Psalms 123

¹Ꙗ҆́кѡ а҆́ще не гдⷭ҇ь бы бы́лъ въ на́съ, да рече́тъ ѹ҆́бѡ і҆и҃ль:

²Ꙗ҆́кѡ а҆́ще не гдⷭ҇ь бы бы́лъ въ на́съ, внегда̀ воста́ти человѣ́кѡмъ на ны̀, ѹ҆̀бо живы́хъ поже́рли бы́ша на́съ:

³Внегда̀ прогнѣ́ватисѧ ꙗ҆́рости и҆́хъ на ны̀, ѹ҆̀бо вода̀ потопи́ла бы на́съ.

⁴Пото́къ пре́йде дꙋша̀ на́ша:

⁵Ѹ҆̀бо пре́йде дꙋша̀ на́ша во́дꙋ непостоѧ́ннꙋю.

⁶Бл҃гослове́нъ гдⷭ҇ь, и҆́же не дадѐ на́съ въ лови́твꙋ зꙋбѡ́мъ и҆́хъ.

⁷Дꙋша̀ на́ша ꙗ҆́кѡ пти́ца и҆зба́висѧ ѿ сѣ́ти ловѧ́щихъ: сѣ́ть сокрꙋши́сѧ, и҆ мы̀ и҆зба́влени бы́хомъ.

⁸По́мощь на́ша во и҆́мѧ гдⷭ҇а, сотво́ршагѡ не́бо и҆ зе́млю.