Matthew 15

¹Тогда̀ пристꙋпи́ша ко і҆и҃сови, и҆̀же ѿ і҆ерꙋсали́ма кни́жницы и҆ фарїсе́є, глаго́люще:

²Почто̀ ѹ҆ченицы̀ твоѝ престꙋпа́ютъ преда́нїе ста́рєцъ; не ѹ҆мыва́ютъ бо рꙋ́къ свои́хъ, є҆гда̀ хлѣ́бъ ꙗ҆дѧ́тъ.

³Ѻ҆́нъ же ѿвѣща́въ речѐ и҆̀мъ: почто̀ и҆ вы̀ престꙋпа́ете за́повѣдь бж҃їю за преда́нїе ва́ше;

⁴Бг҃ъ бо заповѣ́да, глаго́лѧ: чтѝ ѻ҆тца̀ и҆ ма́терь: и҆ и҆́же ѕлосло́витъ ѻ҆тца̀ и҆лѝ ма́терь, сме́ртїю да ѹ҆́мретъ.

⁵Вы́ же глаго́лете: и҆́же а҆́ще рече́тъ ѻ҆тцꙋ̀, и҆лѝ ма́тери: да́ръ, є҆́же а҆́ще ѿ менѐ по́льзовалсѧ є҆сѝ.

⁶И҆ да не почти́тъ ѻ҆тца̀ своегѡ̀, и҆лѝ ма́тере (своеѧ̀): и҆ разори́сте за́повѣдь бж҃їю за преда́нїе ва́ше.

⁷Лицемѣ́ри, до́брѣ проро́чествова ѡ҆ ва́съ и҆са́їа, глаго́лѧ:

⁸Приближа́ютсѧ мнѣ̀ лю́дїе сі́и ѹ҆сты̀ свои́ми, и҆ ѹ҆стна́ми чтꙋ́тъ мѧ̀: се́рдце же и҆́хъ дале́че ѿстои́тъ ѿ менѐ.

⁹Всꙋ́е же чтꙋ́тъ мѧ̀, ѹ҆ча́ще ѹ҆че́нїємъ, за́повѣдемъ человѣ́ческимъ.

¹⁰И҆ призва́въ наро́ды, речѐ и҆̀мъ: слы́шите, и҆ разꙋмѣ́йте:

¹¹Не входѧ́щее во ѹ҆ста̀ скверни́тъ человѣ́ка: но и҆сходѧ́щее и҆зоꙋ́стъ, то̀ скверни́тъ человѣ́ка.

¹²Тогда̀ пристꙋ́пльше ѹ҆ченицы̀ є҆гѡ̀, рѣ́ша є҆мꙋ̀: вѣ́си ли, ꙗ҆́кѡ фарїсе́є слы́шавше сло́во, соблазни́шасѧ;

¹³Ѻ҆́нъ же ѿвѣща́въ речѐ: всѧ́къ са́дъ, є҆гѡ́же не насадѝ ѻ҆ц҃ъ мо́й небе́сный, и҆скорени́тсѧ. г҃і Ѡ҆ста́вите и҆̀хъ: вождѝ сꙋ́ть слѣ́пи слѣпцє́мъ: слѣпе́цъ же слѣпца̀ а҆́ще во́дитъ, ѻ҆́ба въ ꙗ҆́мꙋ впаде́тасѧ.

¹⁵Ѿвѣща́въ же пе́тръ, речѐ є҆мꙋ̀: скажѝ на́мъ при́тчꙋ сїю̀.

¹⁶І҆и҃съ же речѐ (и҆̀мъ): є҆дина́че ли и҆ вы̀ без̾ ра́зꙋма є҆стѐ;

¹⁷Не ѹ҆̀ ли разꙋмѣва́ете, ꙗ҆́кѡ всѧ́ко, є҆́же вхо́дитъ во ѹ҆ста̀, во чре́во вмѣща́етсѧ, и҆ а҆федрѡ́номъ и҆схо́дитъ;

¹⁸И҆сходѧ̑щаѧ же и҆зоꙋ́стъ, ѿ се́рдца и҆схо́дѧтъ, и҆ та̑ сквернѧ́тъ человѣ́ка.

¹⁹Ѿ се́рдца бо и҆схо́дѧтъ помышлє́нїѧ ѕла̑ѧ, ѹ҆бі̑йства, прелюбодѣѧ̑нїѧ, любодѣѧ̑нїѧ, татьбы̑, лжесвидѣ́тєльства, хꙋлы̑.

²⁰Сїѧ̑ сꙋ́ть сквернѧ̑щаѧ человѣ́ка: а҆ є҆́же неꙋмове́нныма рꙋка́ма ꙗ҆́сти, не скверни́тъ человѣ́ка.

²¹И҆ и҆зше́дъ ѿтꙋ́дꙋ і҆и҃съ, ѿи́де во страны̀ тѵ́рскїѧ и҆ сїдѡ́нскїѧ.

