Ирмос: Ты моя кре́пость, Го́споди,/ Ты моя́ и си́ла, / Ты мой Бог, Ты мое́ ра́дование, / не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твоей сла́ва, Человеколю́бче.
Преподо́бнии отцы́ Афо́нстии, моли́те Бо́га о нас.
Бо́га возлюби́вше от всея́ души́, преподо́бнии, вели́кия по́двиги соверши́ли есте́, та́же бли́жняго те́пле возлюби́вше, в разли́чных ме́стех Афо́на оби́тели воздви́гли есте́ и общежи́телей мно́жества в ты́я собра́ли есте́. / Моли́теся у́бо, чадолюби́вии отцы́, и нам любве́ исполни́тельми бы́ти и спасти́ся душа́м на́шим.
Преподо́бнии отцы́ Афо́нстии, моли́те Бо́га о нас.
Пе́сньми почита́ю настоя́теля Ватопе́дскаго Евфи́мия,/ и́же свя́зан бысть вери́гами и погрузи́ся во глубине́ морсте́й,/ изобличи́ же у́мысл латиному́дренных и вене́ц муче́ния от руки́ Госпо́дни неувяда́емый прия́л есть.
Преподо́бнии отцы́ Афо́нстии, моли́те Бо́га о нас.
Совоспева́ю и друга́го честна́го Евфи́мия, И́верския оби́тели созда́теля, я́ко, служа́щу ему́ не́когда Бо́гу, столп узре́ся от су́щих с ним солнцеобра́зен. И Дохиа́рскаго созда́теля пою́, друга́го па́ки преподо́бнаго Евфи́мия.
Пресвята́я Богоро́дице, спаси́ нас.
Богородичен: Ра́дуйся, те́плая Хода́таице о живу́щих во жре́бии Твое́м; ра́дуйся, ми́лость Сы́на Твоего́ до сконча́ния ве́ка ме́сту сему́ обеща́вшая; ра́дуйся, благода́ть Его́ неотсту́пну бы́ти предре́кшая; ра́дуйся, ра́досте и спасе́ние душ на́ших.
Ин канон
Преподо́бнии отцы́ Афо́нстии, моли́те Бо́га о нас.
Восхвали́ти Феодо́сия досто́ит, Филофе́евския оби́тели наста́вника, и Феофа́на по́стника, Дохиа́рския оби́тели Боже́ственное удобре́ние, и Филаделфи́йскаго Феоли́пта высокоразу́мнаго, Честны́я Тро́ицы служи́тели ве́рныя.
Преподо́бнии отцы́ Афо́нстии, моли́те Бо́га о нас.
Фео́ну ка́ко оста́влю непохвале́на, свети́льника оби́тели Пантокра́торския и святи́теля по́слежде бы́вша Фессалони́тскаго? Ка́ко же словесы́ не почту́ Фео́фила мироточи́ваго, благоуха́ние испуща́ющаго па́че всех арома́т?
Сла́ва Отцу́ и Сы́ну и Свято́му Ду́ху.
Свяще́нныя оби́тели И́верския созда́теля похва́лим, Иоа́нна преподо́бнаго, Евфи́миева по пло́ти отца́, и с ним па́ки И́верския о́трасли, Иа́кова Богому́драго и Иа́кова друга́го, тве́рдыя Христо́вы преподобному́ченики пои́м.
И ны́не и при́сно и во ве́ки веко́в. Ами́нь.
Богородичен: Коль мно́гое промышле́ние Твое́ о Горе́ сей, Влады́чице! Ты бо рекла́ еси́, я́ко бу́деши в доброде́телех наста́вник и учи́тель всем, до́бре в ней живу́щим, пита́тель же и врач душ и теле́с их.