Ирмо́с: Из Отца́ пре́жде век рожде́ннаго Сы́на и Бо́га/ и в после́дняя ле́та воплоще́ннаго от Де́вы Ма́тере,/ свяще́нницы, по́йте,// лю́дие, превозноси́те во вся ве́ки.
Преподо́бне о́тче Силуа́не, моли́ Бо́га о нас.
Воздея́ние рук на́ших приими́, преподо́бне,/ Влады́чней бла́гости подо́бяся, прегреше́ния на́ша презира́я,/ ты бо ду́шу твою́ уязви́л еси́ Христо́вою любо́вию и Пречи́стыя Его́Ма́тере,/ е́юже умоли́ спасти́ду́ши на́ша.
Преподо́бне о́тче Силуа́не, моли́ Бо́га о нас.
Я́ко крин преди́вный и сапфи́р пречу́дный,/ в вертогра́де Пречи́стыя процве́л еси́, преподо́бне Силуа́не,/ Влады́це твоему́ Христу́ смире́нно ревну́я, вы́ше бо челове́ка восприе́м житие́,/ и́мже мно́гих ду́ши Го́споду приво́диши.
Преподо́бне о́тче Силуа́не, моли́ Бо́га о нас.
Преподо́бне о́тче Силуа́не, моли́ Бо́га о нас.
Вои́стину носи́тель даро́в Свята́го Ду́ха был еси́/ и, разли́чными доброде́тельми укра́шен, Силуа́не,/ смире́нием го́рнюю высоту́ насле́див, нището́ю Небе́сное бога́тство изря́дно прия́л еси́./ Насле́дники сего́ покажи́ ны, моли́твами твои́ми.
Сия́ния Боже́ственнаго и Ду́ха Свята́го сла́дости прича́стника показа́ тя Госпо́дь, о́тче Силуа́не,/ егда́ в неизрече́ннем Фаво́рстем сия́нии тя посети́л есть./ Зре́ти сла́ву Сего́ в све́те блиста́ния Божества́ Его́/ сподо́би инас, мо́лимтися.
И ны́не и при́сно и во ве́ки веко́в, ами́нь.
Пречи́стая Влады́чице, Небе́сных Сил превы́шшая,/ ро́ждшая Спа́са, всех Соде́теля, Единосу́щна Отцу́ и Ду́ху,/ даждь нам сло́во, Препе́тая, я́ко да возмо́жем пе́ти Тя,/ су́щую Засту́пницу ро́да на́шего.