Ирмос: Образу златому, на поле Деире служиму, трие Твои отроцы небрегоша безбожнаго веления, посреде же огня ввержени, орошаемы пояху: благословен еси, Боже отец наших.
Иисусу Сладчайшему:
Христе Иисусе, никтоже согреши на земли от века, о Иисусе мой, якоже согреших аз, окаянный и блудный. Темже, Иисусе мой, вопию Ти: поюща мя ущедри, благословен еси, Боже отец наших.
Христе Иисусе, ко страху Твоему, вопию, пригвозди мя, о Иисусе мой, и окорми ныне ко пристанищу благоотишному, яко да, Иисусе мой щедре, пою Ти спасаемый: благословен еси, Боже отец наших.
Христе Иисусе, тмами обещах Тебе, страстный, о Иисусе мой, покаяние, но солгах окаянный. Темже, Иисусе мой, вопию Ти: нечувственне пребывающую душу мою просвети, Христе, отцев Боже благословен еси.
Богородичен: Христа Иисуса рождшая странно и паче естества, Того моли, Всенепорочная, яже чрез естество моя прегрешения вся простити ми, Отроковице, да зову спасаемь: благословенна еси, Бога плотию рождшая.
Пресвятей Богородице:
Наше спасение, якоже восхотел еси, Спасе, устроити, во утробу Девыя вселился еси, Юже миру предстательницу показал еси; отец наших Боже, благословен еси.
Волителя милости, Егоже родила еси, Мати чистая, умоли избавитися от прегрешений и душевных скверн верою зовущим: отец наших Боже, благословен еси.
Сокровище спасения и источник нетления Тя рождшую, и столп утверждения, и дверь покаяния зовущим показал еси: отец наших Боже, благословен еси.
Телесныя слабости и душевныя недуги, Богородительнице, любовию приступающих к крову Твоему, Дево, исцелити сподоби, Спаса Христа нам рождшая.
Ангелу Хранителю:
Милостив буди ми и умоли Бога, Господень Ангеле, имею бо тя заступника во всем животе моем, наставника же и хранителя, от Бога дарованнаго ми во веки.
Не остави в путь шествующия души моей окаянныя убити разбойником, святый Ангеле, яже ти от Бога предана бысть непорочне; но настави ю на путь покаяния.
Слава: Всю посрамлену душу мою привожду от лукавых ми помысл и дел; но предвари, наставниче мой, и исцеление ми подаждь благими помыслы, уклонятися всегда на правыя стези.
И ныне: Премудрости исполни всех и крепости божественныя, Ипостасная Премудросте Вышняго, Богородицы ради, верою вопиющих: отец наших Боже, благословен еси.