Matthew 11

¹И҆ бы́сть, є҆гда̀ совершѝ і҆и҃съ, заповѣ́даѧ ѻ҆бѣмана́десѧте ѹ҆ченико́ма свои́ма, пре́йде ѿтꙋ́дꙋ ѹ҆чи́ти, и҆ проповѣ́дати во гра́дѣхъ и҆́хъ.

²І҆ѡа́ннъ же слы́шавъ во ѹ҆зи́лищи дѣла̀ хрⷭ҇то́ва, посла̀ два̀ ѿ ѹ҆ч҃ни̑къ свои́хъ,

³Речѐ є҆мꙋ̀: ты́ ли є҆сѝ грѧды́й, и҆лѝ и҆но́гѡ ча́емъ;

⁴И҆ ѿвѣща́въ і҆и҃съ речѐ и҆̀мъ: ше́дша возвѣсти́та і҆ѡа́ннови, ꙗ҆̀же слы́шита и҆ ви́дита.

⁵Слѣпі́и прозира́ютъ, и҆ хро́мїи хо́дѧтъ: прокаже́ннїи ѡ҆чища́ютсѧ, и҆ глꙋсі́и слы́шатъ: ме́ртвїи востаю́тъ, и҆ ни́щїи благовѣствꙋ́ютъ.

⁶И҆ блаже́нъ є҆́сть, и҆́же а҆́ще не соблазни́тсѧ ѡ҆ мнѣ̀.

⁷Тѣ́ма же и҆сходѧ́щема, нача́тъ і҆и҃съ наро́дѡмъ глаго́лати ѡ҆ і҆ѡа́ннѣ: чесѡ̀ и҆зыдо́сте въ пꙋсты́ню ви́дѣти; тро́сть ли вѣ́тромъ коле́блемꙋ;

⁸Но чесѡ̀ и҆зыдо́сте ви́дѣти; человѣ́ка ли въ мѧ́кки ри̑зы ѡ҆блече́нна; сѐ и҆̀же мѧ̑ккаѧ носѧ́щїи, въ домѣ́хъ црⷭ҇кихъ сꙋ́ть.

⁹Но чесѡ̀ и҆зыдо́сте ви́дѣти; проро́ка ли; є҆́й глаго́лю ва́мъ, и҆ ли́шше проро́ка.

¹⁰Се́й бо є҆́сть, ѡ҆ не́мже є҆́сть пи́сано: сѐ а҆́зъ посыла́ю а҆́гг҃ла моего̀ предъ лице́мъ твои́мъ, и҆́же ѹ҆гото́витъ пꙋ́ть тво́й пред̾ тобо́ю.

¹¹А҆ми́нь глаго́лю ва́мъ, не воста̀ въ рожде́нныхъ жена́ми бо́лїй і҆ѡа́нна крⷭ҇ти́телѧ: мні́й же во црⷭ҇твїи нбⷭ҇нѣмъ, бо́лїй є҆гѡ̀ є҆́сть.

¹²Ѿ дне́й же і҆ѡа́нна крⷭ҇ти́телѧ досе́лѣ, црⷭ҇твїе нбⷭ҇ное нꙋ́дитсѧ, и҆ нꙋ́ждницы восхища́ютъ є҆̀.

¹³Вси́ бо проро́цы и҆ зако́нъ до і҆ѡа́нна прореко́ша.

¹⁴И҆ а҆́ще хо́щете прїѧ́ти, то́й є҆́сть и҆лїа̀ хотѧ́й прїитѝ.

¹⁵И҆мѣ́ѧй ѹ҆́ши слы́шати, да слы́шитъ.

¹⁶Комꙋ́ же ѹ҆подо́блю ро́дъ се́й; подо́бенъ є҆́сть дѣ́темъ, сѣдѧ́щымъ на то́ржищахъ, и҆ возглаша́ющымъ дрꙋгѡ́мъ свои́мъ,

¹⁷И҆ глаго́лющымъ: писка́хомъ ва́мъ, и҆ не плѧса́сте: пла́кахомъ ва́мъ, и҆ не рыда́сте.

