Matthew 8

¹Сше́дшꙋ же є҆мꙋ̀ съ горы̀, въ слѣ́дъ є҆гѡ̀ и҆дѧ́хꙋ наро́ди мно́зи.

²И҆ сѐ прокаже́нъ прише́дъ, кла́нѧшесѧ є҆мꙋ̀, глаго́лѧ: гдⷭ҇и, а҆́ще хо́щеши, мо́жеши мѧ̀ ѡ҆чи́стити.

³И҆ просте́ръ рꙋ́кꙋ і҆и҃съ, коснꙋ́сѧ є҆мꙋ̀, глаго́лѧ: хощꙋ̀, ѡ҆чи́стисѧ. и҆ а҆́бїе ѡ҆чи́стисѧ є҆мꙋ̀ прока́за.

⁴И҆ глаго́ла є҆мꙋ̀ і҆и҃съ: ви́ждь, никомꙋ́же повѣ́ждь: но ше́дъ покажи́сѧ і҆ере́ови, и҆ принесѝ да́ръ, и҆́же повелѣ̀ въ зако́нѣ мѡѷсе́й, во свидѣ́тельство и҆̀мъ.

⁵Вше́дшꙋ же є҆мꙋ̀ въ капернаꙋ́мъ, пристꙋпѝ къ немꙋ̀ со́тникъ молѧ̀ є҆го̀,

⁶И҆ глаго́лѧ: гдⷭ҇и, ѻ҆́трокъ мо́й лежи́тъ въ домꙋ̀ ѡ҆сла́бленъ, лю́тѣ стражда̀.

⁷И҆ глаго́ла є҆мꙋ̀ і҆и҃съ: а҆́зъ прише́дъ и҆сцѣлю̀ є҆го̀.

⁸И҆ ѿвѣща́въ со́тникъ, речѐ є҆мꙋ̀: гдⷭ҇и, нѣ́смь досто́инъ да под̾ кро́въ мо́й вни́деши, но то́кмѡ рцы̀ сло́во, и҆ и҆сцѣлѣ́етъ ѻ҆́трокъ мо́й.

⁹И҆́бо а҆́зъ человѣ́къ є҆́смь под̾ вла́стїю, и҆мы́й под̾ собо́ю во́ины. и҆ глаго́лю семꙋ̀: и҆дѝ, и҆ и҆́детъ. и҆ дрꙋго́мꙋ: прїидѝ, и҆ прїи́детъ. и҆ рабꙋ̀ моемꙋ̀: сотворѝ сїѐ, и҆ сотвори́тъ.

¹⁰Слы́шавъ же і҆и҃съ, ѹ҆диви́сѧ, и҆ речѐ грѧдꙋ́щымъ по не́мъ: а҆ми́нь глаго́лю ва́мъ, ни во і҆и҃ли толи́ки вѣ́ры ѡ҆брѣто́хъ.

¹¹Глаго́лю же ва́мъ: ꙗ҆́кѡ мно́зи ѿ востѡ́къ и҆ за̑падъ прїи́дꙋтъ, и҆ возлѧ́гꙋтъ со а҆враа́момъ, и҆ і҆саа́комъ, и҆ і҆а́кѡвомъ во црⷭ҇твїи нбⷭ҇нѣмъ.

¹²Сы́нове же црⷭ҇твїѧ и҆згна́ни бꙋ́дꙋтъ во тмꙋ̀ кромѣ́шнюю: тꙋ̀ бꙋ́детъ пла́чь и҆ скре́жетъ зꙋбѡ́мъ.

¹³И҆ речѐ і҆и҃съ со́тникꙋ: и҆дѝ, и҆ ꙗ҆́коже вѣ́ровалъ є҆сѝ, бꙋ́ди тебѣ̀. и҆ и҆сцѣлѣ̀ ѻ҆́трокъ є҆гѡ̀ въ то́й ча́съ.

¹⁴И҆ прише́дъ і҆и҃съ въ до́мъ петро́въ, ви́дѣ те́щꙋ є҆гѡ̀ лежа́щꙋ, и҆ ѻ҆гне́мъ жего́мꙋ.

¹⁵И҆ прикоснꙋ́сѧ рꙋцѣ̀ є҆ѧ̀, и҆ ѡ҆ста́ви ю҆̀ ѻ҆́гнь: и҆ воста̀, и҆ слꙋжа́ше є҆мꙋ̀.

¹⁶По́здѣ же бы́вшꙋ, приведо́ша къ немꙋ̀ бѣ́сны мно́ги, и҆ и҆згна̀ дꙋ́хи сло́вомъ, и҆ всѧ̀ болѧ́щыѧ и҆сцѣлѝ.

