Слава Тебе, Господи Иисусе Христе, Боже мой, яко паки сподобил еси мя недостойнаго, прешедша поприще святаго поста, поклонитися Божественным страстем Твоим и всерадостный день преславнаго Твоего из гроба Воскресения видети, воньже свободил еси сущия во аде от века связанныя души праведных. Сего убо Божественнаго свобождения, Спасителю мой, и аз желаю, да разрешиши мя, многими грехи связана, и да сотвориши возсияти живоносному свету Воскресения Твоего во мрачней души моей: вижду бо безчисленныя щедроты и неизреченное человеколюбие Твое, яко не точию от небытия в бытие мя привел еси, и образа Твоего подобием украсив, всея дольния твари владыку мя поставил еси, но и посем падша с высоты и врагу поработившася никакоже оставил еси, но, искупив мя безценною кровию Твоею, благодатию Крещения снабдил мя еси, да востеку на первое достояние. Обаче окаянный аз, умом плотским запят быв, обратихся вспять и паки раб греха есмь, доне́леже един по единому погубих вся дары благодати Твоея. И ныне убо, что сотворю, не вем: обаче помянув глаголы пречистых уст Твоих, яко не пришел еси призвати праведники, но грешники в покаяние, паки с верою и смирением прихожду к живоносному гробу Твоему, не миро, ниже ароматы благочестия носяй [наг бо есмь и пуст благих дел], но паче надежды не отторгийся прощение грехом моим от Тебе получити, нечистому же житию моему обновление. Призри убо на мя кающася и служити тебе хотяща, и не отрини от благодати Воскресения Твоего. Живоносную смерть и погребение изволивый, умертви моя лютыя страсти, да яко мертв и погребен мiру явлюся. Преславным возстанием Твоим мертвыя возставивый, воздвигни мою душу, умерщвленную грехми, и совесть мою пробуди, еяже ничтоже в мiре нужнейше есть. Вознесением Твоим путь на небеса роду человеческому обновивый, отторгни мя от суетных и душетленных благ земных, и сотвори мя горняя мудрствовати, яко да не ктому себе живя и угождая, но Тебе Господу и Богу моему служя и работая, сподоблен буду лицем к лицу Тя Искупителя моего видети, за приятие смерти крестныя славою и честию венчанна, и одесную величествия Твоего, со Архангелы и Ангелы и со всеми искупле́нными Тобою предстоя, воздам ти Славу и поклонение, со Отцем и Святым Духом, во веки веков.