Ирмо́с: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.
Пресвята́я Богоро́дице, спаси́ нас.
Арха́нгел Гаврии́л возвести́ Тебе́ та́йну, от ве́ка сокрове́нную: ны́не же Ты́, Богома́ти, прия́ла еси́ от Бо́га да́р, враго́в наше́ствие предвозвеща́ти, и от лю́тости те́х ве́рныя рабы́ Твоя́ защища́ти.
Пресвята́я Богоро́дице, спаси́ нас.
Смире́нно молю́ся Тебе́, Всеблаго́й Предвозвести́тельнице: возвеща́й ми́ при́сно неизбе́жный ча́с сме́ртный и стра́шный су́д Сы́на Твоего́, да поне́ та́ко удержу́ся от де́л грехо́вных, и́хже обы́чаем всегда́ прельще́н е́смь.
Слава: Ра́дуйся, Преблагослове́нная Де́во, жре́бий Сво́й земны́й в жили́ще и́ноком дарова́вшая; ра́дуйся, любо́вь Свою́ к ме́сту сему́, я́сно возвести́вшая; ра́дуйся, защища́ти подвиза́ющихся в Горе́ се́й обеща́вшая; ра́дуйся, от обеща́ния Своего́ никогда́ же отступа́ющая.
И ныне: Ра́дуйся, вся́ких даро́в рабо́м Твои́м всеще́драя пода́тельнице; ра́дуйся, во бране́х, в боле́знех и труде́х и́х премилосе́рдая уте́шительнице; ра́дуйся, благоде́нственное житие́ зде́, и всеблаже́нное та́мо в ве́чности и́м устроя́ющая.
Господи, помилуй (трижды).