Ирмо́с: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.
Пресвята́я Богоро́дице, спаси́ нас.
Ужасо́шася папослужи́телие, егда́ услы́шаша гла́с с небесе́, укрепля́ющь страстоте́рпцы Зогра́фския, и мзду́ на небеси́ и́м обещава́ющь, оба́че не пока́яшася, но а́ки а́спиды глусíи, неиспра́влены пребы́ша в заблужде́нии свое́м.
Пресвята́я Богоро́дице, спаси́ нас.
Не ве́сте ко́его ду́ха есте́ вы́, лати́не! Аще бо Ева́нгелие Христо́во пропове́дуете, то почто́ неслу́шающия ва́с, слуги́ Богома́тере, убива́ете и огне́м сожига́ете? Христо́с бо не повеле́ ученико́м Свои́м та́ко твори́ти.
Слава: Слы́шите, лати́не, и устыди́теся! Аще бы́ уче́ние ва́ше было́ пра́во, и ре́вность ва́ша по ве́ре Христо́ве Бо́гу уго́дна, не бы́ Цари́ца Небе́сная, чрез ико́ну Свою́, врага́ми Сы́на Своего́ нарекла́ ва́с.
И ныне: Припа́дающе ко святе́й ико́не Твое́й, Де́во, вопие́м Ти́ от се́рдца сокруше́нна: не попусти́ на́м впа́сти в се́ти ерети́ческия, Госпоже́ Всеми́лостивая, но в Правосла́вии до кончи́ны живота́ на́шего пребы́ти укрепи́ на́с.