Пренепорочная Госпоже, небесе и земли Царице, Пречистая Дево Богородице! Смиренно припа́дая молюся Тебе: помози ми, едина многомощная Владычице, единому грешному, приими недостойное мое моление, и принеси единородному Твоему Сыну, Богу моему, яко да милостив будет стра́стней и ско́рбней души моей: Сам бо за множество беззаконий моих не смею простретися и просити прощения, но Тебе предлагаю Ходатаицу и теплую Молитвенницу яко матернее к рождшемуся из Тебе Богу имаши дерзновение, и ничтоже Тебе невозможно, аще точию восхощеши. Не призри моих слез, не возгнушайся воздыхания моего, не отрини сердечныя моея болезни, оживи умерщвленнаго мя страстьми. Свет невечерний возсиявшая нам, душу мою, омраченную злодеяньми, просвети: Врача рождшая, уврачуй души моея неисцельныя язвы: волнующагося житейскою бурею, на стезю мя покаяния направи. Приими, Госпоже всемилостивая, молебную сию службу мою, и человеколюбивому Богу принеси. О прекрасная Палато Владычня, сотвори мя дом Божественнаго Духа: светоносная Сене небесная, духовную благодать во мне грешнем направи. Ру́це мои недостойныя воздеваю, и сердце и устнѐ скверныя ко хвалению Тебе, Всенепорочная, исправляю, да душетленных мя пакостей избавиши. Всякия нечистыя помыслы от сердца моего отженѝ, язык мой полезная глаголати исправи, очесе́м моим подаждь слезы, на омытие скверны греховныя, нозе мои устрой непреткновенно к деланию заповедей Божественных ходити. Руце мои соделай к вышнему на воздеяние благоприятное, слух мой отверзи ко усердному слышаниюзаповедей Божественнаго Евангелия, яко да и творити я̀ возмогу, Тобою, всесильная Царице, укрепляемь: и подаждь ми время покаяния и от внезапныя смерти свободи мя. На кончине же предста́ни ми, всемилостивая Мати, в разлучении души от страстнаго моего тела, от воздушных мытарей и князей темных изимающи мя, и рукописание многих грехов моих раздирающи, одесну́ю же блаженнаго стояния на Страшнем Суде сподоби мя. Ты свет омраченнаго ума моего, Ты утешение души моей, Ты упование спасения моего, Ты едина непостыдная Предстательница к Богу: Егоже милостива мне сотвори, Владычице, и присносущных благ наследника яви мя в будущей жизни, идеже есть всех веселящихся жилище: яко да и тамо Тя, премилостивая Молитвеннице, сподоблюся велича́ти, и сла́вити великолепое имя Сына Твоего, Христа Спасителя и Бога нашего, со Безначальным Его Отцем, и Всесвятым и Благим и Животворящим Духом, во веки веков.