²²И҆ сѐ жена̀ ханане́йска ѿ предѣ́лъ тѣ́хъ и҆зше́дши, возопѝ къ немꙋ̀, глаго́лющи: поми́лꙋй мѧ̀ гдⷭ҇и, сн҃е дв҃довъ: дщѝ моѧ̀ ѕлѣ̀ бѣснꙋ́етсѧ.

²³Ѻ҆́нъ же не ѿвѣща̀ є҆́й словесѐ. и҆ пристꙋ́пльше ѹ҆ченицы̀ є҆гѡ̀, молѧ́хꙋ є҆го̀ глаго́люще: ѿпꙋстѝ ю҆̀, ꙗ҆́кѡ вопїе́тъ въ слѣ́дъ на́съ.

²⁴Ѻ҆́нъ же ѿвѣща́въ, речѐ: нѣ́смь по́сланъ, то́кмѡ ко ѻ҆вца́мъ поги́бшымъ до́мꙋ і҆и҃лева.

²⁵Ѻ҆на́ же прише́дши поклони́сѧ є҆мꙋ̀, глаго́лющи: гдⷭ҇и, помози́ ми.

²⁶Ѻ҆́нъ же ѿвѣща́въ, речѐ: нѣ́сть добро̀ ѿѧ́ти хлѣ́ба ча́дѡмъ, и҆ поврещѝ псѡ́мъ.

²⁷Ѻ҆на́ же речѐ: є҆́й гдⷭ҇и: и҆́бо и҆ псѝ ꙗ҆дѧ́тъ ѿ крꙋпи́цъ па́дающихъ ѿ трапе́зы господе́й свои́хъ.

²⁸Тогда̀ ѿвѣща́въ і҆и҃съ, речѐ є҆́й: ѽ же́но, ве́лїѧ вѣ́ра твоѧ̀! бꙋ́ди тебѣ̀, ꙗ҆́коже хо́щеши. и҆ и҆сцѣлѣ̀ дщѝ є҆ѧ̀ ѿ тогѡ̀ часа̀.

²⁹И҆ преше́дъ ѿтꙋ́дꙋ і҆и҃съ, прїи́де на мо́ре галїле́йское: и҆ возше́дъ на горꙋ̀, сѣ́де тꙋ̀.

³⁰И҆ пристꙋпи́ша къ немꙋ̀ наро́ди мно́зи, и҆мꙋ́ще съ собо́ю хрѡмы́ѧ, слѣпы̑ѧ, нѣмы̑ѧ, бѣ̑дныѧ, и҆ и҆́ны мно́ги: и҆ приверго́ша и҆̀хъ къ нога́ма і҆и҃совыма, и҆ и҆сцѣлѝ и҆̀хъ.

³¹Ꙗ҆́коже наро́дѡмъ диви́тисѧ ви́дѧщымъ нѣмы̑ѧ глаго́лющѧ, бѣ̑дныѧ здра́вы, хрѡмы́ѧ ходѧ́щѧ, и҆ слѣпы̑ѧ ви́дѧщѧ, и҆ сла́влѧхꙋ бг҃а і҆и҃лева.

³²І҆и҃съ же призва́въ ѹ҆ченикѝ своѧ̀, речѐ (и҆̀мъ): милосе́рдꙋю ѡ҆ наро́дѣ (се́мъ), ꙗ҆́кѡ ѹ҆жѐ днѝ трѝ присѣдѧ́тъ мнѣ̀, и҆ не и҆́мꙋтъ чесѡ̀ ꙗ҆́сти: и҆ ѿпꙋсти́ти и҆̀хъ не ꙗ҆́дшѧ не хощꙋ̀, да не ка́кѡ ѡ҆слабѣ́ютъ на пꙋтѝ.

³³И҆ глаго́лаша є҆мꙋ̀ ѹ҆ченицы̀ є҆гѡ̀: ѿкꙋ́дꙋ на́мъ въ пꙋсты́ни хлѣ́би толи́цы, ꙗ҆́кѡ да насы́титсѧ толи́къ наро́дъ;

³⁴И҆ глаго́ла и҆̀мъ і҆и҃съ: коли́кѡ хлѣ́бы и҆́мате; ѻ҆ни́ же рѣ́ша: се́дмь, и҆ ма́лѡ ры́бицъ.

³⁵И҆ повелѣ̀ наро́дѡмъ возлещѝ на землѝ.

³⁶И҆ прїе́мъ се́дмь хлѣ́бы и҆ ры̑бы, хвалꙋ̀ возда́въ преломѝ, и҆ дадѐ ѹ҆ченикѡ́мъ свои́мъ, ѹ҆ченицы́ же наро́дѡмъ.

³⁷И҆ ꙗ҆до́ша всѝ, и҆ насы́тишасѧ: и҆ взѧ́ша и҆збы́тки ѹ҆крꙋ̑хъ, се́дмь ко́шницъ и҆спо́лнь.

³⁸Ꙗ҆́дшихъ же бѧ́ше четы́ре ты́сѧщи мꙋже́й, ра́звѣ же́нъ и҆ дѣте́й.

³⁹И҆ ѿпꙋсти́въ наро́ды, влѣ́зе въ кора́бль, и҆ прїи́де въ предѣ́лы магдали́нски.