Їрмо́съ: Хрⷭ҇то́съ моѧ̀ си́ла, / бг҃ъ и҆ гдⷭ҇ь, чⷭ҇тна́ѧ цр҃ковь / бг҃олѣ́пнѡ пое́тъ взыва́ющи, / ѿ смы́сла чи́ста ѡ҆ гдⷭ҇ѣ пра́зднꙋющи.
Припѣ́въ: Сла́ва гдⷭ҇и, ст҃о́мꙋ воскрⷭ҇нїю твоемꙋ̀.
Дре́во процвѣло̀ є҆́сть хрⷭ҇тѐ, и҆́стинныѧ жи́зни: / крⷭ҇тъ бо водрꙋзи́сѧ, / и҆ напое́нъ бы́въ кро́вїю и҆ водо́ю ѿ нетлѣ́ннагѡ твоегѡ̀ ребра̀, / живо́тъ на́мъ прозѧбѐ.
Припѣ́въ: Сла́ва гдⷭ҇и, ст҃о́мꙋ воскрⷭ҇нїю твоемꙋ̀.
Не ктомꙋ̀ ѕмі́й мнѣ̀ ло́жнѣ ѡ҆боже́нїе подлага́етъ: / хрⷭ҇то́съ бо бг҃одѣ́латель чл҃вѣ́ческагѡ є҆стества̀, / ны́нѣ невозбра́ннѡ стезю̀ живота̀ мнѣ̀ ѿве́рзе.
Припѣ́въ: Прест҃а́ѧ бцⷣе, сп҃сѝ на́съ.
Бг҃оро́диченъ: Ꙗ҆́кѡ вои́стиннꙋ неизвѣща̑нна и҆ непостижи̑ма, / ꙗ҆̀же твоегѡ̀ бг҃олѣ́пнагѡ бцⷣе сꙋ́ть ржⷭ҇тва̀, / сꙋ́щымъ на землѝ и҆ на нб҃сѝ, приснодв҃о, та̑инства.
И҆́нъ. Припѣ́въ: Сла́ва гдⷭ҇и, крⷭ҇тꙋ̀ твоемꙋ̀ чⷭ҇тно́мꙋ и҆ воскрⷭ҇нїю.
Чⷭ҇тны́й крⷭ҇тъ тво́й почита́емъ, и҆ гво́зди хрⷭ҇тѐ, / и҆ ст҃о́е копїѐ съ тро́стїю, вѣне́цъ и҆́же ѿ те́рнїй, / и҆́миже ѿ а҆́дова и҆стлѣ́нїѧ и҆зба́вихомсѧ.
Припѣ́въ: Сла́ва гдⷭ҇и, крⷭ҇тꙋ̀ твоемꙋ̀ чⷭ҇тно́мꙋ и҆ воскрⷭ҇нїю.
Гро́бъ сп҃се тѧ̀ под̾ѧ́тъ во́лею ме́ртва ѡ҆ на́съ ꙗ҆́вльшагосѧ, / но ника́коже возмо́же сло́ве, ѹ҆держа́ти: / ꙗ҆́кѡ бг҃ъ бо воскрⷭ҇лъ є҆сѝ, сп҃са́ѧ ро́дъ на́шъ.
Припѣ́въ: Прест҃а́ѧ бцⷣе, сп҃сѝ на́съ.
Крⷭ҇тобг҃оро́диченъ: Бг҃ороди́тельнице приснодв҃о, / сп҃са хрⷭ҇та̀ человѣ́кѡмъ ро́ждшаѧ, / ѿ бѣ́дъ и҆ мꙋ́къ и҆зба́ви на́съ, / прибѣга́ющихъ вѣ́рою къ бж҃е́ственномꙋ покро́вꙋ твоемꙋ̀.
И҆́нъ. Припѣ́въ: Прест҃а́ѧ бцⷣе, сп҃сѝ на́съ.
Пое́мъ пречⷭ҇таѧ тебѐ всенепоро́чнꙋю, / и҆̀же тобо́ю сп҃сшїисѧ, / и҆ бл҃гоче́стнѡ пою́ще взыва́емъ: / бл҃гослове́нна, ꙗ҆́же бг҃а приснодв҃о ро́ждшаѧ.
Припѣ́въ: Прест҃а́ѧ бцⷣе, сп҃сѝ на́съ.
Свѣ́тъ незаходи́мый дв҃о родила̀ є҆сѝ, / сꙋ́щымъ во тьмѣ̀ житїѧ̀, / пло́тїю свѣтѧ́щъ всебл҃же́ннаѧ, и҆ пою́щымъ тѧ̀, / ра́дость приснодв҃о и҆сточи́ла є҆сѝ.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ.
Бл҃года́ть процвѣтѐ, зако́нъ преста̀, тобо́ю всест҃а́ѧ: / ты́ бо чⷭ҇таѧ, родила̀ є҆сѝ гдⷭ҇а, / подаю́щаго на́мъ приснодв҃о, ѡ҆ставле́нїе.
И҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Ме́ртва мѧ̀ показа̀ сада̀ вкꙋше́нїе, / жи́зни же дре́во и҆з̾ тебѐ ꙗ҆́вльшеесѧ пречⷭ҇таѧ, воскр҃сѝ, / и҆ ра́йскїѧ сла́дости наслѣ́дника мѧ̀ ѹ҆стро́и.
Катава́сїа: Сѣдѧ́й въ сла́вѣ, / на прⷭ҇то́лѣ бж҃ества̀, / во ѻ҆́блацѣ ле́гцѣ / прїи́де і҆и҃съ пребж҃е́ственный, / нетлѣ́нною дла́нїю, / и҆ сп҃се зовꙋ́щыѧ: / сла́ва хрⷭ҇тѐ си́лѣ твое́й.