О великий угодниче Божий и богоприи́мче Симео́не! Услыши нас грешных, моля́щихся тебе и ко святей иконе твоей припа́дающих и множества ра́ди грехов наших не отъими покров твой святый от оби́тели, в нейже от лет древних многими зна́меньми и чудесы̀ просла́вися святая сия и чудотворная икона твоя, но соблюдѝ ю̀ тве́рду и непоколеби́му от всех враг видимых и невидимых, и от всех напа́стей и бед невреди́му сохрани. Бу́ди помощник благи́й всем благоче́стно живущым и до́бре тружда́ющымся в ней, и изба́ви нас от неду́гов и гла́да, от потопле́ния и огня, от внеза́пныя смерти и смертоно́сныя я́звы и от всякаго зла. Отженѝ от нас мысленнаго волка губителя, и́щуща пожра́ти и во ад свестѝ душы на́шя, оградѝ нас от искушений и соблазнов мiрски́х и от по́мыслов су́етных и душевре́дных. Утвердѝ сердца̀ наша во смиренному́дрии, кротости, послушании, безмолвии, воздержании, терпении, непамятозло́бии и любви, яже о Христе Иисусе Господе нашем, и во вся́цем деле бла́зе и по́двизех иноческих укрепѝ. Упасѝ убо, яко пастырь добрый, на па́житех Христовых в мире вся словесныя о́вцы Христовы, во дворе твоем собра́нныя, яко да благоче́стно пожи́вше во оби́тели твоей на земли, с миром отъидем во обители Небеснаго Царствия, идеже сонм праведных и святых ку́пно с тобою непрестанно славят пресвятое и благословенное имя Отца и Сына и Святаго Духа, ныне и присно и во веки веков.