Ирмос: Небе́сного кру́га Верхотво́рче, Го́споди,/ и Це́ркве Зижди́телю, / Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.
Преподо́бнии отцы́ Афо́нстии, моли́те Бо́га о нас.
Преподо́бнии отцы́ Афо́нстии, вы, от Боже́ственней благода́ти подви́гшеся, в Горе́ свяще́нныя огра́ды соста́висте и по́мощию Богома́тере мно́жества мона́шествующих в па́житех спасе́ния воспита́сте. Но и ны́не о нас, ва́шем ста́де, моли́те, изба́витися нам от вся́кия ну́жды и спасти́ся душа́м на́шим.
Преподо́бнии отцы́ Афо́нстии, моли́те Бо́га о нас.
Богосло́ва вели́каго и свяще́нный орга́н Ду́ха Свята́го я́вльшагося, Григо́рия Пала́му воспева́ю, Све́та невече́рняго зри́теля, Богосло́вия ве́рным наста́вника нело́жнаго.
Преподо́бнии отцы́ Афо́нстии, моли́те Бо́га о нас.
Пра́ведно есть восхвали́ти Григо́рия друга́го, в преде́лех ла́врских све́тло пости́вшагося, и соиме́ннаго тому́ Григо́рия Боже́ственнаго, оби́тель прехва́льну себе́ воздви́гшаго.
Пресвята́я Богоро́дице, спаси́ нас.
Богородичен: Ра́дуйся, во жре́бий Себе́ Го́ру сию́ избра́вшая; ра́дуйся, Засту́пницею ме́ста сего́ бы́ти изво́лившая; ра́дуйся, ве́рным, пребыва́ющим зде, Пода́тельнице земны́х благ; ра́дуйся, Спору́чнице ве́чнаго их спасе́ния.
Ин канон
Преподо́бнии отцы́ Афо́нстии, моли́те Бо́га о нас.
Симе́нская оби́тель Дамиа́на произрасти́, Филофе́ева же па́ки друга́го возрасти́ Дамиа́на, преподобному́ченика, / и с ним Боже́ственнаго Доме́тия, и́хже да ублажи́м.
Преподо́бнии отцы́ Афо́нстии, моли́те Бо́га о нас.
Диони́сия пою́ чу́днаго, Крести́теля Иоа́нна оби́тель созда́вшего, и Доме́тия, спо́стника Диони́сиева.
Сла́ва Отцу́ и Сы́ну и Свято́му Ду́ху.
Диони́сий други́й, И́верская о́трасль, и Дамаски́н, ла́врское Боже́ственное удобре́ние, ны́не ублажа́ются, я́ко сугу́быя венцы́ прия́ша, страда́ния вку́пе и по́стничества.
И ны́не и при́сно и во ве́ки веко́в. Ами́нь.
Богородичен: Ты, Пречи́стая Де́во, спобо́рствовати обеща́лася еси́ всегда́ всем, в Горе́ сей воздвиза́ющим брань с бори́телем, борю́щим челове́ки, / те́мже, Влады́чице, по Твоему́ обеща́нию не оста́ви нас, мо́лим Тя.
Седален, глас 4.
Ужасо́шася вку́пе вся А́нгелов во́инства, ви́дяще му́жество души́ и боре́ния ва́ша, я́же па́че естества́, отцы́ знаменоно́снии, ка́ко, те́лом веще́ственным обложе́ни су́ще, безпло́тныя враги́ победи́сте, и благода́рно песнь Го́сподеви побе́дную воспе́сте: сла́ва Тебе́, Го́споди, сла́ва Тебе́, укрепля́ющему ме́ртвенное челове́ков естество́.
Сла́ва: и ны́не:
Ужаса́ет всяк ум человеколю́бие Твое́ мно́гое, Богоотрокови́це Мари́е, е́же показа́ла еси́ чи́ну и́ноческому зде постя́щихся: от всея́ бо земли́ собра́ла еси́ я в Го́ру сию́ вели́кую и я́ко Свое́ достоя́ние мона́хом сию́ дарова́ла еси́. Вели́ко вои́стинну е́же о нас промышле́ние Твое́, Присноде́во.