Согрешихом, беззаконновахом и неправдовахом пред Тобою, Преблагий Владыко: преступихом спасительные Твоя заповеди и священныя обеты наша, яже во святем Крещении пред святым Твоим жертвенником, пред Ангелы же и человеки сотворихом: преобидехом Честную Кровь завета Твоего, еюже освятихомся, общение искупления приемше: дух благодати обезчестихом, страшнаго же и преестественнаго сыноположения небрегохом: всякое писание, Божественный закон и учение богодухновенное, ударения возду́ха тщая, и вещания едина токмо, деяний пустая, в нас вменишася: именем токмо и словесы честное Евангелие истиннаго христианства окаяннии содержи́м: руце имамы ко всякому хищению и лихоимству прилежны, нозе же скоро и дерзостно ко всякой неправде зле текущя, готовы часть братнюю ивосхищати и попирати, снедающя убогих: уста, священных молитв и слова Божия орга́н, всякия нечистоты̀, суесловия и клятвопреступления, бесом сотворихом во орга́н: очи и вся наша чувства блужения и всякаго сквернения премножеством исполнихом: в нас царствующаго ума Божественное благодати семя поправше, и уды Твоя, Христе, блудничи уды сотворивше, вместо храма Божия, тли и всякия нечистоты̀ хранилище обретохомся. Сего ради, Преблагий Владыко, многое Твое человеколюбие в стужение претворихом окаяннии, и многая Твоя благая дарования в казнь безумно нам преложихом: отнюдуже нижѐ от сущих нам благих, нижѐ от болезней ближних лучши бывше, праведно на ны̀ сами Твоего праведнаго наказания язвы подвигохом. Но не яростю Твоею обличи нас, ниже гневом Твоим накажеши нас, Господи. Тебе Единому согрешихом, но Тебе Единому и покланяемся, и сокрушенным сердцем, яко жертву чистую, исповедание Ти приносим: ослаби, Человеколюбче Владыко, устави праведно наносимую рану: да победит множество щедрот Твоих, грехав наших лукавое собрание, и Твоея безчисленныя благости пучина да покрыет горькое слез наших море. Имамы в руках Твоего человеколюбия образ и величество: разбойника, мытаря, блудницу и блуднаго сына, иже вси паче нас в покаянии благоискусствующе, в Небесное Царство предвзыдоша. С ними убо и ны исповедающяся и припадающя Ти приими, Владыко: аще же и тех всяческаго обращения и покаяния множества отстоим, недоставшее да исполнит безмерная благость Твоя, паче же и все, понеже и всего воистину отстоим. Приносим Ти рыдания убогих и гласы младенцев, смиренную и препро́стую, всякаго возраста молящихся часть, достойную щедрот и прощения Твоего. Имаши к сему на милосердие и милость преклоняющыя Тя крест и вольную смерть, юже за ны неблагодарныя претерпел еси, подвиги ктому апостолов, преподобных, постников, и мучеников крови: пред всеми же общую всех надежду и спасение, паче сло́ва без семене рождшую Тя: ихже мольбы человеколюбно прием, услыши ны, Иисусе Сладчайший, молящыя Ти ся, и нижѐ токмо о нас самех, но и о нихже должни есмы: пособствуй благочестивейшему, самодержавнейшему, великому государю нашему, императору Николаю Александровичу всея Россиии и всему царствующему дому, всей палате, воинству и всей державе их, даруй на супостаты победу, и царство их миром огради. Спаси же и помилуй святейший правительствующий Синод, со всеми благочестивыми архиереи, и весь освященный чин и причет церковный, и даруй им цело, безмятежно, благоверно, право, по преданию святых апостол и святых отец, на вселенских соборах Духом Святым узаконенному, исправляти слово Твоея истины: заблуждшыя же от православныя веры еретики и отступники к познанию истины призови: неверныя просвети, да Тя уведят: грешныя к покаянию приведи: девствующим чистоту и воздержание даруй, брачным святыню: вдовицам и сирым даруй воспитание, нищим покров, странствующим возвращение, плавающим пристанище: кающимся прощение даруй, плачущим утешение, благим во благости пребывати, средним лучшым быти, согрещающим во исправление приходити. Ей, Иисусе Сладчайший, молимся Ти: даждь грехом нашым оставление, ума благопостояние, тела здравие, житию нуждная довольная, мир во днех наших, воздуха благорастворение, земли благоплодие, веры православныя возращение, и соединение святых Твоих церквей, низложение ересе́й, советов нечестивых разорение, огнь любве и всякаго благочестия, в молитве чистоту сердечную, в злоключении терпение и великодушие, в надежде веселие: и всякое душевному нашему и телесному здравию и спасению полезное, паче же великолепей Твоей славе подобающее прошение даруй, и исполни по неизмерным щедротам Твоим, избавляя ны от належащаго праведнаго прещения, губительства, труса, потопа, огня, меча и всякия смертоносныя язвы: и не хотяй смерти грешника, даруй нам время ко покаянию, яко да и настоящих зол и будущих вечных мук свободимся, благодатию и человеколюбием Безначальнаго Твоего Отца, с Нимже благословен еси, со Пресвятым, Благим и Животворящим Твоим Духом, ныне и присно и во веки веков.