Помяни, Господи Иисусе Христе Боже наш, милости и щедроты Твоя от века сущыя, ихже ради и вочеловечился еси, и распятие и смерть, спасения ради право в Тя верующих, претерпети изволил еси: и воскрес из мертвых, вознеслся еси на небеса, и седи́ши одесную Бога Отца, и призираеши на смиренныя мольбы всем сердцем призывающих Тя: приклони ухо Твое, и услыши смиренное моление мене непотребнаго раба Твоего, в воню́ благоухания духовнаго, Тебе за вся люди Твоя приносящаго. И в первых помяни Церковь Твою святую, соборную и апостольскую, юже снабдел еси честно́ю Твоею кровию, и утверди, и укрепи, и разшири́, умножи, умири́ и непреобориму адовыми враты́ во веки сохрани: раздирания церквей утиши́, шатания языческая угаси, и ересей востания скоро разори и искорени, и в ничтоже силою Святаго Твоего Духа обрати.
Спаси, Господи, и помилуй благочестивейшаго, самодержавнейшаго, великаго государя нашего императора Николая Александровича всея́ России: супругу его, благочестивейшую государыню императрицу Александру Феодоровну: матерь его, благочестивейшую государыню императрицу Марию Феодоровну: наследника его, благоверного государя цесаревича и великаго князя Алексия Николаевича, и весь царствующий дом: благоверных, правительствующий синклит, военачальники, градоначальники, и все христолюбивое воинство: огради миром державу их, и покори под но́зе их всякаго врага и супостата, и глаголи мирная и благая в сердцах их о Церкви Твоей святей и о всех лю́дех Твоих: да и мы, в тишине их, тихое и безмолвное житие поживем в правоверии, и во всяком благочестии и честности.
Спаси Господи, и помилуй Святейший Правительствующий Синод, и святейшыя вселенския патриархи, и преосвященныя митрополиты, архиепископы и епископы православныя, иереи же и диаконы, и весь при́чет церковный, яже поставил еси пасти́ словесное Твое стадо, и молитвами их помилуй и спаси мя грешнаго.
Спаси, Господи, и помилуй отца моего духовнаго (имя его), и святыми его молитвами прости моя согрешения.
Спаси, Господи, и помилуй родители моя (имена их), братию, и сестры, и сродники моя по плоти, и вся ближния рода моего, и други, и да́руй им мирная Твоя и премирная благая.
Спаси, Господи, и помилуй старцы и юныя, нищыя и сироты и вдовицы, и сущыя в болезни и в печалех, беда́х же и ско́рбех, обстояниих и пленениих, темницах же и заточениих, изряднее же в гонениих, Тебе ради и веры православныя, от язык безбожных, от отступник и от еретиков, сущыя рабы Твоя: и помяни я́, посети, укрепи, уте́ши, и вскоре силою Твоею ослабу, свободу и изба́ву им подаждь.
Спаси, Господи, и помилуй ненавидящыя и обидящыя мя, и творящыя ми напасти, и не остави их погибнути мене ради грешнаго.
Отступившыя от православныя веры и погибельными ересьми́ ослепленныя, светом Твоего познания просвети, и святей Твоей, апостольстей, соборней Церкви причти́.