Ирмос: Образу служи́ти,/ мусики́йскому согла́сию созыва́ющу лю́ди, / от пе́сней сионских поюще оте́чески, о́троцы Давидовы / мучи́телево разори́ша злочести́вое веле́ние/ и пла́мень в ро́су преложи́ша, / песнь воспева́юще: / превозноси́мый отце́в и наш Бо́же, благослове́н еси́.
Преподобне отче Максиме, моли Бога о нас.
О́бразу промышле́ния Пресвяты́я Троицы песнь благода́рственну возда́в, преподо́бне Максиме,/ вся ны призва́л еси́ благослови́ти небла́зненно Отца́, и Сына, и Свята́го Ду́ха,/ Еди́наго Бо́га в Трие́х Ипоста́сех.
Преподобне отче Максиме, моли Бога о нас.
Образ злострада́ния, терпе́ния и моли́твы показался еси́, святе Макси́ме, па́че же и упова́ния,/ я́ко Бог Суди́я пра́веден, и кре́пок, и долготерпели́в есть,/ и Тои́ возда́ст коему́ждо по делом его́.
Сла́ва Отцу́ и Сы́ну и Свято́му Ду́ху.
О́браз превы́спренняго Богослов́ия стяжа́л еси́, прему́дре Макси́ме, / сии есть догма́ты Боже́ственных апо́стол и оте́ц, / от Свята́го Паракли́та излия́нныя, и́мже и нас науча́еши Богому́дрыми свои́ми писа́нии.
И ны́не и при́сно и во ве́ки веко́в, ами́нь.
О́браз пречи́стаго Твоего́ рождества́, Де́во Ма́ти, / неизрече́нен и недове́дом есть, / Ты бо вселе́ние преве́чнаго Единоро́днаго Сына о́тча была́ еси́, не опали́вшися от Него.