Внꙋшѝ бж҃е мл҃твꙋ мою̀, и҆ не пре́зри моле́нїѧ моегѡ̀. вонми́ ми, и҆ ѹ҆слы́ши мѧ̀: возскорбѣ́хъ печа́лїю мое́ю, и҆ смѧто́хсѧ ѿ гла́са вра́жїѧ и҆ ѿ стꙋже́нїѧ грѣ́шнича. ꙗ҆́кѡ ѹ҆клони́ша на мѧ̀ беззако́нїе, и҆ во гнѣ́вѣ враждова́хꙋ мѝ. се́рдце моѐ смѧте́сѧ во мнѣ̀, и҆ боѧ́знь сме́рти нападѐ на мѧ̀. стра́хъ и҆ тре́петъ прїи́де на мѧ̀, и҆ покры́ мѧ тьма̀. и҆ рѣ́хъ: кто̀ да́стъ мѝ крилѣ̀ ꙗ҆́кѡ голꙋби́нѣ, и҆ полещꙋ̀ и҆ почі́ю; сѐ ѹ҆дали́хсѧ бѣ́гаѧ, и҆ водвори́хсѧ въ пꙋсты́ни. ча́ѧхъ бг҃а, сп҃са́ющагѡ мѧ̀ ѿ малодꙋ́шїѧ и҆ ѿ бꙋ́ри. потопѝ гдⷭ҇и, и҆ раздѣлѝ ꙗ҆зы́ки и҆́хъ, ꙗ҆́кѡ ви́дѣхъ беззако́нїе, и҆ прерѣка́нїе во гра́дѣ. дне́мъ и҆ но́щїю ѡ҆бы́детъ и҆̀ по стѣна́мъ є҆гѡ̀: беззако́нїе и҆ трꙋ́дъ посредѣ̀ є҆гѡ̀, и҆ непра́вда: и҆ не ѡ҆скꙋдѣ̀ ѿ сто́гнъ є҆гѡ̀ ли́хва и҆ ле́сть. ꙗ҆́кѡ а҆́ще бы вра́гъ поноси́лъ мѝ, претерпѣ́лъ бы́хъ ѹ҆̀бо: и҆ а҆́ще бы ненави́дѧй мѧ̀ на мѧ̀ велерѣ́чевалъ, ѹ҆кры́лъ бы́хъ сѧ ѿ негѡ̀. ты́ же человѣ́че равнодꙋ́шне, влады́ко мо́й, и҆ зна́емый мо́й: и҆́же кꙋ́пнѡ наслажда́лсѧ є҆сѝ со мно́ю бра́шенъ, въ домꙋ̀ бж҃їи ходи́хомъ є҆диномышле́нїемъ. да прїи́детъ же сме́рть на тѧ̀, и҆ да сни́дꙋтъ во а҆́дъ жи́ви: ꙗ҆́кѡ лꙋка́вство въ жили́щахъ и҆́хъ, посредѣ̀ и҆̀хъ: а҆́зъ къ бг҃ꙋ воззва́хъ, и҆ гдⷭ҇ь ѹ҆слы́ша мѧ̀. ве́черъ и҆ заꙋ́тра и҆ полꙋ́дне повѣ́мъ, и҆ возвѣщꙋ̀, и҆ ѹ҆слы́шитъ гла́съ мо́й. и҆зба́витъ ми́ромъ дꙋ́шꙋ мою̀ ѿ приближа́ющихсѧ мнѣ̀: ꙗ҆́кѡ во мно́зѣ бѧ́хꙋ со мно́ю. ѹ҆слы́шитъ бг҃ъ, и҆ смири́тъ ѧ҆̀, сы́й пре́жде вѣ̑къ: нѣ́сть бо и҆̀мъ и҆змѣне́нїѧ, ꙗ҆́кѡ не ѹ҆боѧ́шасѧ бг҃а. прострѐ рꙋ́кꙋ свою̀ на воздаѧ́нїе, ѡ҆скверни́ша завѣ́тъ є҆гѡ̀. раздѣли́шасѧ ѿ гнѣ́ва лица̀ є҆гѡ̀, и҆ прибли́жишасѧ сердца̀ и҆́хъ: ѹ҆мѧ́кнꙋша словеса̀ и҆́хъ па́че є҆ле́а, и҆ та̑ сꙋ́ть стрѣ́лы. возве́рзи на гдⷭ҇а печа́ль твою̀, и҆ то́й тѧ̀ препита́етъ, не да́стъ въ вѣ́къ молвы̀ пра́ведникꙋ. ты́ же бж҃е, низведе́ши ѧ҆̀ въ стꙋдене́цъ и҆стлѣ́нїѧ. мꙋ́жїе крове́й и҆ льстѝ не преполовѧ́тъ дне́й свои́хъ: а҆́зъ же гдⷭ҇и ѹ҆пова́ю на тѧ̀.