О священная главо̀, великий угодниче Божий, святителю Христов и чудотворче, преподобне и богоносне отче Си́моне! К тебе небесному заступнику и теплому предстателю нашему, и со упованием всеусердно молим тя: яви милосердие твое нам смиренным и грешным, и пролей теплыя молитвы твоя о нас ко Господу, Емуже со Ангелы и всеми святыми на небеси во славе вечней предстои́ши. Вемы, святче Божий, яко свойственно есть тебе милосердие, ибо, еще на земли живущу ти, едино имел еси попечение, еже спасти от погибели греховныя душы человеческия: темже убо потщи́ся, благосе́рде, предстоя страшному престолу Господа славы, о нашем спасении ходатай быти, да не погибнем лю́те со беззако́нии нашими. Веруем, отче преблаженне, яко ты, иже во время земнаго жития Христовою любовию ближния твоя возлюбил еси, кольмѝ паче лю́биши вся ны о Господе, на небесех водворя́яся: темже всеусердно молим тя, яко отца нам суща, да присно соблюдаеши ны под покровом твоим от всякаго зла. Ты, отче преподобне, не точию сам верою правою и благи́ми де́лы до́бре угоди́вый Господеви, но и иныя научивый право веровати и волю Божию творити, по неложному обетованию Христову, ве́лий наречен еси во Царствии Небеснем: темже убо настави и нас, данною тебе от Господа благодатию, тако веровати и тако путем заповедей Господних шествовати, да не то́чию николи́же на погибельный путь неверия уклонитися восхо́щем, но паче и иныя во правоверии утвердити и на путь истиннаго благочестия наста́вити потщимся. Еще же припадающе молим тя, угодниче Христов: предстательствуй ко Всемилостивому Владыце и Царю царствующих, да сохранит под покровом Своея благости, во здравии и непременя́емем благополучии, благочести́вейшего госуда́ря нашего, императора Николая Александровича весь царствующий дом, и да избавит их от всякаго злаго обстояния: Церковь святую от ересей и расколов, державу же православно-российскую от всякаго мяте́жа, бра́ней и нестрое́ний да соблюде́т: да даст же пастырем Церкве святую ревность о спасении пасомых и просвещении неверных: да дарует начальствующым мудрость и силу, подчиненным усердие и благопокорливость, судиям прозорливость и нелицеприятие, супругам верность и единодушие, родителем разум и благочестие, чадом кротость и послушание, всем же лю́дем всяк дар коему́ждо благопотре́бен, вся́ку благовременну помощь во благих делех и вся ко спасению и славе Божией подобающая сохрани, отче преподобне, твоими богоприятными молитвами, царствующыя гра́ды, и вся гра́ды и ве́си державы российския, и град сей, от всякаго зла и нападений вра́жиих: вся же православныя люди, с любовию и упованием притекающыя к покрову твоему и благочестно покланяющыяся мощем твоим, осени небесным твоим благословением, и вся прошения их во благо исполни. Ей, угодниче Божий! не презри молений наших, и не посрами нас от упования и чаяния нашего. Се бо мы недостойнии и смирении и многих грехов испо́лненнии, ведуще, яко грешники Бог не послушает, но аще кто богочтец есть и волю Его творит, того послу́шает, ко твоему прибегаем предстательству, да твоею помощию и заступлением, мирно и благочестно поживше на земли, сподобимся и небесных благ восприятия, славяще и превозносяще Отца и Сына и Святаго Духа, Единаго в Троице славимаго и покланяемаго Бога, и твое милостивное предстательство, во веки веков.