Ирмо́с: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.
Припе́в: Пресвята́я Госпоже́ Богоро́дице, услы́ши моли́тву ра́б Свои́х, моля́щихся Тебе́.
Внуши́ печа́льный во́пль раба́ Твоего́, тре́бующаго по́мощи Твоея́, Богома́ти, Ты́ еси́ упова́ние мое́, потщи́ся печа́ль мою́ на ра́дость преложи́ти.
Припе́в: Пресвята́я Госпоже́ Богоро́дице, услы́ши моли́тву ра́б Свои́х, моля́щихся Тебе́.
Изба́ви мя́ от льсти́ вра́жия, от я́зыка льсти́ва и от челове́ка непра́веднаго изба́ви мя́ без па́кости, вся́ бо мо́жеши, я́ко Ма́ти Зижди́теля су́щи.
Сла́ва: Ве́м Тя́, Богоблагода́тная, многотру́дных целе́бницу, и а́з немощны́м ду́хом и усты́ зову́: от напа́сти сея́ и печа́ли свободи́ и спаси́ мя, Влады́чице, прибега́ющаго.
И ны́не: Изба́ви мя́ от ле́сти сея́ и беды́, Богоневе́сто, Тя́ бо устро́и Бо́г Хода́таицу на спасе́ние и заступле́ние на́ше, сего́ ра́ди и мне́, недосто́йному, исхода́тайствуй от всея́ печа́ли свобожде́ние.
[Катава́сия: Спаси́ от бе́д рабы́ Твоя́, Богоро́дице, я́ко вси́ по Бо́зе к Тебе́ прибега́ем, я́ко неруши́мей стене́ и предста́тельству.]
Конда́к, гла́с 8:
Взбра́нной Воево́де победи́тельная, я́ко изба́вльшеся от злы́х, благода́рственная воспису́ем Ти́ раби́ Твои́, Богоро́дице: но я́ко иму́щая держа́ву непобеди́мую, от вся́ких на́с бе́д свободи́, да зове́м Ти́: Ра́дуйся, Неве́сто неневе́стная.
Икос:
Ангел предста́тель с небесе́ по́слан бы́сть рещи́ Богоро́дице: радуйся! И, со безпло́тным гла́сом, воплоща́ема Тя́ зря́, Го́споди, ужаса́шеся и стоя́ше, зовы́й к Не́й такова́я: Ра́дуйся, Еюже ра́дость возсия́етъ; ра́дуйся, Еюже кля́тва исче́знет. Ра́дуйся, па́дшаго Ада́ма воззва́ние; ра́дуйся, сле́з Евиных избавле́ние. Ра́дуйся, высото́, неудобовосходи́мая челове́ческими по́мыслы; ра́дуйся глубино́, неудобозри́мая и а́нгельскима очи́ма. Ра́дуйся, я́ко еси́ Царе́во седа́лище; ра́дуйся, я́ко но́сиши Нося́щаго вся́. Ра́дуйся, звездо́, явля́ющая Со́лнце; ра́дуйся, утро́бо Боже́ственнаго воплоще́ния. Ра́дуйся, Еюже обновля́ется тва́рь; ра́дуйся, Еюже покланя́емся Творцу́. Ра́дуйся, Неве́сто неневе́стная.
[Проки́мен Богоро́дицы, гла́с 4: Помяну́ и́мя Твое́* во вся́ком ро́де и ро́де. Сти́х: Слы́ши, Дщи́, и ви́ждь, и приклони́ у́хо Твое́. Вся́кое дыха́ние… Ева́нгелие Луки́, зача́ло 4.
Стихи́ра, гла́с 6:
Не вве́ри мя́ челове́ческому предста́тельству, Пресвята́я Влады́чице, но приими́ моле́ние раба́ Твоего́: ско́рбь бо обдержи́т мя́, терпе́ти не могу́ де́монскаго стреля́ния, покро́ва не и́мам, ниже́ где́ прибе́гну, окая́нный, всегда́ побежда́емь, и утеше́ния не и́мам, ра́зве Тебе́, Влады́чице мíра, упова́ние и предста́тельство ве́рных, не пре́зри моле́ние мое́, поле́зно сотвори́].