Ирмо́с: Стра́нствия Влады́чня и безсме́ртныя трапе́зы на го́рнем ме́сте высо́кими умы́, ве́рнии, прииди́те, наслади́мся, возше́дша Сло́ва, от Сло́ва научи́вшеся, Его́же велича́ем.
Ми́лостиве Го́споди, услы́ши моли́тву раб Твои́х, моля́щихся Тебе́.
Стра́нствующа мя́ за́поведи преступле́нием, пло́ти прия́тием Ты́, Влады́ко, ми́лостивно Себе́ приедини́л еси́, и безсме́ртныя трапе́зы соо́бщника мя́ прия́л еси́, и ве́рою, Сло́ве, насади́л еси́: пою́ Твою́ безме́рную ми́лость.
Преподо́бнии отцы́ Симео́не и Са́вво, моли́те Бо́га о нас.
Мно́жество согреше́ний испове́дающе, се́рдце и уста́ оскверни́хом, глубину́ беззако́ния открыва́юще, и возду́х нечистото́ю помрачи́хом, Тебе́, Го́споди, си́х очисти́телю, вопие́м: Твоя́ есмы́ тва́рь, поми́луй на́с вели́кия ра́ди ми́лости Твоея́.
Преподо́бнии отцы́ Симео́не и Са́вво, моли́те Бо́га о нас.
Кто́ не диви́тся и кто́ не сла́вит Твое́, Влады́ко, долготерпе́ние: презре́ беззако́ния, и, преступа́я непра́вды, премину́еши нече́стие, и, все́ грехи́ на́ша обраща́я, ми́луеши, и гне́ва не наво́диши, кто́ изглаго́лет щедро́ты Твоя́?
Сла́ва: Кто́ е́сть Бо́г, я́ко Ты́, Бо́г на́ш, Его́же небеса́ со а́нгелы ужаса́ются и земля́ с челове́ки потряса́ется, бе́здны смуща́ются, и а́д испромеща́ется, вся́ тва́рь со стра́хом изменя́ется, кто́ изглаго́лет си́лы Твоя́?
И ны́не: Моле́ние мое́ приими́ убо́гое и пла́ча моего́ не пре́зри, и сле́з, и стена́ния; но заступи́ мя, я́ко Блага́я, и проще́ния испо́лни: мо́жеши бо вся́, я́ко Всемо́щнаго Влады́ки Бо́га Ма́ти, а́ще возмога́еши то́кмо моему́ окая́нному смире́нию.