Ирмо́с: Еди́не, ве́дый челове́ческаго существа́ не́мощь и ми́лостивно в не́ вообра́жся, препоя́ши мя́ с высоты́ си́лою, е́же вопи́ти Тебе́, Святы́й, одушевле́нный хра́ме неизрече́нныя сла́вы Твоея́, Человеколю́бче.
Святи́телю о́тче Григо́рие, моли́ Бо́га о нас.
Юро́дство, прему́дре, мирску́ю му́дрость вмени́л еси́, кре́стное юро́дство возлюби́л еси́ и сего́, на ра́мо прии́м, показа́л еси́, я́коже Па́вел рече́, е́же юро́дством мирскíя му́дрости превше́д.
Святи́телю о́тче Григо́рие, моли́ Бо́га о нас.
Возлюби́л еси́, о́тче, от души́ нищету́, и смире́ние, и ху́дость, и нестяжа́тельство, челове́к бе́гая, отню́дуже гони́мь еси́ в пусты́ню, всегда́, в воню́ мѵ́р твои́х, Христо́ви зовя́ше: теку́ всле́д Тебе́.
Святи́телю о́тче Григо́рие, моли́ Бо́га о нас.
Умертви́л еси́, прему́дре, ве́тхаго тле́ющаго челове́ка воздержа́нием вся́ким и пла́чем, исто́чники сле́зными дово́льне омыва́яся, житие́м восприя́л еси́ дре́внюю свою́ добро́ту о Христе́ и в но́ваго оде́явся.
Сла́ва Отц́у и Сы́ну и Свято́му Ду́ху.
Восхва́лим, мно́жества и́нок с ме́стных же состоя́ния, со свяще́нники все́ми и пита́тельницы, гла́сы кра́сными и словесы́ боже́ственными дне́сь о́бщаго учи́теля, и́же на́с украси́вшаго де́лы же и словесы́, Григо́рия.
И ны́не и при́сно и во ве́ки веко́в. Ами́нь.
Ви́дев, ю́же жела́ше, зарю́ духо́вную, Григо́рие, предста́тельством Богома́тере, ясне́йши же ны́не Тою́ освеща́емь, Тоя́ моли́, тмы́ страсте́й на́с премени́ти Све́том благода́тным.
Го́споди, поми́луй (трижды).