Ирмо́с: Его́же во́инства небе́сная сла́вят, и трепе́щут херуви́ми и серафи́ми, вся́ко дыха́ние и тва́рь, по́йте, бла́гослови́те и превозноси́те во вся ве́ки.
Преподо́бне о́тче на́ш Паи́сие, моли́ Бо́га о на́с.
Чу́дную пои́стинне и вла́сть от Бо́га испроси́л при сме́рти твое́й, о о́тче! е́юже все́х ужаси́л еси: егда еди́н мертве́ц в це́ркви лежа́ше, други́й во гро́б полага́шеся, други́й в ке́ллии сверша́шеся: па́ки еди́наго сла́вою и здра́вием венча́л еси, друга́го же на одре боле́зни полага́л еси, та́ко вознося́щихся смири́л еси, смире́нных же возвы́сил еси, вла́стию тебе от Бо́га да́нною.
Преподо́бне о́тче на́ш Паи́сие, моли́ Бо́га о на́с.
Кто не удиви́тся и кто не прии́дет в размышле́ние, и кого пла́чь не обы́дет! и кому не водрузи́ся во пе́рвых зра́к чу́дный о́браза твоего, о́тче Паи́сие, не реку а́ки око́стен: кре́пкий в се́рдце: но а́ки тве́рдь кре́пкая на воде, ея́же никто́же от су́щих на не́й дви́гнути возмо́жет, ра́зве водрузи́вый ю. Доброде́телем же кро́ткаго жития твоего кто не удиви́тся?
Сла́ва Отцу́ и Сы́ну и Свято́му Ду́ху.
А́з еди́н во све́те твое́м ходи́х, и све́та твоего не чу́вствовах: а́з еди́н пи́щу твою сла́дкую ядо́х, и корми́теля своего не познава́х: а́з еди́н питие твое сла́дкое пи́х, и сла́дкаго исто́чника теку́щаго из у́ст твои́х не ощуща́х: а́з еди́на овца заблужда́ющая от твоего ста́да, па́стырю до́брый, не зло́бися на мене, умоли Бо́га дарова́ти вре́мя к покая́нию.
И ны́не и при́сно и во ве́ки веко́в. Ами́нь.
Волну́ема мя бу́рею грехо́вною вопию́ ти, Влады́чице Чи́стая, твои́м хода́тайством напра́ви ко спа́си́тельному покая́нию, и ко всеути́шному приста́нищу: я́ко да уви́жу све́т спа́се́ния, омрача́емый при́сно ле́ностию.