Ирмос: Ужасе́ся о сем Не́бо,/и земли́ удиви́шася концы́,/ я́ко Бог яви́ся челове́ком пло́тски / и чре́во Твое́ бысть простра́ннейшее Небе́с,/ Тем Тя, Богоро́дицу,/ А́нгелов и челове́к чинонача́лия велича́ют.
Преподо́бне о́тче Афана́сие, моли́ Бо́га о нас.
В чистоте́ и целому́дрии, и в чи́сте пребыва́нии, и житии́ нескверне,/ я́ко безпло́тен, на земли́ пожи́в, восте́кл еси́ к Небе́сным стезя́м,/ и со все́ми ра́дуешися преподо́бными и пра́ведными,// моля́ о всех Христа́.
Преподо́бне о́тче Афана́сие, моли́ Бо́га о нас.
Вельми́ возвели́чил еси́ на земли́ твоего́ Влады́ку,/ и у́ды твои́ми виде́нием и де́телию Сего́ просла́вль пресла́вно,/ яви́лся еси́ взо́рен всю́ду и сла́вен был еси́, Богоно́се:// доброде́тель бо весть вои́стинну посрами́ти и супоста́та.
Сла́ва Отцу́ и Сы́ну и Свято́му Ду́ху.
Совокупи́лся еси́ со Безпло́тными во́инствы,/ и преподо́бным лико́м сочета́лся еси́, и со избра́нными все́ми лику́еши, прича́щся и́стинным обоже́нием, и безсме́ртною, о́тче, жи́знию./ С ни́миже о ста́де твое́м непреста́нно твоего́ Влады́ку моли́.
И ны́не и при́сно и во ве́ки веко́в, ами́нь.
Храм освяще́н, вме́стен Еди́ному от Тро́ицы сый,/ храм Твой, Влады́чице, уго́дник че́стен Афана́сий воздви́же в сла́ву Твою́ и честь,// в не́мже непреста́нно не преста́й да́рующи по́мощь моли́твами твои́ми.