Ирмо́с: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.
Пресвята́я Богоро́дице, спаси́ нас.
Отве́рзи, Влады́чице, уста́ моя́, и ду́х прему́дрости и стра́ха Бо́жия пода́ждь ми́, да во гла́се хвале́ния воспою́ вели́чия и ми́лости Твоя́, я́же на́м, Богома́ти, яви́ла еси́.
Пресвята́я Богоро́дице, спаси́ нас.
Отку́ду начну́, и о чесо́м пе́рвее просла́влю Тя́, Богома́ти? О о́ном ли, я́ко Рождество́м Твои́м естество́ на́ше от а́да и сме́рти ве́чныя изба́вила еси́, или́ я́ко и ны́не избавля́еши ны́ от все́х зо́л и лю́тых обстоя́ний?
Сла́ва: Во глубину́ пре́лести диа́воли па́дшее челове́чество, на го́ру и́стиннаго богопозна́ния возвела́ еси́, Влады́чице. Ны́не же в заблужде́ния ерети́ческая впа́сти на́с непопусти́ла еси́.
И ны́не: Всеблаже́нная Отрокови́це, Чи́стая Голуби́це, житие́ чи́стое проводи́ти укрепи́ на́с, и блаже́нства ве́чнаго сподо́би.