Ирмос: Колесницегони́теля фарао́ня погрузи́ чудотворя́й иногда́ / Моисе́йский жезл крестообра́зно порази́в / и раздели́в мо́ре, Изра́иля же беглеца́ пешехо́дца спасе́,// песнь Бо́гови воспева́юща.
Преподо́бнии отцы́ Афо́нстии, моли́те Бо́га о нас.
Боже всех, дар словесе́ пода́ждь ми, Твоему́ рабу́, ны́не начина́ющему хвали́ти пе́сньми и́же во Афо́нстей горе́ просия́вшия отцы́, Твою́ во́лю испо́лнившия.
Преподо́бнии отцы́ Афо́нстии, моли́те Бо́га о нас.
Афо́нских отце́в свято́е собра́ние, су́щии во Афо́не, пе́сньми почти́м, дру́ги Пресвяты́я Де́вы и Христа́ Бо́га рачи́тельныя уго́дники, на́ша те́плыя предста́тели и моли́твенники непреста́нныя о спасе́нии душ на́ших.
Преподо́бнии отцы́ Афо́нстии, моли́те Бо́га о нас.
Вели́кия Ла́вры свяще́ннаго созда́теля в пе́снех почита́ю, Вели́каго Афана́сия,
о́браз и начерта́ние бы́вшим во Афо́не отце́м, в виде́ниих вку́пе же и дея́ниих.
Пресвята́я Богоро́дице, спаси́ нас.
Ра́дуйся, Пресвята́я Госпоже́, освяти́вшая Афон Твои́м прише́ствием; ра́дуйся,
низложи́вшая та́мо и́долы; ра́дуйся, насади́вшая в Горе́ ве́ру и́стинную; ра́дуйся, неве́рие отту́ду отгна́вшая.
Другий канон, глас 1.
Преподо́бнии отцы́ Афо́нстии, моли́те Бо́га о нас.
Ватопе́дскаго сла́внаго Ага́пия восхвали́ти до́лженствую, и́же Богоро́дичен глас услы́ша, и поработи́ся, и изба́ви своего́ влады́ку с сы́нми его́, я́ко свобо́ден сый ве́чныя му́ки.
Преподо́бнии отцы́ Афо́нстии, моли́те Бо́га о нас.
Афана́сия, кра́сныя о́трасли Симе́нския оби́тели, похваля́ю житие́,/ Боже́ственного же Ака́кия но́ваго и преподо́бнаго Гаврии́ла И́верскаго,/ от моря изъе́мшаго чудотво́рную ико́ну Врата́рницы.
Сла́ва Отцу́ и Сы́ну и Свято́му Ду́ху.
Ка́ко не почту́ честна́го Генна́дия, узре́вшаго я́ве в Ватопе́де источи́вшийся еле́й чу́дом Богома́тере? Ка́ко же умолчу́ о Богоно́снем Гео́ргии, И́верския оби́тели созда́теле?
И ны́не и при́сно и во ве́ки веко́в. Ами́нь.
Богородичен: Егда́ язы́ки разделя́ше Бог по числу́ а́нгел Свои́х, тогда́ прови́дя Тя, Де́во, бы́ти в Ма́терь Свою́ Пречи́стую, отдели́ Тебе́ Го́ру сию́ вели́кую в достоя́ние неотъе́млемо.