Ирмос: Седмери́цею пещь/ халде́йский мучи́тель / Богочести́вым неи́стовно разжже́, / си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте, / лю́дие, превозноси́те во вся ве́ки.
Преподо́бнии отцы́ Афо́нстии, моли́те Бо́га о нас.
Афо́на насе́льницы и храни́телие, по Богоро́дице на́ши предста́телие и многообра́знии благоде́телие и назира́телие, столпи́ о́гненнии, стоя́щии с любо́вию и ра́достию о́крест Ма́тере Све́та, не преста́́йте молящеся за ны ко Го́споду.
Преподо́бнии отцы́ Афо́нстии, моли́те Бо́га о нас.
Молча́льником пе́рвейший во Афо́не Петр почита́ется, пожи́вый жи́знию невеще́ственною и прогна́вый во пло́ти безпло́тныя де́моны, и́же наг всю свою жизнь прохожда́ше/ и даро́в Ду́ха Свята́го сподо́бися бога́тно, Богоро́дицы моли́твами.
Преподо́бнии отцы́ Афо́нстии, моли́те Бо́га о нас.
Рома́на сла́вна, по́стников украше́ние и му́чеником Христо́вым весе́лие, почти́м в пе́снех, его́же ла́врская по́стница процвете́, я́ко шипо́к благоуха́нен.
Пресвята́я Богоро́дице, спаси́ нас.
Богородичен: Ра́дуйся, Храни́тельнице на́ша в настоя́щем ве́це; ра́дуйся, Предста́тельнице и непосты́дное упова́ние в бу́дущем; ра́дуйся, всему́ благо́му вход се́мо подаю́щая; ра́дуйся, прило́г вся́каго зла от жре́бия Своего́ отража́ющая.
Ин канон Преподо́бнии отцы́ Афо́нстии, моли́те Бо́га о нас.
Са́вва да похвале́н бу́дет, иера́рх Боже́ственный, и́же от Христа́ чуде́с прия́т си́лу и Се́рбскую зе́млю просвети́, я́ко со́лнце, с Симео́ном вку́пе, отце́м свои́м по пло́ти, сы́ном же по ду́ху, источи́вшим из гро́ба благово́нное ми́ро, Хиланда́рския оби́тели Боже́ственнии созда́телие.
Преподо́бнии отцы́ Афо́нстии, моли́те Бо́га о нас.
Пе́сньми почти́м Симео́на, Филофе́евския оби́тели наста́вника изря́днаго, и мироточи́ваго Си́мона, на ка́мени созда́вшего оби́тель превыс́окую наставле́нием Небе́сныя звезды́ и чуде́с си́лу от Бо́га прие́мшаго и власть на ду́хи нечи́стыя.
Сла́ва Отцу́ и Сы́ну и Свято́му Ду́ху.
Игра́й па́ки и лику́й, честна́я оби́тель Диони́сиева, возрасти́вшая Боже́ственнаго Филофе́я, по́стников украше́ние, его́же из темни́цы изба́ви Богоро́дица Мари́я,/ его́же честна́я глава́, я́ко со́лнце, просия́.
И ны́не и при́сно и во ве́ки веко́в. Ами́нь.
Богородичен: На высо́цем и све́тлем престо́ле, Влады́чице, яви́лася еси́ седя́щи, вся блиста́ющися, / ли́цы же мона́хов неизче́тни стоя́ху о́крест Тебе́,/ на полу́денных преде́лех Афо́нских и Святы́я Горы́ окре́ст, и явля́хуся, я́ко о́гненнии столпи́, и́же бы́ша ны́не восхваля́емии отцы́.