Хор: Ирмос: От нощи́ у́тренююща,/ Человеколю́бче, просвети́, молю́ся,/ и наста́ви и мене́ на повеле́ния Твоя́,/ и научи́ мя, Спа́се,// твори́ти во́лю Твою́.
Припе́в: Поми́луй мя, Бо́же, поми́луй мя. (на каждый тропарь)
Иису́се, посети́ ра́ны души́ моея́,/ я́коже дре́вле в ру́це впа́дшаго разбо́йничи,// и уврачу́й боле́знь мою́ Христе́, молю́ся.
В нощи́ житие́ мое́ преидо́х при́сно,/ тьма бо бысть и глубока́ мне мгла, нощь греха́,// но я́ко дне сы́на Спа́се покажи́ мя.
Руви́ма подража́я окая́нный аз,/ соде́ях беззако́нный и законопресту́пный сове́т на Бо́га Вы́шняго,// оскверни́в ло́же мое́, я́ко о́тчее он.
Испове́даюся Тебе́ Христе́ Царю́,/ согреши́х, согреши́х,/ я́ко пре́жде Ио́сифа бра́тия прода́вшии,// чистоты́ плод и целому́дрия.
От сро́дников пра́ведная душа́ связа́ся,/ прода́ся в рабо́ту сла́дкий,/ во о́браз Госпо́день:/ ты же вся душе́, продала́ся еси́// злы́ми твои́ми.
Ио́сифа пра́веднаго и целому́дреннаго ума́ / подража́й окая́нная, и неиску́сная душе́,/ и не оскверня́йся безслове́сными стремле́ньми// при́сно беззако́ннующи.
А́ще и в ро́ве поживе́ иногда́ Ио́сиф, / Влады́ко Го́споди,/ но во о́браз погребе́ния и воста́ния Твоего́:// аз же что Тебе́ когда́ сицево́е принесу́?
Моисе́ов слы́шала еси́ ковче́жец душе́,/ вода́ми, волна́ми носи́м ре́чными,/ я́ко в черто́зе дре́вле бе́гающий де́ла го́рькаго// сове́та фараони́тска.
А́ще ба́бы слы́шала еси́, убива́ющия иногда́/ безвозра́стное му́жеское, душе́ окая́нная, целому́дрия дея́ние,/ ны́не я́ко вели́кий Моисе́й// сси прему́дрость.
Я́ко Моисе́й вели́кий/ еги́птянина, ума́ уязви́вши/ окая́нная, не уби́ла еси́ душе́:/ и ка́ко всели́шися, глаго́ли,// в пусты́ню страсте́й покая́нием?
В пусты́ню всели́ся вели́кий Моисе́й,/ гряди́ у́бо подража́й того́ житие́, / да и в купине́ богоявле́ния душе́,// в виде́нии бу́деши.
Моисе́ов жезл вообража́й душе́,/ ударя́ющий мо́ре, и огустева́ющий глубину́,/ во о́браз Креста́ Боже́ственнаго:/ и́мже мо́жеши и ты// вели́кая соверши́ти.
Ааро́н приноша́ше огнь Бо́гу, непоро́чный, неле́стный:/ но Офни́ и Финее́с, я́ко ты душе́,// приноша́ху чужде́е Бо́гу оскверне́нное житие́.
Я́ко тя́жкий нра́вом,/ фарао́ну го́рькому бых Влады́ко,/ Ианни́, и Иамври́, душе́ю и те́лом,// и погруже́н умо́м, но помози́ ми.
Ка́лом смеси́хся окая́нный умо́м, / омы́й мя Влады́ко, ба́нею мои́х слез,/ молю́ Тя, пло́ти моея́ оде́жду// убели́в я́ко снег.
А́ще испыта́ю моя́ дела́ Спа́се,/ вся́каго челове́ка превозше́дша греха́ми себе́ зрю,/ я́ко ра́зумом му́дрствуяй согреши́х,// не нeве́дeниeм.
Пощади́ пощади́ Го́споди, созда́ние Твое́,/ согреши́х, осла́би ми,/ я́ко eстество́м чи́стый Сам сый eди́н,/ и ин pа́звe Teбе́// никтόжe eсть кро́мe скве́pны.
Мене́ ра́ди Бог сый,/ вообрази́лся еси́ в мя,/ Показа́л еси́ чудеса́, исцели́в прокаже́нныя,/ и разсла́бленнаго стягну́в,/ кровоточи́выя ток yста́вил eси́ Спа́сe,// пpикоснове́ниeм pиз.
Кровоточи́вую подража́й окая́нная душе́,/ притецы́, удержи́ оме́ты Xpисто́вы,/ да изба́вишися pан,/ и услы́шиши от Heго́:// ве́pа твоя́ спасе́ тя.
Ни́зу снича́щую подража́й о душе́,/ прииди́, припади́ к нога́ма Иисýсовыма,/ да тя испpа́вит,/ и да хо́диши пpа́во // стeзи́ Госпо́дни.
А́щe и кла́дязь eси́ глубо́кий Влады́ко,/ источи́ ми во́ду из пpeчи́стых Tвои́х жил,/ да я́ко самаpяны́ня, нe ктому́ пия́й жа́жду:// жи́зни бо стpyи́ источа́eши.
Силоа́м да бу́дут ми/ сле́зы моя́, Влады́ко Го́споди,/ да умы́ю и аз зе́ницы се́pдца,// и ви́жду Тя у́мно, Све́та пpeве́чна.
Припе́в: Преподо́бная ма́ти Мари́е, моли́ Бо́га о нас.
Марии: Несравне́нным жела́нием всебога́тая,/ Дре́ву возжеле́вши поклони́тися живо́тному,/ сподо́билася еси́ жела́ния,/ сподо́би у́бо и мeне́// улучи́ти вы́шния сла́вы.
Припе́в: Преподо́бная ма́ти Мари́е, моли́ Бо́га о нас.
Марии: Струи́ Иорда́нския преше́дши,/ обрела́ еси́ поко́й бeзболе́знeнный,/ пло́ти сла́сти избeжа́вши,/ eя́жe и нас изми́// твои́ми моли́твами пpeподо́бная.
Припе́в: Преподо́бне о́тче Андре́е, моли́ Бо́га о нас.
Андрею: Я́ко па́стырей изря́днейша,/ Андре́е прему́дре,/ избра́нна су́ща тя,/ любо́вию ве́лию и стра́хом молю́,/ твои́ми моли́твами спасе́ние улучи́ти,// и жизнь ве́чную.
Сла́ва Отцу́ и Сы́ну и Свято́му Ду́ху.
Троичен: Тя Тро́ице сла́вим, Еди́наго Бо́га,/ Свят, Свят, Свят еси́/ О́тче, Сы́не и Ду́ше,/ про́стое Существо́,// Еди́нице при́сно покланя́емая.
И ны́не и при́сно и во ве́ки веко́в. Ами́нь.
Богоро́дичен: Из Тебе́ облече́ся в мое́ смеше́ние,/ нетле́нная безму́жная Ма́ти Де́во,/ Бог созда́вый ве́ки,// и соедини́ Себе́ челове́ческое естество́.