Ирмо́с: Спаси́телю Бо́гу,/ в мо́ри лю́ди немо́крыми нога́ми наста́вльшему/ и фарао́на со всево́инством пото́пльшему,// Тому́ Еди́ному пои́м, я́ко просла́вися.
Преподо́бне о́тче Силуа́не, моли́ Бо́га о нас.
Ума́ чистото́ю зо́ву Ма́тере Го́спода Сил вне́мляй,/ зми́я, грех поражда́ющаго, изрыгну́л еси́,/ и взыгра́ся дух твой о Бо́зе Спа́се твое́м, боголюби́ве о́тче Силуа́не,/ Его́же моли́ о чту́щих па́мять твою́.
Преподо́бне о́тче Силуа́не, моли́ Бо́га о нас.
К тебе́, крест твой взе́мшему и на го́ру безстра́стия возше́дшему,/ припа́дающе, мо́лимся, всеблаже́нне:/ воспламени́ сердца́ на́ша ко всех лю́бящему Бо́гу,/ пла́менем любве́ твоея́, в горе́нии неугаса́ющем.
Преподо́бне о́тче Силуа́не, моли́ Бо́га о нас.
Его́же возлюби́ душа́ твоя́, Сему́ уве́рился еси́,/ и к Нему́ Еди́ному прилепи́лся еси́, боголю́бче,/ и си́це искуси́теля злолука́ваго души́ твоея́ покори́л еси́,/ трудо́м, бде́нием, смире́нием и сле́зною моли́твою сего́ посрамля́я.
Сла́ва Отцу́ и Сы́ну и Свято́му Ду́ху.
Го́споди Сил, освяща́яй вся́каго челове́ка, гряду́щаго в мир,/ даждь сло́во хвале́ния усто́м мои́м,/ да превознесу́ Трисвято́е и́мя Твое́, ди́вно во святы́х Твои́х почива́ющее,/ с ни́миже и Силуа́н, возлю́бленный Твой, мо́лит Тя о душа́х на́ших.
И ны́не и при́сно и во ве́ки веко́в, ами́нь.
Ско́рбных наведе́ния обурева́ют убо́гую мою́ ду́шу,/ и напа́стей о́блацы мое́ покрыва́ют се́рдце, Богоневе́сто,/ но, Свет ро́ждшая Боже́ственный и преве́чный,/ возсия́й мне свет ра́дости, моли́твами Силуа́на, уго́дника Твоего́.