Воды́ живы́я в вертогра́де Бо́жия Ма́тере, Ки́ево-Пече́рстей и горы Афо́нския оби́телех испи́л еси, си́це бо кла́дезь добротолю́бия яви́лся еси, Паи́сие преподо́бне, и жа́ждущих пра́вды Бо́жия изря́дно напоя́я, любо́вию ко Го́споду воспламени́в и к ре́вности а́нгельскаго жития воздви́гл еси, моли Христа Бо́га грехо́в оставле́ние дарова́ти, чту́щим любо́вию па́мять твою.
Сла́ва: и́н седа́лен, гла́с то́йже:
Еди́ною в ле́то исхожда́л еси из ке́ллии твоея, о́тче Паи́сие, обзира́л еси селе́ние ученико́в твои́х, е́здя, обзира́я и назна́менуя коего́ждо и́х ке́ллию со́лнцу заходя́щу, и со слеза́ми моли́лся еси, вруча́я их Бо́гу и глаго́ля: Го́споди, огради сие ма́лое ста́до, и сохрани е от волко́в губя́щих е.
И ны́не: Богоро́дичен. Гла́с то́йже.
Я́ко Престо́л царе́в и свети́льник огне́м Бо́жества сия́ющий ве́дуще Тя, Де́во Чи́стая, и две́рь, Еюже Госпо́дь в ми́р вни́де и ве́сь ро́д челове́ческий обожи́, его́же порфирою креще́ния обла́года́тствовани бе́хом, да сы́нове све́та бу́дем. Те́мже Всепе́тая, венца тысящеле́тняго бла́говоле́ния Бо́жия на́с сподо́бльшая, моли спа́сти́ся душа́м на́шим.