Хор: Благослове́н еси́, Христе́ Бо́же наш,/ И́же прему́дры ловцы́ явле́й,/ низпосла́в им Ду́ха Свята́го/ и те́ми уловле́й вселе́нную;// Человеколю́бче, сла́ва Тебе́.
Стих: Во всю зе́млю изы́де веща́ние их, и в концы́ вселе́нныя глаго́лы их.
Хор: Свети́ла ми́ра и наста́вники,/ на́шего спасе́ния нача́ток,/ боже́ственныя воспои́м ученики́ Бо́га на́шего,/ я́ко свет су́щим во тьме нам возсия́ша/ и Со́лнце сла́вы всем сказа́ша;/ те́мже и пре́лесть и́дольскую низложи́ша,/ Тро́ицу пропове́давше во Еди́ном Божестве́./ Сего́ ра́ди мо́лимся, апо́столи Христа́ Бо́га,/ прегреше́ний оставле́нию дарова́тися // пра́зднующим любо́вию святу́ю па́мять ва́шу.
Стих: Ди́вен Бог во святы́х Свои́х, Бог Изра́илев.
Хор: До́блественне тече́ние соверши́вше,/ мучи́телем сопроти́вистеся му́ченицы;/ телеса́ бо умертви́вше на земли́,// восприя́сте небе́сную жизнь, святи́и.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Хор: Ра́дуйся, А́нгелом Ра́дость ми́ра прие́мшая,/ ра́дуйся, ро́ждшая Творца́ Твоего́ и Го́спода,// ра́дуйся, сподо́бльшаяся бы́ти Ма́ти Бо́жия.