¹⁷Да сбꙋ́детсѧ рече́нное и҆са́їемъ проро́комъ, глаго́лющимъ: то́й недꙋ́ги на́шѧ прїѧ́тъ, и҆ болѣ̑зни понесѐ.

¹⁸Ви́дѣвъ же і҆и҃съ мно́ги наро́ды ѻ҆́крестъ себѐ, повелѣ̀ и҆тѝ на ѻ҆́нъ по́лъ.

¹⁹И҆ пристꙋ́пль є҆ди́нъ кни́жникъ, речѐ є҆мꙋ̀: ѹ҆чт҃лю, и҆дꙋ̀ по тебѣ̀, а҆́може а҆́ще и҆́деши.

²⁰Глаго́ла є҆мꙋ̀ і҆и҃съ: ли́си ꙗ҆́звины и҆́мꙋтъ, и҆ пти̑цы нбⷭ҇ныѧ гнѣ́зда: сн҃ъ же человѣ́ческїй не и҆́мать гдѣ̀ главы̀ подклони́ти.

²¹Дрꙋгі́й же ѿ ѹ҆ч҃ни̑къ є҆гѡ̀ речѐ є҆мꙋ̀: гдⷭ҇и, повели́ ми пре́жде и҆тѝ, и҆ погребстѝ ѻ҆тца̀ моего̀.

²²І҆и҃съ же речѐ є҆мꙋ̀: грѧдѝ по мнѣ̀, и҆ ѡ҆ста́ви ме́ртвыхъ погребстѝ своѧ̀ мертвецы̀.

²³И҆ влѣ́зшꙋ є҆мꙋ̀ въ кора́бль, по не́мъ и҆до́ша ѹ҆ченицы̀ є҆гѡ̀.

²⁴И҆ сѐ трꙋ́съ вели́къ бы́сть въ мо́ри, ꙗ҆́коже кораблю̀ покрыва́тисѧ волна́ми: то́й же спа́ше.

²⁵И҆ прише́дше ѹ҆чн҃цы̀ є҆гѡ̀, возбꙋди́ша є҆го̀, глаго́люще: гдⷭ҇и, спаси́ ны, погиба́емъ.

²⁶И҆ глаго́ла и҆̀мъ: что̀ страшли́ви є҆стѐ маловѣ́ри; тогда̀ воста́въ запретѝ вѣ́трѡмъ и҆ мо́рю, и҆ бы́сть тишина̀ ве́лїѧ.

²⁷Человѣ́цы же чꙋди́шасѧ, глаго́люще: кто̀ є҆́сть се́й, ꙗ҆́кѡ и҆ вѣ́три и҆ мо́ре послꙋ́шаютъ є҆гѡ̀;

²⁸И҆ прише́дшꙋ є҆мꙋ̀ на ѻ҆́нъ по́лъ, въ странꙋ̀ гергеси́нскꙋю, срѣто́ста є҆го̀ два̀ бѣ́сна ѿ грѡ́бъ и҆сходѧ́ща, лю̑та ѕѣлѡ̀, ꙗ҆́кѡ не мощѝ никомꙋ̀ минꙋ́ти пꙋте́мъ тѣ́мъ.

²⁹И҆ сѐ возопи́ста, глаго́люще: что̀ на́мъ и҆ тебѣ̀ і҆и҃се сн҃е бж҃їй; прише́лъ є҆сѝ сѣ́мѡ пре́жде вре́мене мꙋ́чити на́съ.

³⁰Бѧ́ше же дале́че ѿ нею̀ ста́до свині́й мно́го пасо́мо.

³¹Бѣ́си же молѧ́хꙋ є҆го̀ глаго́люще: а҆́ще и҆зго́ниши ны̀, повелѝ на́мъ и҆тѝ въ ста́до свино́е.

³²И҆ речѐ и҆̀мъ: и҆ди́те. ѻ҆ни́ же и҆зше́дше и҆до́ша въ ста́до свино́е: и҆ сѐ (а҆́бїе) ѹ҆стреми́сѧ ста́до всѐ по бре́гꙋ въ мо́ре, и҆ ѹ҆топо́ша въ вода́хъ.

³³Пасꙋ́щїи же бѣжа́ша, и҆ ше́дше во гра́дъ возвѣсти́ша всѧ̀, и҆ ѡ҆ бѣсно́ю.

³⁴И҆ сѐ ве́сь гра́дъ и҆зы́де въ срѣ́тенїе і҆и҃сови: и҆ ви́дѣвше є҆го̀, моли́ша, ꙗ҆́кѡ да бы̀ преше́лъ ѿ предѣ́лъ и҆́хъ.