆ слы́шавше де́сѧть негодова́ша ѡ҆ ѻ҆бою̀ бра́тꙋ.

²⁵І҆и҃съ же призва́въ и҆̀хъ, речѐ: вѣ́сте, ꙗ҆́кѡ кнѧ́зи ꙗ҆зы̑къ госпо́дствꙋютъ и҆́ми, и҆ вели́цыи ѡ҆блада́ютъ и҆́ми.

²⁶Не та́кѡ же бꙋ́детъ въ ва́съ: но и҆́же а҆́ще хо́щетъ въ ва́съ вѧ́щшїй бы́ти, да бꙋ́детъ ва́мъ слꙋга̀.

²⁷И҆ и҆́же а҆́ще хо́щетъ въ ва́съ бы́ти пе́рвый, бꙋ́ди ва́мъ ра́бъ.

²⁸Ꙗ҆́коже сн҃ъ чл҃вѣ́ческїй не прїи́де да послꙋ́жатъ є҆мꙋ̀, но послꙋжи́ти, и҆ да́ти дꙋ́шꙋ свою̀ и҆збавле́нїе за мно́гихъ.

²⁹И҆ и҆сходѧ́щꙋ є҆мꙋ̀ ѿ і҆ерїхѡ́на, по не́мъ и҆́де наро́дъ мно́гъ.

³⁰И҆ сѐ два̀ слѣпца̀ сѣдѧ́ща при пꙋтѝ, слы́шавша, ꙗ҆́кѡ і҆и҃съ мимохо́дитъ, возопи́ста глаго́люща: поми́лꙋй ны̀ гдⷭ҇и, сн҃е дв҃довъ.

³¹Наро́дъ же запретѝ и҆́ма да ѹ҆молчи́та. ѻ҆́на же па́че вопїѧ́ста, глаго́люща: поми́лꙋй ны̀ гдⷭ҇и, сн҃е дв҃довъ.

³²И҆ воста́въ і҆и҃съ возгласѝ ѧ҆̀, и҆ речѐ: что̀ хо́щета да сотворю̀ ва́ма;

³³Глаго́ласта є҆мꙋ̀: гдⷭ҇и, да ѿве́рзетѣсѧ ѻ҆́чи на́ю.

³⁴Милосе́рдовавъ же і҆и҃съ, прикоснꙋ́сѧ ѻ҆́чїю и҆́ма: и҆ а҆́бїе прозрѣ́ста и҆́ма ѻ҆́чи, и҆ по не́мъ и҆до́ста.