Їрмо́съ: Бж҃їимъ / свѣ́томъ твои́мъ бл҃же, / ѹ҆́тренюющихъ тѝ дꙋ́шы любо́вїю ѡ҆зарѝ, молю́сѧ, / тѧ̀ вѣ́дѣти сло́ве бж҃їй, / и҆́стиннагѡ бг҃а, / ѿ мра́ка грѣхо́внагѡ взыва́юща.
Припѣ́въ: Сла́ва гдⷭ҇и, ст҃о́мꙋ воскрⷭ҇нїю твоемꙋ̀.
Ѹ҆стꙋпа́ютъ мнѣ̀ херꙋві́ми ны́нѣ, / и҆ пла́менное ѻ҆рꙋ́жїе, влⷣко, плещы̀ мнѣ̀ дае́тъ, / тѧ̀ ви́дѣвше сло́ве бж҃їй и҆́стиннаго бг҃а, / разбо́йникꙋ пꙋ́ть сотво́ршаго въ ра́й.
Припѣ́въ: Сла́ва гдⷭ҇и, ст҃о́мꙋ воскрⷭ҇нїю твоемꙋ̀.
Не ктомꙋ̀ бою́сѧ, є҆́же въ зе́млю влⷣко хрⷭ҇тѐ возвраще́нїѧ: / ты́ бо ѿ землѝ мѧ̀ возве́лъ є҆сѝ забве́нна, / бл҃гоꙋтро́бїѧ ра́ди мно́гагѡ, / къ высотѣ̀ нетлѣ́нїѧ воскрⷭ҇нїемъ твои́мъ.
Припѣ́въ: Прест҃а́ѧ бцⷣе, сп҃сѝ на́съ.
Бг҃оро́диченъ: И҆̀же бцⷣꙋ тѧ̀ ѿ дꙋшѝ, влⷣчце мі́ра бл҃га́ѧ, / и҆сповѣ́дающихъ сп҃сѝ: / тебе́ бо предста́тельство непобори́мое и҆́мамы, / и҆́стиннꙋю бг҃ороди́тельницꙋ.
И҆́нъ. Припѣ́въ: Сла́ва гдⷭ҇и, крⷭ҇тꙋ̀ твоемꙋ̀ чⷭ҇тно́мꙋ и҆ воскрⷭ҇нїю.
Снѣ́дїю дре́ва во є҆де́мѣ прельсти́выйсѧ въ тлю̀ поползѐ родонача́льникъ, / преслꙋ́шавый гдⷭ҇и за́пѡвѣди твоѧ̑ пребл҃гі́й: / но сего̀ крⷭ҇то́мъ па́ки возве́лъ є҆сѝ въ пе́рвꙋю добро́тꙋ, / послꙋшли́въ ѻ҆ц҃ꙋ̀ сп҃се бы́вый.
Припѣ́въ: Сла́ва гдⷭ҇и, крⷭ҇тꙋ̀ твоемꙋ̀ чⷭ҇тно́мꙋ и҆ воскрⷭ҇нїю.
Твое́ю сме́ртїю бл҃же, сме́рти потреби́сѧ держа́ва, / и҆сто́чникъ жи́зни на́мъ и҆сточѝ, и҆ безсме́ртїе дарова́сѧ: / сегѡ̀ ра́ди погребе́нїю твоемꙋ̀ и҆ воскрⷭ҇нїю вѣ́рою покланѧ́емсѧ, / и҆́мже ꙗ҆́кѡ бг҃ъ мі́ръ ве́сь просвѣти́лъ є҆сѝ.
Припѣ́въ: Прест҃а́ѧ бцⷣе, сп҃сѝ на́съ.
Крⷭ҇тобг҃оро́диченъ: Живы́й на нб҃сѣ́хъ и҆ творе́цъ всѣ́хъ гдⷭ҇ь, / во твою̀ всенепоро́чнаѧ, всели́сѧ неизрече́ннѡ ѹ҆тро́бꙋ, / просла́вивый тѧ̀ превы́шшꙋю нб҃съ, / и҆ ст҃ѣ́йшꙋю чинѡ́въ невеще́ственныхъ: / тѣ́мже ны́нѣ и҆̀же на земли́ тѧ ѹ҆бл҃жа́емъ.
И҆́нъ. Припѣ́въ: Прест҃а́ѧ бцⷣе, сп҃сѝ на́съ.
Чистото́ю возсїѧ́вши свѣ́тлѡ / бж҃е́ственное пребыва́нїе влⷣки всепѣ́таѧ была̀ є҆сѝ. / ты́ бо є҆ди́на мт҃и бж҃їѧ ꙗ҆ви́ласѧ є҆сѝ, / во ѡ҆б̾ѧ́тїихъ ꙗ҆́кѡ младе́нца сего̀ носи́вши.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ.
Носѧ́щи добро́тꙋ ѹ҆́мнꙋю, краснѣ́йшїѧ твоеѧ̀ дꙋшѝ, / невѣ́ста бж҃їѧ была̀ є҆сѝ, / запеча́тствована дв҃ствомъ чи́стаѧ, / и҆ свѣ́томъ чистоты̀ мі́ръ просвѣща́ющи.
И҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Да рыда́етъ собра́нїе ѕлочести́выхъ, / не проповѣ́дающихъ тѧ̀ ꙗ҆́вѣ чи́стꙋю бг҃ома́терь: / ты́ бо врата̀ бж҃їѧ свѣ́та ꙗ҆ви́ласѧ є҆сѝ на́мъ, / мра́къ прегрѣше́нїй разгонѧ́ющи.
Катава́сїа: Ѹ҆жасо́шасѧ всѧ́чєскаѧ / ѡ҆ бж҃е́ственнѣй сла́вѣ твое́й: / ты́ бо неискꙋсобра́чнаѧ дв҃о, / и҆мѣ́ла є҆сѝ во ѹ҆тро́бѣ над̾ всѣ́ми бг҃а, / и҆ родила̀ є҆сѝ безлѣ́тнаго сн҃а, / всѣ̑мъ воспѣва́ющымъ тѧ̀, / ми́ръ подава́ющаѧ.