Ирмо́с: Безсе́меннаго зача́тия рожде́ство несказа́нное, Ма́тере безму́жныя нетле́нен Пло́д: Бо́жие бо рожде́ние обновля́ет естества. те́мже тя вси ро́ди, я́ко Богоневе́стную Ма́терь, правосла́вно велича́ем.
Преподо́бне о́тче на́ш Паи́сие, моли́ Бо́га о на́с.
Не мо́жет пои́стинне ви́девый житие твое замолча́ти доброде́телей его! кому́ бо нежела́телен бы́л еси? кому ру́ку по́мощи не пода́л еси, о ко́м не сожале́л еси? чиего се́рдца не умягчи́л еси, вои́стинну а́ще бы и адама́нта тверде́йший кто бы́л, и просте́йшаго бы худо́жества к сочине́нию не имя́ше, но ви́денное очесы и сде́ланное с ни́м, доведе́т его к похвале́нию доброде́телей твои́х, о́тче Паи́сие.
Преподо́бне о́тче на́ш Паи́сие, моли́ Бо́га о на́с.
Сла́ва Тебе, о Пренебе́сный Царю́! Я́ко сподо́бил еси на́с в таково́й глубо́кой тме, такова́го пресве́тлаго свети́льника ви́дети, сла́ва Тебе, о неисчерпа́емыя ми́лости бе́здна! я́ко показа́л еси на́м такова́го исто́чника, и́же дово́лне напои́л е́сть на́с сла́дкаго из у́ст свои́х теку́щаго жития, напита́шася бо дово́льне, и напая́тися и́мут, не то́чию худо́жнии вити́и, но и прости́и и невежды пития твоего, о́тче Паи́сие, а́ще то́чию не прохлади́т ки́йждо на́с горя́чести се́рдца твоего.
Сла́ва Отцу́ и Сы́ну и Свято́му Ду́ху.
Мене́ же о́тче, ла́комаго, е́же с тобо́ю су́ща, не дово́льне насы́тил еси сла́дкаго твоего пития, зане́же отве́ргл мя еси а́ки ма́ти ча́до угрыза́юща сосца твоя, а дне́сь уже отню́д хла́дна: молю́ тя, согре́й мя, да не лишу́ся и а́з сла́дкаго твоего пития.
И ны́не и при́сно и во ве́ки веко́в. Ами́нь.
Ему́же предстоя́т с тре́петом небе́снии чи́ни, Того родила еси Чи́стая соедини́вшагося челове́ком за бла́гость. Его́же приле́жно моли уще́дрити рабы Твоя́.