Ирмо́с: Согреши́хом, беззако́нновахом, непра́вдовахом пред тобо́ю, ниже соблюдо́хом, ниже сотвори́хом, я́коже запове́дал еси на́м: но не преда́ждь на́с до конца, отце́в Бо́же.
Преподо́бне о́тче на́ш Паи́сие, моли́ Бо́га о на́с.
Вои́стинну удиви́ла на́с сме́рть твоя, о о́тче на́ш Паи́сие, не то́чию бо чада твоя растерза́вше сердца своя, разбива́хуся по земли: но и возду́х чу́дно шумя́щь, и а́ки бы пла́чущь явля́яся, показу́я на́м се́тования вре́мя.
Преподо́бне о́тче на́ш Паи́сие, моли́ Бо́га о на́с.
Духо́внии отцы не́сшии тя, о ко́ль восхоте́ли жа́ль удержа́ти, но кто можа́ше держа́ти, отве́рзше бо уста, славосло́виша бо́га: вся́кое сло́во изше́дшее из у́ст, влеча́ше с собо́ю мно́жество рыда́ний и исто́чник сле́з.
Сла́ва Отцу́ и Сы́ну и Свято́му Ду́ху.
Мене, преступи́вшаго твоя веления, мене пренебрега́вшаго свя́ту́ю твою во́лю, зави́стливаго и лука́внейшаго па́че все́х человек, мене исполня́ющаго свою во́лю, па́че же диа́волю, прости, незло́биве о́тче, бла́ги́м и кро́тким твои́м обы́чаем: и моли́ся Бо́гу дарова́ти ми вре́мя к покая́нию.
И ны́не и при́сно и во ве́ки веко́в. Ами́нь.
Врата Непроходимыя, отве́рзи ми врата, молю́ся, покая́ния и́стиннаго: и покажи́ ми стезю покая́ния Чи́стая, все́х Наста́внице.