Ирмос: Колесницегони́теля фарао́ня погрузи́, чудотворя́й иногда́ Моисе́йский жезл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, песнь Бо́гови воспева́юща.
Припев: Пресвята́я Богоро́дице, спаси́ нас.
От скве́рных усте́н хвале́ние приими́, Всенепоро́чная, я́коже пре́жде Сын Твой, Бог же мой и Госпо́дь, прия́т две ле́пты вдови́цы, и разреше́ние прегреше́ний мои́х пода́ждь, я́ко да по до́лгу велича́ю Тя.
Пресвята́я Богоро́дице, спаси́ нас.
А́нгельское пе́ние подоба́ше Тебе́, Ма́тери Бо́жией, Творца́ бо сих родила́ еси́ стра́нно. Но и от нас приими́, Влады́чице, смире́нныя сия́ моли́твы, да пое́м Го́сподеви: сла́вно просла́вися в на́шей не́мощи.
Слава: Огусте́ша во́ды, огусте́ша и во́лны посреде́ мо́ря, нося́щя Твою́, Богома́ти, ико́ну. Утверди́ и мое́ подви́гшееся се́рдце на ка́мени за́поведей Христо́вых.
И ныне: Помо́щница и Покрови́тельница была́ еси́, Де́во, оби́тели И́верския, во́ев Ами́ры с корабли́ их в мо́ри погрузи́вши, но потопи́ в пучи́не милосе́рдия Сы́на Твоего́ вся моя́ душе́вныя стра́сти и безчи́сленная моя́ прегреше́ния.