Ирмос: На камени мя веры утвердив, разширил еси уста моя на враги моя. Возвесели бо ся дух мой, внегда пети: несть свят, якоже Бог наш, и несть праведен паче Тебе, Господи.
Иисусу Сладчайшему:
Услыши, человеколюбче Иисусе мой, раба Твоего, вопиюща во умилении, и избави мя, Иисусе, осуждения и муки, едине долготерпеливе, Иисусе Сладчайший многомилостиве.
Подъими раба Твоего, Иисусе мой, припадающа со слезами, Иисусе мой, и спаси, Иисусе мой, кающагося мя и геенны, Владыко, избави, Иисусе Сладчайший многомилостиве.
Время, Иисусе мой, еже дал ми еси, во страсти иждих, Иисусе мой. Темже, Иисусе мой, не отвержи ми, но воззови, молюся, Владыко Иисусе Сладчайший, и спаси.
Богородичен: Дево, рождшая Иисуса моего, моли избавити мя геенны, едино предстательство оскорбляемых, Богоблагодатная, и сподоби мя жизни, Всенепорочная, нестареющияся.
Пресвятей Богородице:
Предстательство и покров жизни моей полагаю Тя, Богородительнице Дево: Ты мя окорми ко пристанищу Твоему, благих виновна, верных утверждение, едина всепетая.
Молю, Дево, душевное смущение и печали моей бурю разорити: Ты бо, Богоневестная, начальника тишины Христа родила еси, едина пречистая.
Благодетеля рождши добрых виновнаго, благодеяния богатство всем источи, вся бо можеши, яко сильнаго в крепости Христа рождши, Богоблаженная.
Лютыми недуги и болезненными страстьми истязаему, Дево, Ты ми помози: исцелений бо неоскудное Тя знаю сокровище, Пренепорочная, неиждиваемое.
Ангелу Хранителю:
Все помышление мое и душу мою к тебе возложих, хранителю мой; ты от всякия мя напасти вражия избави.
Враг попирает мя и озлобляет, и поучает всегда творити своя хотения; но ты, наставниче мой, не остави мене погибающа.
Слава: Пети песнь со благодарением и усердием Творцу и Богу даждь ми и тебе, благому Ангелу Хранителю моему; избавителю мой, изми мя от враг, озлобляющих мя.
И ныне: Исцели, Пречистая, моя многонедужные струпы, яже в души, прожени враги, иже присно борются со мною.
Таже: Господи, помилуй. (Трижды)
Седален Иисусу
Спасе мой Иисусе, блуднаго спасый, Спасе мой Иисусе, приемый блудницу, и мене ныне помилуй, Иисусе многомилостиве, спаси, ущедри, о Иисусе благодетелю, якоже, Благоутробне, Манассию, Иисусе мой, яко един человеколюбец.
Слава: Седален Ангелу
От любве душевныя вопию ти, хранителю моей души, всесвятый мой Ангеле: покрый мя и соблюди от лукаваго ловления всегда, и к жизни настави небесней, вразумляя и просвещая, и укрепляя мя.
И ныне: Богородичен
Богородице безневестная пречистая, Яже без семене рождши всех Владыку, Того со Ангелом-хранителем моим моли избавити ми ся всякаго недоумения и дати умиление и свет души моей, и согрешением очищение, Яже едина вскоре заступающи.