Живо́тъ во гро́бѣ возлежа́ше, и҆ печа́ть на ка́мени надлежа́ше: / ꙗ҆́кѡ цр҃ѧ̀ спѧ́ща во́ини стрежа́хꙋ хрⷭ҇та̀, / и҆ врагѝ своѧ̑ неви́димѡ порази́вый, воскр҃се гдⷭ҇ь.
Сті́хъ: И҆сповѣ́мсѧ тебѣ̀ гдⷭ҇и, всѣ́мъ се́рдцемъ мои́мъ, повѣ́мъ всѧ̑ чꙋдеса̀ твоѧ̑.
Преднаписꙋ́етъ і҆ѡ́на гро́бъ тво́й, / и҆ сказꙋ́етъ сѷмеѡ́нъ воста́нїе бж҃е́ственное, безсме́ртне гдⷭ҇и: / соше́лъ бо є҆сѝ ꙗ҆́кѡ ме́ртвъ во гро́бъ, разрꙋши́вый а҆́дѡва врата̀. / воскрⷭ҇лъ же є҆сѝ кромѣ̀ тлѣ́нїѧ ꙗ҆́кѡ влⷣка, / во сп҃се́нїе мі́ра, хрⷭ҇тѐ бж҃е на́шъ, / просвѣти́вый сꙋ́щыѧ во тьмѣ̀.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Бг҃оро́диченъ: Бцⷣе дв҃о, молѝ сн҃а твоего̀, / во́лею пригвожде́ннаго на крⷭ҇тѣ̀, / и҆ воскрⷭ҇шаго и҆з̾ ме́ртвыхъ хрⷭ҇та̀ бг҃а на́шего, / сп҃сти́сѧ дꙋша́мъ на́шымъ.
Гдⷭ҇и поми́лꙋй, в҃і.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
И҆ пое́мъ полѷеле́й: ѱалмы̀ рл҃д и҆ рл҃є.