Ирмо́с: Угрожа́й ца́рь иногда́ ю́ношам, пе́щь угото́ва, и непови́нным повеле́ вве́рженным бы́ти, испове́дающим Бо́га препросла́вленнаго, Его́же благословя́т творе́ния всея́ тва́ри во ве́ки.
Ми́лостиве Го́споди, услы́ши моли́тву раб Твои́х, моля́щихся Тебе́.
Те́ло зло́биво, души́ сопроти́вно, пренечи́сто име́я, все́м житие́ блу́дно исхода́тайствовав, бесо́м жили́ще себе́ поста́вих, и́же при́сно уби́ти мя́ поуча́ются, к Тебе́, Го́споди, прибега́ю: в руку́ Твое́ю дыха́ние всея́ тва́ри.
Преподо́бнии отцы́ Симео́не и Са́вво, моли́те Бо́га о нас.
Мно́гих удиви́сте, ева́нгельски Христу́ после́довавше, поще́нием же и смире́нием оби́льно в пусты́не обогати́стеся, Симео́не блаже́нне и Са́вво свяще́нне, дво́ице святодуше́вная, Тро́ице ны́не о на́с моли́теся.
Преподо́бнии отцы́ Симео́не и Са́вво, моли́те Бо́га о нас.
Вся́, я́же на земли́, оста́вивше, все́х Царю́, Христу́, усе́рдно после́довасте, те́м на небесе́х вы́шняго Иерусали́ма гра́ждане ва́с досто́йно всели́л е́сть, иде́же чту́щих ва́с усе́рдно, а́ще и вели́ко е́сть проси́мое, в свое́ покрови́тельство приими́те.
Сла́ва: Ме́чь, блиста́ющь с небе́с, упи́вшийся кро́вию, и се́рп летя́щь, я́же ви́де проро́к, — гне́в Тво́й, Го́споди, на согреша́ющия и до возме́здия сме́рти необрати́мых, я́ко Ми́лостив и Благоутро́бен, отврати́ от на́с моли́твами святы́х Свои́х.
И ны́не: Ра́дуйся, престо́ле огнеобра́зный Госпо́день; ра́дуйся, Боже́ственная и манноприе́мная ру́чко; ра́дуйся, златы́й свети́льниче, свеще́ неугаси́мая; ра́дуйся, де́вам сла́во и ма́терем украше́ние и похвало́.