О преславный мучениче и до́блий воине Небеснаго Царя, Пантелеи́моне преблаженне, Милостиваго Бога преизрядный подражателю, иже, Христа на земли дерзновенно исповедав и многообразныя за Него муки претерпев, неувядаемый приял еси венец на небесѝ, иде́же вечнаго наслаждаешися блаженства и со дерзновением престолу Трисолнечнаго Божества предстои́ши! Ко твоему христоподражательному состраданию по Бозе прибегаем мы грешнии, и всеусердно тя, теплаго заступника и предстателя нашего, молим: не престай призира́ти на нас, в ну́ждах и скорбных обстояниих сущих, но твоею молитвенною помощию и цельбоподательною силою избавляй нас присно от лютых зол, всегубительства и всякия иныя беды̀ и болезни. Ты бо приял еси, святе, неоскудную благодать исцелений от Спаса нашего Иисуса Христа за твердую к Нему веру, твоим непорочным житием запечатленную мученичеством же и многопобедною твоею кончиною увенча́нную, в нейже по да́нней ти благодати и от Христа Пантелеи́мон, милости тезоименит, наименован был еси. сего ради, ве́дуще тя милостиваго ко всем помощника и целителя, с верою к тебе взираем: твоим богоприятным хода́тайством подавай нам вся благопотребная в житии сем и нужная к вечному спасению. Мученическим же дерзновением твоим умоли Милостиваго Бога, да помилует нас грешных и недостойных по велицей милости Своей, да избавит от тру́са, потопа, огня, меча и всякаго праведнаго гнева и преще́ния, благовременне подвизая нас ко очистительному и умилостивительному во гресе́х наших покаянию, ради множества щедрот Своих: да подаст всем нам безбедное, тихое и богоугодное житие, правосавному же императору нашему Николаю Александровичу на вся врагѝ побе́ду и одоле́ние, и всех нас от враг видимых и невидимых да сохранит благодатию Своею и непобедимым ополчением Ангел Своих, имиже огражда́еми и наставля́еми да поживем в ве́це сем в покаянии, чистоте и в творении богоугодных дел: да сподобимся же твоим теплым предстательством христианскую кончину улучи́ти безболезнену, ми́рну, непосты́дну, и избавитися от козней воздушных князей тьмы и от вечныя муки, и наследницы безконечнаго, всеблаженнаго Царства Его быти. Ей, угодниче Божий! не престай моли́тися за ны̀ грешныя, да твоим хода́тайством от временных и вечных бед избавлени, величаем тя, заступника нашего и молитвенника, и вечно прославляем общаго Владыку и Господа нашего Иисуса Христа, Емуже подобает всякая слава, честь и поклонение, со Безначальным Его Отцем, и Пресвятым Духом, ныне и присно и во веки веков.