А́нгел земны́й и челове́к небе́сный яви́лся еси, о́тче свя́ты́й Силуа́не, егда служи́ти Го́сподеви в преподо́бии и пра́вде вожделе́л еси. сего ра́ди, вели́ким отце́м дре́вним подража́я, равноа́нгельно во оби́тели ру́сстей свя́та́го великому́ченика Пантелеи́мона пожи́л еси и та́мо сия́нием Свята́го Ду́ха озаре́нный, у́м Христо́в стяжа́л еси и бы́л еси таи́нник Бо́жия благода́ти, о́браз богоуго́днаго жития показа́л еси. ны́не же предстоя престо́лу Святы́я Тро́ицы, вку́пе с лики преподо́бных оте́ц афо́нских, моли́ся о на́с, бла́гогове́йне чту́щих тя и зову́щих тебе си́це:
Ра́дуйся, правосла́вною ру́сскою земле́ю рожде́нный:
ра́дуйся, роди́телей бла́гочести́вых ча́до бла́гослове́нное.
Ра́дуйся, Бо́га все́м се́рдцем и все́ю душе́ю возлюби́вый:
ра́дуйся, ве́ру свя́ту́ю, я́ко многоце́нный би́сер стяжа́вый.
Ра́дуйся, се́рдце твое во́ли Бо́жией всеце́ло покори́вый:
ра́дуйся, оте́чество земно́е, до́м сво́й, отца и ма́терь Христа́ ра́ди оста́вивый.
Ра́дуйся, на свя́ту́ю го́ру афо́нскую невозбра́нно прише́дый:
ра́дуйся, во оби́тель ру́сскую на горе се́й всели́выйся.
Ра́дуйся, в смире́нии и послуша́нии о́браз а́нгельския красоты яви́вый:
ра́дуйся, непреста́нною моли́твою на высоту безстра́стия возше́дый.
Ра́дуйся, бла́говоле́нием и любо́вию Бо́жия Ма́тере осене́нный:
ра́дуйся, на небе́си и на земли ны́не просла́вленный.
Ра́дуйся, преподо́бне Силуа́не, пропове́дниче любви ко враго́м и наста́вниче смире́нию и моли́тве.