Ирмо́с: Твоя́ победи́тельная десни́ца боголе́пно в кре́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяном пу́ть глубины́ новосоде́лавшая.
Святи́телю о́тче Григо́рие, моли́ Бо́га о нас.
Ты́ дарова́ний исто́чнику и прему́дрости духо́вней, пресла́вне, уста́ и мы́сль приложи́в благода́ти яви́лся еси́ пучи́на, от нея́ же ка́плю, о́тче, и мне́ пода́ждь, пою́щему тя́.
Святи́телю о́тче Григо́рие, моли́ Бо́га о нас.
Уста́в и пра́вило па́че естества́ и́ноческому жи́тельству ты́ бы́л еси́, уста́ богосло́вец же, и святи́тель, и учи́тель боже́ственная, отню́дуже, соше́дшеся вку́пе, тебе́ пе́ние плету́т.
Святи́телю о́тче Григо́рие, моли́ Бо́га о нас.
Ин яви́лся еси́ от чре́ва Иеремия ве́дом, Сотво́ршему ве́сь возложе́н, освяще́н, богоно́се, ве́сь же, отню́дуже твоя́ уста́ Бо́жия сло́ва восприя́ша.
Сла́ва Отц́у и Сы́ну и Свято́му Ду́ху.
Престо́лу предстоя́ Боже́ственному со а́нгелы, богови́дче Григо́рие, лучу́ восприе́мля ны́не явле́нне непристу́пную, моли́ся тмы́ грехо́вныя на́м разреши́тися, мо́лимся.
И ны́не и при́сно и во ве́ки веко́в. Ами́нь.
Све́т, возсия́вший, Богороди́тельнице, от Твоея́ утро́бы, ви́дети жела́я, Григо́рий, Тебе́ моли́твеницу к Соде́телю представля́ет и жела́емыя от Тебе́ получи́ благода́ти.