¹⁸Прїи́де бо і҆ѡа́ннъ, ни ꙗ҆ды́й, ни пїѧ̀, и҆ глаго́лютъ: бѣ́са и҆́мать.

¹⁹Прїи́де сн҃ъ чл҃вѣ́ческїй, ꙗ҆ды́й и҆ пїѧ́й, и҆ глаго́лютъ: сѐ человѣ́къ ꙗ҆́дца и҆ вїнопі́йца, мытарє́мъ дрꙋ́гъ и҆ грѣ́шникѡмъ. и҆ ѡ҆правди́сѧ премꙋ́дрость ѿ ча̑дъ свои́хъ.

²⁰Тогда̀ нача́тъ і҆и҃съ поноша́ти градовѡ́мъ, въ ни́хже бы́ша мно́жайшыѧ си́лы є҆гѡ̀, занѐ не пока́ѧшасѧ.

²¹Го́ре тебѣ̀ хоразі́не, го́ре тебѣ̀ виѳсаі́до: ꙗ҆́кѡ а҆́ще въ тѵ́рѣ и҆ сїдѡ́нѣ бы́ша си́лы бы́ли бы́вшыѧ въ ва́съ, дре́вле ѹ҆́бѡ во вре́тищи и҆ пе́пелѣ пока́ѧлисѧ бы́ша.

²²Ѻ҆ба́че глаго́лю ва́мъ: тѵ́рꙋ и҆ сїдѡ́нꙋ ѿра́днѣе бꙋ́детъ въ де́нь сꙋ́дный, не́же ва́мъ.

²³И҆ ты̀ капернаꙋ́ме, и҆́же до нб҃съ вознесы́йсѧ, до а҆́да сни́деши: занѐ а҆́ще въ содо́мѣхъ бы́ша си̑лы бы́ли бы́вшыѧ въ тебѣ̀, пребы́ли ѹ҆́бѡ бы́ша до дне́шнѧгѡ днѐ.

²⁴Ѻ҆ба́че глаго́лю ва́мъ, ꙗ҆́кѡ землѝ содо́мстѣй ѿра́днѣе бꙋ́детъ въ де́нь сꙋ́дный, не́же тебѣ̀.

²⁵Въ то̀ вре́мѧ ѿвѣща́въ і҆и҃съ, речѐ: и҆сповѣ́даю ти сѧ ѻ҆́ч҃е, гдⷭ҇и нб҃сѐ и҆ землѝ, ꙗ҆́кѡ ѹ҆таи́лъ є҆сѝ сїѧ̑ ѿ премꙋ́дрыхъ и҆ разꙋ́мныхъ, и҆ ѿкры́лъ є҆сѝ та̑ младе́нцємъ.

²⁶Є҆́й, ѻ҆́ч҃е, ꙗ҆́кѡ та́кѡ бы́сть бл҃говоле́нїе пред̾ тобо́ю.

²⁷Всѧ̑ мнѣ̀ предана̀ сꙋ́ть ѻ҆ц҃е́мъ мои́мъ, и҆ никто́же зна́етъ сн҃а, то́кмѡ ѻ҆ц҃ъ: ни ѻ҆ц҃а̀ кто̀ зна́етъ, то́кмѡ сн҃ъ, и҆ є҆мꙋ́же а҆́ще во́литъ сн҃ъ ѿкры́ти.

²⁸Прїиди́те ко мнѣ̀ всѝ трꙋжда́ющїисѧ и҆ ѡ҆бремене́ннїи, и҆ а҆́зъ ѹ҆поко́ю вы̀.

²⁹Воз̾ми́те и҆́го моѐ на себѐ, и҆ наꙋчи́тесѧ ѿ менѐ, ꙗ҆́кѡ кро́токъ є҆́смь и҆ смире́нъ се́рдцемъ, и҆ ѡ҆брѧ́щете поко́й дꙋша́мъ ва́шымъ.

³⁰И҆́го бо моѐ бла́го, и҆ бре́мѧ моѐ легко̀ є҆́сть.