Ирмо́с: Яви́ся на ны́ благода́ть Твоя́, Спа́се, и све́т Креста́ Твоего́ возсия́ мíрови: благослове́н еси́, Го́споди, Бо́же оте́ц на́ших.
Ми́лостиве Го́споди, услы́ши моли́тву раб Твои́х, моля́щихся Тебе́.
Боже́ственным Свои́м, Го́споди, призре́нием при́зри на ны́, лю́ди Твоя́, и вонми́ мольбе́ ра́б Твои́х, Человеколю́бче, и изба́ви на́с греха́ сме́рти душегу́бныя, и супроти́вных нахо́да, и вся́каго муче́ния.
Преподо́бнии отцы́ Симео́не и Са́вво, моли́те Бо́га о нас.
Нетле́нную сла́ву прия́сте на небесе́х, на земли́ же па́мять ва́шу ублажа́ем, Симео́не и Са́вво достохва́льнии, о́в бо мѵропода́телен, другíй же чи́ст и благоуха́нен, о́ба ко Христу́ моли́твами на́с спаси́те.
Преподо́бнии отцы́ Симео́не и Са́вво, моли́те Бо́га о нас.
Егда́ престо́лы поста́вятся и кни́ги де́л отве́рзутся, ко́злищ у́части, гре́шных стоя́ния изба́вити, овца́м же десны́м святы́м Его́ причти́ти, преподо́бнии, Христу́ Царю́ моли́теся пою́щих ва́шу па́мять.
Сла́ва: Бо́г ми́лостив и ще́др, Бо́г ревни́в и наказа́ющь, мно́го у Тебе́ ми́лости, мно́го же и осужде́ния, на ли́ца не взира́еши, коему́ждо по дело́м его́ су́диши, моли́твами святы́х Твои́х не преда́ждь на́с пра́ведному Твоему́ суду́.
И ны́не: Ви́ждь ми́лостивым о́ком Твои́м, и посети́ озлобле́ние, е́же и́мам, и лю́тых напа́стей, и вре́да, и бе́д, и от искуше́ний мя́ изба́ви безме́рною ми́лостию Твое́ю.