О великий угодниче Божий и богоприи́мче Симео́не! При́зри на мя грешнаго, ко святей иконе твоей припа́дающа и прося́ща твоего заступления и помощи. Скорбь бо обдержи́т мя от обстоя́щих мя ныне бед и зол, и утешения не имам многоболе́зненней душѝ моей. Иска́х бо помощи от человек, и не обре́теся. Вопия́х ко Господу и не услы́шах мя, зане прогне́вах пречистую благость Его беззако́ньми моими, и множеством многих грехов моих преогорчи́х благоутро́бную человеколю́бную утро́бу Его. И кто ми ныне помощь яви́т? Кто ми скорбь утоли́т? Кто даст отра́ду и успокое́ние многомяте́жней душѝ моей? К тебе великий угодниче Божий, прибега́ю грешный и недостойный аз, ве́дый, яко ве́лие дерзновение и́маши ко Христу Богу и многомо́щен предста́тель еси о всех, с верою к тебе прибега́ющих и твоего заступления и помощи тре́бующих. Моли убо человеколюбца Господа, яко да прости́в ми безчисленная моя прегреше́ния, не отврати́т милость Свою от мене, но яко благ и сострада́телен, яви́т и мне безконечное Свое милосердие, и в лю́тем напа́стей и бед моих озлобле́нии подаст ми всеси́льную помощь Свою, и преогорче́нней душѝ моей осла́бу, мир, укрепление, утешение и успокое́ние да́рует. Ей, великий угодниче Божий! Вознесѝ богоноснии ру́це твои ко Иже на объя́тиих твоих носитися изво́лившему Христу Богу нашему, и моли благость Его, да не отри́нет моле́ние сердца моего, недостоинства ради моего, но да яви́т мне благовременне милость Свою, во славу безконечных щедрот Своих и многомо́щнаго предста́тельства твоего, о немже подоба́ет Ему всякая слава и благодарение, ку́пно со Отцем и Пресвятым Его Духом, ныне и присно и во веки веков.